جعلوني مجرما وبتاع رز

(بوست قديم يعاد نشره)
انا مكنتش ناوية اكتب لاني مليش نفس ومش عوزة صراحة
مش لانى مخنوقة ولا حاجة بس لانة صراحة انشغلت فى موضوع الرساله واختيارها ومقابلات الدكاترة والكلام ده وكمان انا بريح نفسي من جو النت شوية
بس اللى اجبرنى يا رجاله على كتابة البوست ده حاجة ميتسكتش عليها
كنت فوتها مرة لكن التانية مينفعش افوتها

من بتاع شهر يعني في اول رمضان جاتلي رساله علي الموبايل
تررن...تررن...تررن تن تن.......ده صوت الرساله لما بتيجي متشغلوش بالكم انتوا
رحت فتحت كده وانا سعيدة ومبسوطة...يعني بردو جو الرسايل بقه قليل الزمن ده...الناس بقت تستسهل وتتصل علطول
قال ايه
الاقي الرساله رساله تهديد
من مين يا جدعان
من وزارة البيئة
بتقول ايه
قال بتقولي
"بحرقك لقش الرز بتأذي بلدك"
ومش فاكرة العالم دول هددوني بتشويهي بجركن مية نار سعتها ولا ايه مش فاكرة...بس كل اللى فكراه واللى اثر فيا
ان وزارة البيئة سابت الناس كلها
سابت شريبي السجاير والشيشة
وسابت الفلاحين اللى بيحرقوا الرز
وسابت الزبالين اللى بيحرقوا الزبالة
وسابت حتي بتاع الكباب والكفتة اللى دخان مدخنته مالى الدنيا ومجري ريق البشر
دي حتى سابت خرم الاوزون والاحتباس الحراري اللى فى كفر طهورمس
وجت تمسك فى خناقى انا
انا الغلبانة اللى اعدة في بيتي ومنكبة علي القراءة وتصفح شبكات الانترنت ولا ليا فى رز ولا برسيم
جاية تقولي الرز والعتس ومعرفش ايه
سعتها فطست من الضحك
واعدت اسأل روحي سر انهم يبعتولى انا الرساله دي دونا عن كل الناس
محطتش في بالى وقلت معلهش...غلطة ارسالية من شركة موبينيل اللى بعتتلي الرساله باسم وزراة البيئة
واكيد وزارة البيئة كانت تقصد تبعتها لعمدة كفر دعبس وبعتتهالى انا
وفكرت اعمل رسالة الماجستير بتاعتي عن قضية حرق قش الرز وأثرها علي شركة موبينيل وعلي خدمة الثرى جي"

العجيب بقه واللى اعتبرته استفزاز الحاحي
هو اني من عشر دقايق بالظبط
جاتلي بقه الرساله دي
وبلهجة تهديدة اشد واعنف
"تنتن ترتنتنتن تربتتيت"...لا ده انا كده غيرت الرنة بتاعت الرسايل ..متركزوش اوي
"إصرارك على حرق قش الأرز يدمر البيئة ويؤذى الصحة...مع تحيات وزارة البيئة"
وهنا احب اقف شوية
واخدين بالكم انتوا معايا علي اصرارك دي
شايفين الغتاتة
شايفين الاستفزاز
شايفين الاتامة
يعني الاولى وعديناها
لكن التانية دي اتهام صريح
العالم بتقولي اصرارك
ومش بعيد كانوا شتموني بكلام سفيق لولا انهم خافو الرساله توسع منهم وتبقه رسالتين فى بعض
يعني انا مثلا كنت بحرق رز زمان وهما حذروني برساله رحت انا بقه ركبت نفوخي وطلعت علي غيطان الرز بتاعت الجيران ورميت عليها بنزين وولعت فيها بالفلاحين اللى جواها
مش فهمة بردو
انا لو بحتكم علي شوية قش كنت فتحت ورشة نابوليا اد الدنيا وسيبتني من التعليم والماجستير والارف
ولا كنت عملت مصنع مشروب قش خالى من الكحول
انا شكلى بزرع رز ومش مركزة انا ولا ايه
انا مش عارفني
وعشان فجوة الثقة اللى بقت بيني وبين وزارة البيئة دي
احب اوجه رساله للوزارة اودام العالم دي كلها بانى هتوب
خلاص
الكبريت خلص خلاص
مش هولع تاني
واحب اوجه لقرائى رسالة
"وربنا اللى بلغ عني لا ارشرش علي وشه بوئين مية نار واقطع عليه وصلة النت بتاعته...بس اتاكد مين ورا البلاغ ده وارجع"

مشروب الطاقة...يخلصك من القلب والمرارة والضغط والاحساس

(بوست قديم)
اه وربنا
لا بجد
النهاردة كده لا بيا ولا عليا
نزلة راحة انا كليتي عادى ومليش دعوة بحد خالص انا
كنت بقدم خطة بحثي الاخيرة وعادي يعني
قال ايه
وانا علي كوبري جامعة حلوان  الاقي العالم ماسكين في ايدهم علبة كده صفيح رفيعة ولونها اسود وعليها كتابة بالاخضر (كانة بالافرنجي يعني)
مخدتش في بالى انا ولا اهتميت
بس لا بقه
في ايه
الناس كلها ماسكة بقه العلبة الصفيح امو اخضر
ايوة هو انا هتوه عنها...دي العلبة الصفيح امو اخضر
عادي وانا مالى
لا بقه الارض مليانة صفايح خضرا
في ايه
وهنا لقيت عقلي الباطنى بيترجم النظرية وقتي
وادركت فى فسوة ان في حد بيفرق الصفايح دي
كل واحد ياخد صفيحة رفيعة
يأربع اللى فيها ويرمي العلبة علي الارض
اقوم انا اشوفها مرمية فأتسائل
حسيت بحاله من الامتعاض
يعني حالة من الضيق والاريفة والزمزءة و الزمئان
يعني من الاخر بقيت ممتعضة كده في نفسي
يعني انا دونا عن كل الناس اللى معييش علبة خضرا؟
طيب يعني انا اضمن منين ان العلبة الصفيح دي مش تطعيم مثلا ضد مرض انتشر جوة الجامعة؟!
ولا مثلا أن حرس الجامعة بيقفش اي حد ماشي من غير العلبة الصفيح أمو أخضر؟!
اعرض نفسي انا ليه للمسائلة القانونية؟!
ترضوها علي نفسكم؟!
هه...مش حقى ده ذي اي بني ادم ماشي بصفيحة؟!
ما علينا
لا لقيت الجدعان اللى بيفرقوا الصفايح
ولا لقيت الصفايح
وحتي لو كنت لقيتهم استحاله كنت اقف اخد صفيحة
لاني بيني وبينكم اتحرج جدا من جو الصفايح و الكلام بتاع الدعايا ده
انا استني لما المنتج ينزل انا واشتريه بفلوسي لو نفسي هفتني عليه
لكن صفايح وناس راحة وناس جاية
ابسلوتلي
(بس مش هنكر وربنا...كنت اموت واخد صفيحة اجربها... ان شا الله اخرمها واعملها تلافون لعبة)
كيكي ميكي...كيكي ميكي
خلصت مهمتي وقدمت خطتي ورشيت رشتي واكلت لؤمتي وقابلت صحبتي
وقلنا نروح بقه
واحنا مروحين
لقيت بردو الناس ماسكين علب صفيح والكل ماشي مبسوط اكتر من الاول
واللى شايل صفيحة واللى شايل صفحتين وتلاتة وايه...ميغة
"لحد هنا واستوب...لا بقه...لازم اعرف في ايه...ومين دول...والصفيحة دي جواها ايه...واللى جواها ده طعمه ايه"
لقيت صحبتي مروة بتقولي تعالى نشوف ايه ده
قلتلها "على فكرة يا مروة...العالم دي من الصبح عماله تأربع في البتاع ده...ولا في اي احساس بالمسؤلية ان في ناس مخدتش...اتصرفي يا مروة ورديلي كرامتي...انا فيها لا اخفيها...بس انا مكسوفة اروح اجيب انا"
"طب استني انتي بس...انا هجيبلك...مينفعش نروح فعلا واحنا مش عارفين ايه ده"
"لا يا مروة عندك حق...انتي صح...مينفعش منخوضش التجربة...طب بصي...انا هروح استناكي بعيد انا احاول الاقي نفسي شوية لحسن حسة اني صدعت كده فجاة وجالى دوار الصفيحة"
وبالفعل الجرعان بتوع الدعاية وقفين يفتحوا في كانزات ويدوا شوباب الجامعة علي اساس انه كله يشرب وكله ينبسط
مفيش...لقيت مروة جايبالى العلبة وبتديهالى...مش هنكر...العلبة كانت ساقعة ومشبرة و صراحة جاية في وقتها
بصيت جوة العلبة لقيت اللى جواها اخضر
اه وربنا اخضر فسفوري كده...وبيكوب
متفهموش بقه عليه يورانيوم ولا اشعاع ولا عفن الخبز ولا ريم ...مش قضيتنا
المهم خدت منها العلبة وقلت بقه اروي عطشي وارضى تساؤلاتي الكامنة
قوم ايه... دلقت نص العلبة في بقى من غير ما استطعم في الاول...ما انا عشطانة بقه
وبعد ما شربت بستطعم كده...الاقيها مرة
يعني هي تدي علي سفن اب شوية...بس مرة
مفهمتش انا بردو في الاول في ايه
وشربت تاني بردو عشان افهم القصة وما فيها
لا بقه دي مرة علي فكرة...مفيش تغيير عن اول شفطة
قريت اسمها كده...لقيته حاجة بس مش فكراها
اللى فكراه اوي
انها كان اسمها مشروب الطاقة
مفهمتش بردو يعني اذاي يعني...يعني بتولد طاقة...ولا بتشحن طاقة...ولا بتسرب طاقة
ولا بتعمل كهربا زيادة في المخ ولا ايه
بس الغريب والعجيب واللى خلاني اقلق اني بعد ما مشيت شوية...لقيت علب كتير مرمية بالاخضر اللى فيها
وذي ما تقولوا كده ان الناس بتيجي عند الحتة دي ونفسوياتها تتغير...والكل يرمي الصفايح بلي فيها وتحدث حالة من الطفشان
قلت لما استفسر بردو من الصفيحة...ما اي صفيحة بردو اكيد بتعبر عن نفسها في اللى مكتوب عليها
رحت قريت الكلام اللى مكتوب علي ضهرها لقيت الاتي:
" تحذير: لا تشرب اكثر من علبتين يوميا، ممنوع لمرضي القلب والضغط، ممنوع للحوامل والمرضعات، ممنوع للأشخاص اقل من 18 سنة، لا يضاف الى الكحوليات....إلخ"
حجات كتيرة ممنوع لدرجة اني شعرت انهم كانوا ممكن يختصروا الحوار ده كله ويكتبوا عليها
"ليست للشرب، بل للتخلص من القلب والفشة والكبدة والطحال واي اعضاء جوة جسمك وعملالك تقل وامتعاض يا برنس"
للحظات اتوهمت
وحسيت ان في تفاعلات كيميائية بتحصل جوة بطني...واعضاء بتسيح جوة...وحجات بتنكمش...وايه....هيصة جوة المعاميع
ركبت المترو...لقيت بنت بتقولي
"ايه ده...مشروب الطاقة تاني؟!"
"مشروب الطاقة تاني!....صارحيني يا انسة...متخبيش...ماله مشروب الطاقة...وحياه ابوكي ما تداري...ده انا اختك بردو وكلنا ولاد تسعة"
قالتلي"لا اصل احنا كنا بنشربه الصبح...لقينا واحد وقفنا وقلنا غلط علي البنات ومعرفش ايه رحنا رميناه"
قلتلها "بصي هو عموما غلط علي كل حاجة... بيتهيقلي ده اصلا الغلطة الكبيرة في حياتي...بس انا خلاص شربت نصه ...ربنا يرحمني انا بقه"
حسيت بالحر اول ما شربته...وبدوخة خفيفة...وبحرقان شديد جوة معدتي...ولازلت اشعر بان في حاجة غلط حصلت جوة ومازالت بتحصل.
مش عرفة بقه انا ممكن اعيش لحد امتي...انا حسة اني بسرب طاقة...بجد عندي حالة من الزمزءة الداخلية و ان معدتي وجعاني
بغض النظر عن اي شىء
ارجو الدعاء والترحم عليا في الاحوال الأتية:
1- ذوبان الاعضاء الداخلي
2- الموت اكلينيكيا والتحلل الذاتي
3- الاختفاء في ظروف غامضة وبدون وجود للجثة
ولو كده العزا هيكون في عمر مكرم
واخواني الاعزاء اصحاب المدونات ميسبونيش...لا يعملوا حملات شجب واستنكار وقلبان
وبلاش حد يضحكوا عليه ببستلة طاقة ويتخلي عني
الوداع

السفاح رجع يا رجاله

بما انى البوست اللى فات كنت بتكلم عن القطط والغلب ده
فهكمل بقه حكايتي مع باقى الحيوانات اللى حصل فرصة ووقعوا تحت ايدي بردو
وخلينا نحكي بقه...حاكم هو فضا العيد بعيد عنكم
وكمان صراحة انا دماغي شكلها كانت تعبانة اوي وانا صغيرة وكانت عندي ميول سفاحية
بس وربنا كنت عسل
نبدأ بقه بحكاية

العصفورة المسلوخة
**************
كان عندنا عصافير ملونة كتير
المهم كان في عصفورة بحبها فيهم...أو يمكن مكنتش بحبها بس حبتها عشان ماتت
المهم انها ماتت
قوم ايه بقه
رحت خدتها ولميت العيال اخواتي الصغيرين وولاد خالتى الاتنين ورحت لابسة اسود
اه والله بمثل...لبست اسود كده وانا مسخوطة كده في اولي اعدادي بيني ولا ايه
واتبشنأت بايشارب كده
وطلعتهم فوق السطوح واعدت اقولهم كلام عن العصفورة يقطع القلب
وافرح اوي انهم بيعيطوا.. واغنيلهم ع التوتة والساقية بتاعت عبد الحليم عشان نتأثر غصب عننا ونعيط
كنت عرفة ان الشخص لما بيموت بيغسلوه تكريما له
طيب انا اعمل ايه دلوقتي وهي عندها ريش علي جسمها ومش عرفة احميها منه
طيب الانسان بيقلعوه هدومه
لكن دي اتصرف معاها بانهي طريقة بقه
رحت جبت علبة ونيمتها جواها واعدت انتف في ريشها واحدة واحدة
علي اساس اني مقتنعة اني كده بقلعها ريشها عشان اكرمها
فضلت كده لحد ما سلختها علي الناشف
ومش بعيد تكون العصفورة كان عندها غيبوبة سكر مثلا وهتفوق بعد شوية بس انا سلختها بالحي...وكلي اقتناع اني بقوم بمهمة عظيمة وجليلة
خلاص سلخت الضحية...ورحت جيباهم كلهم...وجبنا الشامبو والصابون وايه...ميغة
ورحنا مغسلنها.... وبعدين لفتها في قماشة صغيرة قال يعني بكفنها ورحت وخداهم ونازلين جنب البيت و فحرنا فحرة غويطة...ورحنا اعدنا نبص للسما كده ونعيط...وندعي...ومتأثرين اوي
ورحنا دفنينها...ومش عرفة ليه بتخيل دلوقتي ان الهوا ساعتها كان شديد وبيطير شعري وان الروح بترفرف بقه...مع ان مكنش في هوا وانا شعري مكنش بيطير وروحها مكنتش بترفرف...بس هو الوهم بعيد عنكم
خلاص اتدفنت في امان وزهقنا بقه من جو العياط...وبيني رحنا نلعب بقه عادي

بعديها بيومين وانا اعدة في اعدة صفا كده وتجلي مع نفسي افتكرت ان المدرسين بتوع العلوم كانوا قالولنا ان البترول بيبقه في الاصل الاساسي حيوانات ادفنت تحت الارض واتحللت والكلام ده
وهنا بقه ولاول مرة حسيت اني هبقه المكتشفة مها
جريت بسرعة علي المكان اللى دفنتها فيه...واعدت احفر احفر اني الاقي حاجة
مفيش
انا قلت هلاقى سرسوب بترول كده يضرب في وشي ولا هلاقي حتي شوية زيت شعر ولا زيت تموين...لكن للاسف لا لقيت بترول ولا لقيت العصفورة اصلا...ولا لقيت الهيكل العظمي...وهنا لاول مرة كنت ادرك الحقيقة
ادركت ان الشاهد اللى عملته ده كان الغلطة الوحيدة اللى عملتها
لانه اكيد كان دليل واضح للصوص القبور من القطط والكلاب انهم يعرفوا ان في ضحية مسلوخة جهزة مدفونة هنا وبالتالى يكملوا عليها لو كانت لسة فيها روح ويا دوبك بس عندها صدمة من السلخ اللى ع الحي ده
بضحك علي روحي اوي لما افتكر اللى عملته ده...وو الله كنت بعمله بأقتناع شديد اني بقوم بمهمة جليلة اوشكر عليها

السمكة امو من غير دماغ
****************
كان عندنا حوض سمك كبير كله اشكال والوان
كل السمك كبير الا سمكة واحدة كانت صغيرة جدا وبتستفزني اوي بحجمها
كنت احب اخلي اي حد مش واخد باله وادخل ايدي كده من الغطا واحاول امسكها بصوابعي
وكنت امسكها واعد ابصلها كده والعب بيها بعدين ارجعها مكانها

قوم ايه
في ذات مرة ببص علي السمكة الصغيرة لقيتها من غير راس
اه وربنا من غير راس ومرمية في الحوض
شهقت كده شهقة كبيرة.....لئااااااااااااااااااااااااااااااااا
وربنا ما انااااااااااااااااااا
ولقيت اخويا احمد الخبيث وهو صغير لسة واقف يشاور عليا بأصابع الاتهام علي اساس اني انا المتهمة الأساسية في الجريمة دي
وانا ابصله واقوله لئااااااااااااااااااااااااااااااااااااااا وربنا ما عملتلها حاجة
بس فعلا شكيت في نفسي اني اكون في احدي لحظات تعذيبي ليها تكون راسها طلعت في ايدي خاصة انها صغيرة جدا وتكاد تكون اصغر سمكة شفتها في حياتي...اد العقلة وارفع منها...وانا صراحة كنت بلعب معاها من شوية...يبقه انا اللى خلعت راسها في ايدي ومحستش...انا السبب في اللى حصل
واعدت اعيط...اعيط.....اعيط...وابصلها واتصعبن علي نفسي...واغني كده اغاني حزينة لزوم التمثيل....واقلب شفايفي كده واتأثر اوي
لحد ما بعد شوية لقيت حاجة غريبة
لقيت ان السمكتين اللى اكبر منها بشوية...هما كمان ملهومش راس
ادركت هنا ان في حاجة غريبة بتحصل في القضية
مش انا سفاح المعادي والبساتين
وهنا ادركت ان الدخيل اللى اكل روس السمك الصغير
هي السمكة الصغيرة بردو اللى مكنتش اتوقع ان ده كله يطلع منها
ايوة...هي السمكة المشط اللى احمد اخويا اصطادها امبارح وقال يربيها فى حوض السمك مع اخواتها السمك
طلعت برغم حجمها الصغير...قـــــــــــــــــــــــــــــادرة.
ظهر الحق وزهق الباطل

السلحفة المتحللة
***************
كان عندي سلحفة واخويا احمد عنده سلحفة
سلحفة احمد سوسة وخبيثة ورفيعة كده وببوز
وسلحفتي طيبة وغلبانة
المهم سلحفة احمد ماتت ومش فاكرة ماتت ليه
بس هي ماتت وخلاص ورميناها
اما سلحفتي الاصيله صمدت وعاشت بمللها وكئابتها
قوم ايه
مرة السلحفة اختفت
وانا بيني وبينكم كنت اتخنقت منها ومن مللها...لا بتهش ولا تنش...كل اللى عليها تاكل وبس
نفضتلها وقلت تلاقيها هربانة تحت اي سرير ووقت ما تجوع هتطلع
كيكي ميكي كيكي ميكي تمر الايام وانا نسياها خالص
في مرة بجيب حاجة من تحت السرير
لقيت كيس كده جواه حاجة
ببص لقيت الحمد الله السلحفة نيمة جوة بامان وسلام ومجرلهاش حاجة
مسكتها بطمن عليها وببص كده جواها اشوفها عاملة ايه
ملقتش حاجة
لقيت السلحفة فاضية
اه وربنا
يا لهويييييييييييييييييييييييييييييييييييييييييييي
هي فين
الحقونيييييييييييييييييييييييييييييي
السلحفة قلعت الصدفة وهربت
ومن الخوف رحت رامية الصدفة من ايدي اتدشتشت
مهو انا معتقدة اني همسك الصدفة جواها كائن حي...لكن امسك الصدفة ملاقيش جواها حاجة غير فراغ يبقه اسمه ايه
طيب فين السلحفة....فين؟
لحد دلوقتي مش قادرة افهم السلحفة راحت فين
هل استحرت فقلعت وهربت
ولا اتزنقت في الكيس واتحللت جوة وكله خلص قوام قوام
ولا اخويا احمد ده ليه ضلع في موضوع الاختفاء ده
اللى عنده تفسير غير التفسيرات دي يا ريت يعرفني عشان انا امنية حياتي افتح ملف السلحفة ده تاني واعرف الجاني بدل ما انسب القضية لمجهول

اد ايه انا كنت طيبة وكل نوايايا خير
لولا بس الظلم

يلا خدلك شرز و دفي صدرك

نبأ عاجل

جريدة الشروق

تم العثور على جثة علاء الاسواني ترتدي بروفر أحمر مخطط مرمية وسط الهيشة في رشاح في أطفيح و يده مملوءة بكبشة بونبون سيما فقش محشي جوز الهند يعتقد أنها كانت فاسدة فتسببت في حالة إغماء بسيطة أدت إلى انه وقع في الرشاح و هو مش واخد باله 

مصدر مسئول

" خصم جااااامد أوي على أي شرز تريكو أو بوكليت... يلا دفي صدرك و استمتع ....بسرعة متضيعش الفرصة خد بروفر و احصل على كيس بونبون ووجبة كنتاكي 3 قطع بالاجنحة و شوب كبييييييييييير من عصير القصب أو السوبيا او التمر...يلا متفوتش الفرصة و اشتريلك شرزين

يا فرحتي بشعب مصر اللظيظ

قدر فشيق رمز البلوفر أن يكتسح انتخابات الثورة

و العجيب و الغريب ان الراجل ده أساسا اصلا مقتول قبل كده

اه و ربنا

انا سمعاه بودنيني دول بيقول لعلاء الاسواني في برنامج يسري فودة زمان

"لا يا علاء.....انا قتلت و اتقتلت"

طب قتل و عرفناها "قتل الثوار طبعا في معركة الجمل و غيرها و غيرها"

بس اتقتلت دي معناها ايه

هننتخب عفريت؟؟؟؟؟؟

حسبي الله و نعم الوكيل في كل مصري بيحب البونبون و بيلبس الشرز وبيدفي صدره

انا ناقشت...بالصور

الحمد الله يوم الاحد السابق 8/4 كانت مناقشة رسالة الماجستير اللى بقالي فيها 4 سنين

كان يوم رائع جدا جدا

و ربنا يسرها جدا جدا

و الدكاترة اشادوا بالرسالة جدا و قالوا انها من الرسايل الهامة في مجالها

اصلها بتنطبق على الوضع الحالي اللى احنا فيه

و مكنتش اقصد خالص لما عملت الموضوع و لا كنت اعرف انها هتنفع اليومين دول

و الحمد الله اصبح معي درجة الماجستير في العلوم السياسية

أوحش حاجة في اليوم ان محمد مكنش موجود لانه مسافر السعودية

احلى حاجة في اليوم أن حور بنتي كانت معايا و جنبي لحظة بلحظة

أكتر حاجة مستغرباها في اليوم

أن الكل بيسألنى هتسجلي امتى دكتوراه

محدش يعرف اني قررت خلاص اربي العيال و اعد في البيت اغسل و اطبخ و انام و بس

مش هعمل دراساااااااااااااااااااااااات تاني

تعببببببببببببببببببببببببببببببت

نفسي ابقه ست بيت من الدرجة الاولي

مش عوزة اقرا تاني

و لا اخرج مكتبات تاني

الكل بيقولي كلها كام شهر و تقدمي دكتوراه

بس ده مش هيحصل بوتاتاً

أو معرفش بقه

عنوان رسالتي

دور النخبة الحاكمة في التنمية والتحديث في دول العالم الثالث

( دراسة حالة كوريا الجنوبية )

من أهم النتائج اللى توصلت اليها من دراستي

1-يمكن القول انه من السهل على الضباط أن يقوموا بالاستيلاء على السلطة بينما يصعب عليهم أن يتنازلوا عنها، فالنخبة العسكرية عندما تصل إلى السلطة دائماً ما تعد بعودتها إلى ثكناتها العسكرية بعد فترة وجيزة، إلا أن الإنسحاب العسكري من الميدان السياسي يعد نادراً، فغالباً ما يحاول العسكريون إضفاء الطابع المدني تدريجياً على حكمهم وإظهار انفسهم فى ثياب الشرعية السياسية مستخدمين فى ذلك وسائل متعددة وصوراً مختلفة كأن يرتدي الضباط ثياباً مدنية، ويشاركون في الحملات الإنتخابية، ويشكلون الاحزاب السياسية، ويتبنون الاتجاهات الايدولوجية، ويتحالفون مع بعض القطاعات المدنية كالبيروقراطية التكنوقراط المدنيين ورجال الأعمال أو مختلف القوى والجماعات المنظمة في المجتمع، بيد ان صنع القرار يظل فى النهاية فى ايديهم.

2- أثبتت الدراسة الفرضية القائلة بأن النخبة العسكرية قد تنجح في إدارة النمو الاقتصادي نظراً لما تملكه من قدرات تنظيمية عالية وقدرة على الإنجاز بينما تفشل تلك النخبة في فهم تناقضات الحياة الاجتماعية والسياسية. حيث اهتم العسكريين في البداية بتحقيق النمو والتقدم الاقتصادي ووضعوا تحقيق المساواة والحفاظ على الحقوق والحريات السياسية في المرتبة الاخيرة. حيث رأوا ان تحقيق النمو الاقتصادي يعد أكثر أهمية من الحقوق السياسية والمدنية بل إن الاخيرة من شأنها ان تعوق التقدم والنمو الاقتصادي، وأنه ينبغي التضحية بالحقوق والحريات السياسية والمدنية في المدى القصير من أجل إحراز التقدم المرغوب فيه. فلقد رأى بارك مثلاً أنه ما إن يصبح المجتمع اكثر ثراءاً وتنظيماً واستقراراً ستظهر الحقوق والحريات السياسية تلقائياً. إلا انه لا يمكن إغفال إهتمامهم في الجانب الاجتماعي بالتعليم وبتطويره وخاصة في شقه الصناعي لكون التعليم أهم عامل من عوامل تحقيق التنمية الاقتصادية.

3- إن شكل النظام الذي يقيمه العسكريون يقوم على أساس رفض المعارضة وإقامة تحالفات مع الجهاز الإداري في الدولة ومع رجال الإعمال في ظل درجة عالية من مركزية السلطة.

4- إن النخبة المدنية هي القادرة على معالجة المشاكل الاجتماعية والسياسية، فضلاً عن معالجة المشاكل الاقتصادية التي يتعرض لها المجتمع.

حد فاكرني؟؟؟؟؟

امممممممممممممممممممم

أولاً سلام عليكم

ثانياً احب أسألكم

انتوا فاكرني اصلا؟

حد فاكرني؟

انا كنت زمان كده بكتب بوستات وحجات و كنت بزور ناس و ناس بتزورني و بالامارة اسمي مها زين

عموما سواء فاكرني او لا

أحب اسلم عليكم كلكم، بجد جو المدونات ده له وحشةو ياما عدت عليا مواقف بنت لذينا و كان بيبقه نفسي احكيها و مكنتش بلاقي وقت ادخل فيه النت او حتى ادوس على زورار الباور من حور

المهم

ديك النهار من 4 سنين كده كنت بحكي على رسالة الماجستير بتاعتي و اعد اقول للناس ادعولي انجح في التمهيدي وبعدين ادعولي ادخل سيمنار و يوافقوا على موضوعي و هلم جرجر

من مكاني هذا بقه و بعد يجي 4 سنين و كام شهر احب اقول اني خلاص إن شاء الله على أول شهر أربعة كده هناقش الرسالة الجملي بتاعتي بس لسة اليوم بالظبط متحددش

هتقولولي انتي قديمة اوي يا ست انتي كده ليه

هقولكم.....الدواز بقه لامؤخذة و تربية الاولاد

*****************************

ديك النهار بردو راكبة انا و مامة محمد زوجي و أخته مع سواق كده و الجدع بقه ما صدق لقا ناس يشكيلهم همه خاصة لما لقا عربية بوكس ماشية جنبنا

و اعد يحكيلنا بقه على الجرائم و الفظائع التي دارت من أول سرقة العربيات و خطف البنات لحد سرقة التموين بتاع الست الغلبانة اللى كانت واقفة بتحاسب التوكتوك وحطة التموين ع الارض جنبها وو لاد الحلال نتشوا شنطة التموين و جريوا

و كهربلنا الجو الجدع السواق ده بصراحة

و بيقول في وجود الشرطة مكنش في بلطجية

لقيتني بقول لاماني الشرطة كانت هي البلطجية

فمن كلامه بقه قدرت استنتج القصة و ما فيها

للأسف أكتشفت ان في مصر بالذات لازم حد يقوم فيها بدور البلطجي

لازمن و لابد

إما الشعب يبقه بلطجي و إما الشرطة تبقه بلطجية

انتوا بقه اختاروا مين يبقه بلطجي و ريحونا في ليلتنا الحلوة دي.

****************************************

حسة اني عاملة ذي الماكنة اللى عوزة شوية زيت يفكوها شوية

نفسي مسدودة عن الكتابة و نفسي اكتب بردو

عموما انا استغليت ان حور نايمة الان و قلت اكتب حتة كده

بس اوعدكم اني ارجع و اكتب ذي الاول

هتقولولي و احنا مالنا احنا يا ست انتي ما تكتبي و لا متكتبيش يعني

شيفانا اعدين مستنيين

هقولكم طب سلام بقه عشان بيني حور صحيت

ده بجد ده ولا كدة وكدة

اول امبارح رحت افصل ملابس محجبات حشمة بقه عند الخياطة بتاعتي في المطرية.

 كانت المفروض تفصلي حاجتين وتفصل لصحبتي حاجتين

اول الموضوع راحت بعتاني انا وصحبتي نجيب بكر خيط لون القماش بتاعنا

قلت محصلش حاجة مش هيضر..بعد شوية بعتتنا نجيبلها ابر مكن....قلت عادي بردو الست متعشمة فينا بردو وعيب نكسفها

حبة كمان و لقينا المكنة ضربت في وشها والنور قطع

اتاري سلك المكنة ساح وعمل قافلة...طب نعمل ايه نعمل ايه

"بقولكم ايه ...تعرفوا تعملوا السلك ده لحسن بخاف؟"

"طيب احنا مبنعرفش طيب نروح نجيبلك كهربائي طيب؟"

"و علي ايه يعني دي بسيطة بس انا بخاف يعني....انتوا ذي الشطار تمسكوا السلك توصلوه ببعض وتلزءوة بالعازل وخلاص"

"طيب القافلة دي يا تونت طيب نظامها ايه"

"اه صح ...يا دي النصيبة"

"بصي يا تونت انا اعرف ان في زرار في العداد بيترفع لما النور بيعمل قافلة...دليني انتي بس علي العداد وملكيش دعوة بينا بعدها ولو مت خلي بالك من الراجل والعيال"

وندور علي العداد في الضلمة وفي الشقة الضلمة الكئيبة اللى شكلها مسكونة دي مفيش...جبنا الموبايلات ونورنا لقينا العداد متشعلق في الحيطة ولا فيه لا زرار ولا حتي قرص

"يا تونت ده عداد فيرجن كام ده...ده من ايام زمان ولا ايه ...فين العلبة بتاعته طيب"

"طيب بصي منك ليها...خدوا الكرسي ده واقفوا عليه برة واتصرفوا مع السلوك والعلب اللى برة"

رحت قلت لاسماء صحبتي وانا عاملة نفسي طيبة ومسكينة "اسماء....انا خايفة المس السلوك لا اتكهرب...بقولك ايه اطلعي انتي علي الكرسي وانا همسكك والله...ولو اتكهربتي هزوءك بخشبة و هصوت"

وبالفعل طلعت اسماء صحبتي وقالتلي مش عارفة انهي زرار

انا بقه بعزم ما فيا"انتي ايه ملكيش لازمة كده....مكنتيش دخلتي صنايع قسم كهربا وريحتنيا من الهم ده"

الحمد الله نجحت اسماء في فك القفلة وهي بتمثل دور نبيل الحلفاوي في فيلم الطريق الى ايلات وهو بيبرد صباع العسلية  ولا معرفش ايه وعرقان وايده بتترعش

"اي خدمة يا تونت....مش عوزة حاجة تاني"

"اه بالله عليكي وطي تحت الماكنة شوفيلي المكوك وقع مني"

"مكوك ايه يا تانت...احنا فين يا حاجة في المطرية ولا في المطار...مكوك؟!!!"

"اي خدمة تانية يا تونت...مش عوزنا نجيبلك العيش ولا الخضار...مش عوزة طيب نسيئلك حاجة ولا ننفضلك الشقة عقبال ما تخلصي...مش عوزانا نولع في روحنا طيب...الا بعد مشوار الخدامة والكهربائي ده هتخدي بردو منا فلوس؟"

عمري ما شفت خياطة بتبعت زباينها يجيبوا الخيط و الابر...كان ناقص بجد نجيب معانا مكنة وخياطة واحنا رايحينلها

أشرف كوخة

النهاردة أخيراً ظهرت الحقيقة اللى كان لازم الكل يعرفها من زمان

الجدع اللى كان في القفص النهاردة مطلعش مبارك

و مبقولش كده لان الجدع المحامي قال كده

حاشا و ماشا

ابسلوتلي

انا عمري ما كنت ظالمة

و لا شرانية

انا مقولتش اللى قولته ده الا من الكبت الداخلي من اللى شوفته

ايون

و اكيد كلكم شفتوه

الجدع ابو شعر مضروب بكيسين حنة جلوري ده اللى كان في القفص طلع اشرف كوخة

ايوووووووووووووووون

كوخة

و الصورة خير دليل على الكوخة

و لو سوزان كانت معاهم كانت ضربته على ايده و قالتله كوخة يا اشرف

و على فكرة بردو و للعلم

جمال مش هو جمال و علاء مش هو علاء

لأ اعكسوا بقه

و دخلوا ايدكم خلف خلاف

علاء طلع هو جمال و جمال طلع هو علاء

و خليها في سركوا

يا حلولي يا رمضان يا حلولي

(البوست ده كنت نشراه قبل رمضان اللى فات...اكيد فكرينه....حبيت بس افكركم بيه وبجو رمضان)
واقولكم كل سنة وانتوا طيبين

*******************************
الله يا ولاد رمضان الجميل الحلو قرب اهه
شامين الريحة بقه ولا ايه؟
شمين ريحتة ونسمة دفا كده حلوة بتهف علينا لما نسمع تواشيح نصر الدين طوبار
ولا صوت الاذان بتاع محمد رفعت

طب بالله عليكم
لأ بالله عليكم
مش ريحة الجوافة كده مع شكل البلح الاحمر كده
ولا البلح الاسود المستوي واحنا بنحمره مع سمنة بلدى مش بيفكركم بأيام المدارس

طب فاكرين طيب اول يوم مدارس بالشنط والجزم الجديدة
ونرجع البيت بعد يوم طويل ومتعب
واحنا شايلين معانا كشاكيل فاضية لسة مكتبناش فيها اي حاجة غير انواع الكشاكيل ولون الجلاد
ونرجع ندخل البيت نقلع الجزمة نلاقي صوابع رجلنا وجعانا وخاصة صباعنا الكبير من نشفان الجزمة الجديدة
نغيرونترمي علي السرير
طب الجو ده مش بيكون بعديه رمضان

طب اهو رمضان بقه سبق المدارس اهه

اول ما الرؤية تبدا في التلفزيون المصري الارضي
نروح كلنا مشغلينها
برغم اننا بنبقه عارفين رمضان امتي
بس هو لازم كده
نسمع مفتي الديار
وقال نعمل روحنا مش عارفين بقه ونستني كده واحنا حاطين ايدنا علي قلبنا
وقال ايه
يروح الشيخ المفتى ممهد للخبر بان مش عرفة يوم ايه متمم لشعبان
وهنا
يبقه معناها ان رمضان بكرة
تحس ان الدنيا بقت ريحتها رمضان خلاص بقه
وتحس ان الشياطين اتسلسلت كده والجو نضف

تروح لابس شبشبك كده ونازل علي مطعم الفول
وسبحان الله
تلاقي نفسك مش لوحدك
لا
دي مصر كلها جاية تشتري السحور
و الراجل بتاع الفول مجهز قدر الفول والعيش والحركات
وتروح محود جايب الزبادي والبيض
لانه ديما بيكون اول يوم سحور هو اليوم اللى بنتوصي بيه
بعد كده كتير بننسي اصلا نتسحر

طبعا بدون جدال كلنا اصلا سبق ونزلنا اشترينا الياميش والكلام ده
بس الشوارع بتبقه زحمة
والناس ماشية فرحانة وكانهم اطفال
الكل بيضحك بطفولة وفرحة
تخيلوا معايا كدة حتة ذيالحسين ولا الغورية ولا السيدة والجو اللى فيها ساعة الرؤية!


تلاقي مطاعم الفول والطعمية ريحتها مفحفحة في الجو
وتلاقى العيال مسكوا فوانيس بشمع كده ونازلين يتغندروا
وريحة الشمع السيحة ملية الدنيا
واللى شمعته تطفى بقه واللى يسرق شمعه صحبه وجو صراحة كله سعادة ومرح
حتي الفوانيس اللى بتقول بابا اوبح
كله شغال وحلو بردو(خلي الصيني ياكل عيش مفيش مشاكل)
وبتاع الفوانيس

فارش فوانيسه

والزينة بتلعلط في الشوارع ما بين الحارات الضيقة
والفوانيس الصفيح انوارها بتلالي

بتحب تسهر؟
مينفعش هتنام عشان السحور
يلا كله ينام وهنصحي نتسحر

بعد شوية نوم قليلة يجي المسحراتي

نسمع صوته من بعيد بيقرب
اصحي يا نايم يا نايم اصحي
نجري علي البلكونات ذي الاطفالل
مع اننا عارفين الراجل المسحراتي
وعارفين اننا كبار
بس لأ
عوزين نبص عليه ونفرح و قلبنا ينغوزنا من كتر السعادة
نزهق بقه لما صوته يبعد وندخل نتسحر
وطبعا مش هننسي الفول ابو سلطة
حاجة تانية
علامة من علامات رمضان
واللى مجربش يجرب
نتسحر
وندخل ندلق علي السرير
وخخخخخخخخخخخخخخخخخخخ

الصبح يجي
واللى هيفطر في بيته يهندس فطارة ويفكر في الوليمة
واللى هيفطر عند تيتا او برة يعد بقه يقرا قرأن
ولا يعمل حاجة حلوة ياخدها معاه للي هيزورهم
طب عوزين بقه كنافة وقطايف
ننزل نشتريهم
بس يا ريت تكون كنافة بلدي عشان نشوف الراجل وهو بيعملها
مع ان الكنافة الالي احلي

طب القطايف بقه
يا بنت الايه يا قطايف



مش هننسي العرقسوس بقه والتمر والحركات
وكل البياعين وبتوع العصير مرصصين اكياس
التمر والعرقسوس والسوبيا كده علي تربيزات
قوم ايه
نسينا حاجة مهمة موت
المخلل


ده اهم حاجة
وخاصة المخلل ابو مية حمرا ده
يا حلاوتك يا رمضان
طيب المغرب قرب اهه
يلا بقه عوزين نفطر
طب احنا ممكن نتسلي ونتفرج على حلقات بوجي وطمطم القديمة


ولا قصص الانبياء
اهه
المغرب قرب
والتواشيح شغالة بصوت نصر الدين طوبار
يلا يا جماعة حضروا السفرة
وصبوا العصير يلا
وجهزوا 3 بلحات
وهوب المدفع ضرب
نروح احنا مفرقعينن البومب الل محضرينه جنبنا من الصبح
ونرمي ودننا مع اذان المسجد او الراديو
نسمع كده صوت محمد رفعت وهو منغبش ومش صافى اصله تسجيل قديم بقه
نحس بالراحة والسكينة ونشرب لحد ما بطننا توجعنا
ونبص للاكل ونشبع
نعمل الواجب على السريع
واحنا بنتفرج علي ابو كف رقيق وصغير بكار
او النينجا زمان
ونقوم نصلي المغرب ببطء (فيه طبعا ناس بتصلي قبل الانتخة وبعد الاذان علطول ربنا يزيدهم)
وبعد كده نلبس ونجري علي التراويح
وبرغم ان الشيخ بيطول اوي
بس بنحس اننا عملنا حاجة كبيرة وجميلة
احنا بنبقه طيبين اوي
وعندنا سكينة وراحة كبيرة
ونرجع بقه و ندخل علي الحلو
خلاص
مفيش حل
احنا هندخل ننام بقه ونصحي علي السحور
ونشوفكم بكرة
**********
بالله عليكم رمضان ده مش جميل
بذمتكم في رمضان احلي من رمضانا
هه
ولا وجع بطن بسبب المدارس وخوف من التسميع في الحصة ذي وجع بطننا بمدارسنا
هه
ولا جوافة وبلح ماسخ ذي بتاعنا
لا وربنا
الناس اللى هيقولوا رمضان اتغير
هقولهم ماشي معاكم
بس رمضان لسة حلو بردوا
بطلوا غتاتة وعيشوه السنة دي يا عالم نلحقه السنة الجاية ولا ايه

صور النيش و السجادة و بالمرة الفانوس

 بوست قديمممممممممممم يعاد نشره بمناسبة رمضان

سلام عليكم ورحمة الله وبركاته
بعد محاولات مني لنشر صور الزينة و الفانوس قبل ما نعلقهم
وبعد فقدان الأمل في نشرها
روحت ازور والدة اسماء صاحبتي في المطرية النهاردة(أرجو الدعاء لها بالشفاء)

اخدت الصور علي الام بي فور وضيفتها عندها للبوست
و لكن للأسف لقيت ان نص الصور اصلا اساسا مش طالع فيها صور الفانوس ولا الزينة علي اد ما طالع فيها صور الشقة و النيش و السجادة المركونة عند الشباك بعيييييييييييد ذي ما حضراتكم تاخدولي بالكم
فلو بصيتو حضراتكم علي ايدكم الشمال (لو انتم حاجزين في الدرجة الترسو) هتلاقو النيش
ولو بصيتو علي ايدكم اليمين (لو حاجزين بردو في الدرجة الترسو) هتلاقوا النيش
يعني النيش وراكوا وراكوا
و طبعا النيش صمصم لا يطلع في كل صورة وده لان سيادتكم الفانوس كان مرزي في الموضع ده جنب الفيشة اللى ورا تربيزة السفرا و جنب البلكونة اللى هيتعلق فيها سيادتكم
ومحدش يقولي مصورتهوش ليه في الحمام او في المطبخ (هقولكم أن السبب الوحيد بس ان مفيش فيشة و مفيش نيش)
الصور دي ممكن تكون دعاية للناس اللى عاوزين يأجرو نيش أو سجادة
وممكن تكون في نفس ذات الوقت صور لفانوس عسول وزينة عسولة انا اللى عملتها
هنلاحظ بردو في الصور ان الزينة الورق اللى حنستكم بيها اللى عملتها من كتاب الانجليزي بكل غل مش موجودة
وده لان الصور اللى فيها الزينة الورق لا تصلح بقه خالص للنشر لانها طلعت داخلة علي المطبخ وحجرة الجلوس و ممكن تكون خرمت علي الحمام وانا مش واخدة بالي فبلاش فضايح كفاية عليكم السجادة و النيش

وكنت مصورالكم صورة الفانوس ابو شمعة المتدشدش و صورة فانوس اصغر منه بمثابة ابنه الصغير وبردو بشمعة...وصورة لمبة بجاز صغيرة للزينة عشان تفرحوا برمضان
بس معرفتش انزلهم عند اسماء لانهم كانوا علي الموبايل
يلا اديكو عرفتوا البيت اهه بقه
هستناكم بكرة بقه علي الفطار
(اصلي مش هكون في البيت بكرة....هفطر عند تيتا ....هي هي هي)
***************************************************


وانا جاية بعد المغرب علطول من فوق الدائري شفت حادثة علي الطريق
عربية ملاكي متكسرة وواحد واقع في الارض و الناس حواليه
معرفش متوفي ولا لا
بس اول ما شفته ضربت كف علي كف بأيدي وقلت
"لا حول ولا قوة الا بالله ...اهو بردو لحق رمضان" وسألت ربنا يكون عايش...وعيني دمعت لما تخيلت منظر اهله وحد بيتصل بيهم و بيقولهم الخبر في اول ليلة لرمضان.
ادعوا الله يكون بخير و تكون الحادثة حاجة تغير حياته في رمضان وتخليه يقرب من ربنا اوي ويعرف ان الموت قريب اوي
و ايه رأيكم في المناجاه اللى انا حطاها بتاعت النقشبندي؟
ان شاء الله هبقه انزل بوست واحد بس مهم فى رمضان وخلاص
ما انا اصلي لازم ارحم البشرية بقه علي الاقل في رمضان

شوفوا بقه انا عملت ايه لرمضان العسول

بوست قديم يعاد نشره بمناسبة رمضان
اذيكم يا ناس يلي كل سنة وانتوا طيبين
انا كنت محضرة ليكم مفاجاة جميلة
قال ايه
امبارح لقيت نفسي عوزة افرح كده برمضان واحس بيه
رحت جبت اختي الصغيرة
ورحت قررت اعمل زينة من بتاعت زمان
عارفين انهي
الزينة اللى بورق الكراريس و الكتب بتاعت ايام زمان دي
كنت نفسي افتكر اوي ايام الزينة التعبانة دي
والزينة الصفيح القديمة اللى كانت بتبقه دواير و تعد تشخلل لما الهوا يضرب فيها وتعد تضوي علي اخر النهار كده
رحت جبت كتاب الانجليزي بتاعها وبكل غل رحنا اعدنا نقطعه شرايح ونعمله حلقات ونلزقها بالنشا ونعمل منه ذي سلسلة كده (زينة اجنبية بقه هقول ايه)
و بورق الكراريس نعمل الزينة بتاعت زمان اللى بتبقه مخرمة من النص خرمين ومشرشبة من تحت كده
وقال ايه رحت مديت خيوط كده ذي احبال الغسيل في كل حتة في الشقة واعدت انا وهي نلزق بقه واحنا وخدانا الحماسة اوي
تقولوش بنشق توشكى يا جدع...ده هم ايه ده
واصلا اساسا انا رحت مشغلة تواشيح نصر الدين طوبار ومشغلة النقشبندي وتوشيحة يا رب ان عظمت ذنوبي كثرة فقلد علمت بأن عفوك اعظم عشان نفرح و نحس برمضان كده
وعليت بردو الصوت عشان الناس تفرح وتزقطط و يعرفوا اني بعمل زينة (متخافيش يا نورهاتي مش بعمل قلق للناس...لأن اصلا شارعنا هادي ومفهوش اصلا ناس)
وبعد بقه ما خلصت الزينة رحت شحنت الكاميرا وصورتلكم الزينة و الفانوس اللى مكناش لسة علقناهم
و قال ايه قلت هنشر الصور وافرحكم بقه
الاقي قال ايه
جهازي فيه فيرس بيخلي اي صورة متفتحش و كل لما احب اضيف صورة للبوست صفحة النت تهنج تماما
حتى التاسك مانجر مش بيرضا يفتح
و الماسنجر لو بعت منه سيند فايل او جيت اغير الصورة ولا افتح الفوتو شير الاقيه يهنج كده ويقل ادبه
يكونش اوتو ران ده يا جماعة....ولاد الحلال يشوفولي صرفة بسرعة

المهم خليت ندي اختي بقه تعلق الزينة مع جارتنا اللى اودامنا وانا بساعدهم من ورا الشباك
ما انتوا عارفين اصلا ان الشعب كله ممكن يكون واقف تحت الشباك عشان يلمحني يعني
مهمة بقه....هقول ايه
بعدين طلعت الفانوس بتاعي من النيش عشان افرح بيه شوية
عارفين انهي فانوس
عارفين الفانوس ابو شمعة الصفيح
اهو هو ده
كنت جيباه من حوالي عشر سنين من راجل كده عجوز اوي عنده محل بيعمل فيه الفوانيس دي من صفيح علب السمنة وأزاز الوان كده غريب و الفانوس كان ب 2 جنية ونص بيني ولا تلاتة
الفانوس انا محافظة عليه لاني اصلا مش بقتنع غير بالفانوس ابو شمعة ده واصلا الفانوس بصفيحه التعبان و إزازه الغريب ده مش هعرف اجيب ذيه تاني (هو الفانوس اه أزازة منه اتخلعت، والوش بتاعه من فوق اتخلع، بس يجي منه بردو)
اصلي بحب الحجات القديمة التعبانة البايظة المتلحمة الخربانة دي
افتكرت بردو لما كنت ببقه في البلد وعوزة فانوس ومش معايا
كنا بنجيب علبة سمنة فاضية
واروح منيماها علي جنباها ومولعة شمعة ولزقاها جوة العلبة وامشي وانا مصدرة بؤ العلبة للناس كده
قال يعني فانوس يعني
وببقه شكل الراجل بتاع الفنارة اللى بينور للسفن ده
و مفيش ثواني العلبة تسخن في ايدي واروح رمياها في دهية عشان بتلسع منها

و بفتكر بردو لما كنا زمان من يجي مثلا 15 سنة أو اكتر
لما انا والعيال اصحابي نقف في مدخل البيت المضلم وكلنا معانا فوانيس بشمع ونولع الشمع و نحط الفوانيس في الارض ونلف حوالينها وقال نقول حلو يا حلو رمضان كريم يا حلو
ده ايه ده ان شاء الله
هو ايه اللى بنلف يعني حواليها
كنا عوزين ايه يعني....معرفش انا
و كل شوية شمعة واحد فينا تتطفي ونخرج شمعتنا عشان نولعهاله او نولع فيه
وريحة الشمع السايح بقه و الحركات
وفاكرة اوي لما بدات الفوانيس امو لمبة تظهر
واول ما ظهرت كانت اشكالها غريب كده ذي البطيخة ومعمولة من بلاستيك ردىء وتعبان راخر ولونه لموني او برتقاني و الوان مايعة وفاتحة كده
وقال جواه لمبة صغيرة تعبانة مولة و ديما تتحرق
حتي الزرار اللى كنا بنشغله منه كان حتة حديدة كده طالعة من الجنب ونجيبها يمين او شمال
هو ايه ده يا خواتشي
اللى يغيظك دلوقتي اني الاقي فانوس عبارة عن راجل ألى، ولا عروسة، ولا ميكي ماوس
و تلاقي الجدع الفانوس من دول بيقولك بابا اوبح
ولا بيقولك مراسيل مراسيل واللسة

هم ايه ده بجد
العالم دي عوزين مننا ايه
ناس عجيبة و اوبح علي الاخر

كفاية عليكوا كده لحسن هعيط انا
انا مليش دعوة انا عوزة ارجع 15 سنة ورا
امشوا بقه
و علي فكرة
انا مش همشي في رمضان انا
انا اعدالكم
لحسن حد أوبح يفتكرني همشي ولا حاجة

أم جلمبو

السلام عليكم و رحمة الله وبركاته

زمان كان اسمي مها زين

و ده عادي جدا جدا

بس اللى مش عادي بقه و غريب و مريب اني ان شاء الله عز وجل اسمي هيتغير على يوم 9 الشهر الجاي اللى هو شهر اربعة ان شاء الله

هتقولولي أذاي و كده يا ست مها

هقولكم محدش بقه يقولي يا ست مها انا اسمي ان شاء الله الجديد هيبقه

هيبقه

هيبقه

هيبقه

ست "أم حــــــــــــــــــــــــــــــــــــــــــــــــــور"

أيون هبقة مامة حور الامورة العسولة ان شاء الله

حد هيقولي اشمعنة يعني حور

مسمتهاش ليه أم تفيدة او أم حميدة أو حتى أمو جلمبو

هقولكم ملكوش دعوة اصلا اساساً

النظرية اني كنت هسميها مها على اسمي نزولاً على رغبة باباها

لكني معرفش ليه زهقت من الأسم كده إذ فجأة

و اسم حور ده اساساً كان في بالي من قبل الدواز

فقررنا حور بقه و محدش يزهقني لو سمحت

عشان كده ارجو من كل الناس انهم يدعولي بظهر الغيب اني اقوم بالسلامة ان شاء الله

و من يوم تسعة اربعة بقه الدعا يستمر وبلا توقف

خايفة اوي اوي وعمالة اتخيل تخيلات مريبة و اعيط

ارجو من الله اني اكون بخير انا وبنتي ويرزقني الذرية الصالحة المعافاة السوية

و يرزق جميع بنات المسلمين و شباب المسلمين الزواج الصالح و الذرية الصالحة

لو جيت بالسلامة يبقه الحمد لله

و لو حصل اي شىء بقه ارجو من الجميع الدعاء

و ارجو من اي حد زعلان مني يسامحني

هتقولولي ايه فيلم دعاء الكراوان ده

هقولكم اهو هو كده بقه

دعواتكم يا جماعة و لو لا قدر الله حصل اي سوء ابقوا ظبتوني بوستات بقه و كده

يلا اراكم على خير

ريش الوزة

كانت الدنيا بخير و كانت الحياة مشية كويس اوي

لحد بعد عيد الأضحي لما كنت ماشية عند حماتي و لمحت خير الله ما اجعله خير شوايات فحم صاج برجول و أسياخ عند محل غريب كده

رحت شاورت لمحمد زوجي عليه و قلتله أنا عوزة منده يا عم بقه

قالي حاضر هجيبلك منهم و أحنا مروحين

و بالفعل حجزنا واحدة متوسطة بأربع أسياخ

و خلصنا مشاويرنا و كنا هنروح بليل بقه

فوتنا على الجدع الغريب عشان نخدها لقينا الراجل قاعد لابس جلابية كده و طاقية واودامه أنجر لحمة مخبية تحت التربيزة الصغيرة اللى اودامه و حاطط اودامه الرز و العيش و شغال الله ينور

يدب ايده تحت التربيزة يطلع بفخدة لحمة و يسف شوية رز وراها و هلم جرجر

محمد قاله فين يا حج الشواية قاله و بوءه مليان لحمة و بيوقع

"خش خش، خد اللى جوه دي و خدلها أربع أسياخ من عندك"

محمد دخل يخبط في الشوايات و في الاسياخ و جابها من تحت الانقاض و لم يعترض بوتاتا

قلنا بقه نشتري فحم عشان نستخدمها فعليا لما نروح خاصة اننا كنا متحمسين أوي اننا نعيش مغامرة الشوي في البلكونة وكده

طيب يا حج عوزين كيلو فحم طيب

"خد الكيس ده و عبيلك كيلو فحم"

محمد بصلي كده و صعب عليه نفسه أوى

يعني المفروض انه هو راخر يدب ايده في شوال الفحم و يعبي كيلو فحم و بعد كده يروح بكل بساطة ماسح ايده في كم القميص و مكمل في البنطلون و نتوكل علي الله

"جرى ايه يا حج، قاعد انت كده و مشغلني من أول ما جيت، ما تدينا انت طيب"

"بس خد خد بس و عبي دي فحماية ذي العسل يئيد و يشعلل و ينور في الضلمة و يقول أميجو"

"طب خلاص يا حاج أنا اسف مش عاوز فحم... خلاص هكسر انا رجول الأنتريه و أبقه أشوي عليها اللحمة و لا تتعب حالك"

"طب أقوم طب أجيبلك"

و بوءه مليان لحمة و الرز بيتطاير منه

"هاه اقوم"

" لا يا حاج كل انت و متشغلش بالك، بس شوفلنا كيس بس للشوايه دي"

"لا والله مفيش أكياس"

محمد بقه كان خلاص وصل للدرجة القصوى و كان لحظة واحدة و يقوله مش عوزين شوايات يا حاج و لا فحم و لا لحمة من اللى في الأنجر اللى انتي مخبيها تحت التربيزة دي و أحنا لمحينها

بس المشكلة اني كنت مستعدة اعمل اي حاجة في سبيل اني اروح زايد و معايا الشواية

"خلاص يا محمد انا هفضيلك شنطة من اللى معايا و نحطها"

"يا بنتي متنفعش الشنط دي الشواية هتقطعها"

"بس نحاول بس دي شنطة واسعة"

و بالفعل في محاولات مننا اننا ندخل الشواية في الشنطة كان الحج بقه قاعد متابع من بعيد الموقف العاطشفي ده و ما كان عليه الا انه يدينا التوجيهات من فوق المنصة

"لا بص...متحطش الرجول لتحت حطها لفوق"

" يا عم لا خلي بالك من الاسياخ صدرها سنها لبره"

"خش يمين....خش شمال...هوبة لفوق...هوبة لتحت"

و ما كان مني و انا بحاول ادخل الشواية انا و محمد و ايدنا عماله تتجرح و تتخربش و خلاص الدم ضرب في نفوخنا الا اني في محاولة مني لكبت غيظي و امتصاص غيظ محمد اقوله

" ركز انت يا حاج في الأكل الله يكرمك و سيبنا أحنا خالص دوقت"

لقيت محمد فطسان من الضحك وعينه دمعت و إذ بيا انا كمان أصاب بنوبة الضحك الهيستيري اللى لو نم إنما ينم علي ان الرادل ده هياكل ضرب النهاردة لو طول شوية

كل ضحكنا ده و الحاج قاعد بردو بيتعشا و بيرمله عضمه بحتتين لحمة ضاني من اللى قلبكم يحبهم و ناسي الدنيا

خلاص بقه قررنا ناخد الشواية و نهاجر من البلد دي

إذ بيه بقه في عرض مغري مغري

"هاه مش عوزين هواية تهووا بيها علي الفحم"

و إذ بالهوايا عبارة عن أولاحة مرشوق فيها يجي تلت اربع ريشات من وزة عراقي منحولة و يقولك بسبعة جنية الهواية

"لا خليها يا حاج احنا هنهوي بكرتونة أحنا ، اصل ريش الوز مبيهويش بضمير"

فجأة لقيت راجل عجيب جدا سبحان الله

لابس جلابية بيضة مفحمة و عليها قفطان مفحم و شعره منكوش و دقنه طويلة ذي الدراويش اللى بيبقوا لابسين سبح كتير في رقبتهم

الراجل كان مفحم أوى من كل حتة و داخل علينا

محمد قلق صراحة و عاوز يقولوا ايه يا حاج انت هتضرب ولا ايه

الراجل فعلا شكله مختل عقليا فقلنا نوسعله يشوف سكته جوة المحل وكنت بفكر نعبيله كيس فحم حلو كده من اللى بيئيد ويطفي و يشعلل

لقينا الراجل بقه طلع طبيعي جدا و عاقل و بيقول لبتاع الشوايات في حوار بينهم كده مكنتش فهمة منه غير ان الجلابية المهببة اللى كان لابسها بمية جنية

اذاي الله اعلم؟؟؟؟

و الحمد لله مشينا و محمد كان خلاص بدأ يدخل في مرحلة التفكير في انه يرمي الشواية تحت اي كوبري

وخلاص كده

اصلا اساسا

سلام عليكم ورحمة الله وبركاته

طبعا انا مدركة ان في ناس قلبها هيقف حالا بالا من الانبساط و الزمهرير و الانشباط
لاني طبعا ظهرت تاني إلى عالم النتات و الحجات العجيبة دي اللى اسمها المدونات
و طبعاً مش هبرر اختفائي المفاجىء و لا هحاول اوكل محامي لاني انا خلاص
مبقتش مها بتاعت زمان اصلا اساسا
انا خلاص بقه بقيت مدام محمد مجدي وورايا مسؤليات عظيمة و جليلة و سميرة و حميدة وتفيدة بردو و ميضرش
فضلا عن و بالاضافة إلى اني انا اصلا اساسا معنديش نت

لا يفل الحديد الا الحديد (عز يا وز)

*************************************************

البوست ده كنت كتباه زمان اول ما عملت المدنة واول ما بدأت اكتب بالعامية واكتب مواضيع ساخرة

وبما انى لقيته اختفي من علي المدونة...الله اعلم اتسرق بقه ولا ساح ولا ايه

فانا بحثت عنه لقيته عندي في ميل قديم ورحت نشراه

لانه بجد من اكتر البوستات اللى بحبها وبيفكرني بذكريات رائعة

;">************************************************

ديك النهار لقيت اخويا الي فى التوجيهية (الثانوي يعني ) داخل علي وفي ايده شريط برشام أصفر وبرشامتين فرط

فزيت من مكاني كده وجريت عليه وانا مخضوضة

"مالك يا حبيبي ...ايه الي صابك... عملوا فيك ايه...دا انا اخرب بيوتهم...انت تعبان ولا مرضان ولا ايه الي حصلك"
يبصلي بتتنيحه كده و يقولي ببرود واتامة كده

"لأ"

رقعت بالصوت الحيانى

"يا خراشتييييييييي...أخويا بقه مدمن يا جدعان...بقيت مدمن يا عمر؟....بتشم برشام يا عمر...مين هيرضى يجوزني دلوقتي...منك لله....نقصك ايه هه؟...مترد"
بصلي بردو بنفس التتنيحة والبرود ..........................."لأ".

انا بردو وانا بتنطط في مكاني وبتشال واتنكت

"يا لهوى يا عمريا لهوى...اهو ده الي مش ممكن ابدا...ولا افكر فيه ابدا....شغال تاجر مخدرات...بتبيع وتوزع السم الهاري علي شوباب المدارس...بكام يا عمر البرشامة...قولي بتبيعها بكام...ايه الي جبرك علي ده...بقيت بياع مزاج...حوشت كام لحد دلوقت...متنطق..مترد".

هو بقه بعد ما زهق مني ..."يا بنتي بطلي وش بقه وقلبة دماغ.....دى وجبة".
وجبة...وجبة ايه يا اخويا!...أذاي يعني؟

عرفت منه القصة وما فيها...واديني اهه بعرفكم بالي فيها.

ذي ما كلنا عارفين وده عادي جدا انهم كانوا(كانوا ...على وزن زمان يعني) بيدوا الطلبة الي في المدارس الحكومى حاجة كده اسمها وجبة(مم يعني)..طيب كويس جدا عشان الانيميا والهزال والإسهال والكلام ده...الوجبة دي بتتدرج حسب السن...أذاي.
يعني تبدا الاول باللبن المعلب واللى ديما بتكون مدة صلاحيته منتهية...وبعد ما يفرقوه يدخل المدرس من دول علي العيال في الفصل وبعلو صوته ومحدش سمعه من العيال

"أوعوا يا عيال حد فيكم يشرب اللبن ده لانه مسمم أرموه يا عيال في الشارع لما تخرجوا"

بس علي مين...ده هيتشرب هيتشرب...وربنا حتي لو فيه ماس ازرق هيتشرب

قال يعني هما بعد لما فرقوه خلاص وجروا ريق العيال عليه جالهم الإخبارية العاجلة(لا تشرب اللبن اللبن فيه سم قاتل)

قوم ايه بقه المدرس يطير كده بعيد عنكم ذي سوبر مان...ويجري بالتصوير البطىء ويقع علي بوزه وهو بيجري ويقوم ويكمل جري

ويروح شادد العلبة من علي بوء الواد بعد ما خلاص هتكون القطرة بتستقر علي لسانه خلاص (ويروح شاربها هو)

ويوقولوا لأ يا حبيبي بلاش اللبن ده اشرب جهينة اضمن....بلا غلب.
بعد ما العيال تكبر شوية تتحول الوجبة بقدرة قادر وتبقه كيس بسكوت ناشف ومأدد ومكتوب عليه "غير مصرح إلا لطلاب المدارس"

ما احنا عارفين انه مينفعش غير لطلاب المدارس بس...هو مين مهفوف في جنجنته هيروح يشتري كيس ذي ده عشان ياكله ولا يسقسق بيه في الشاي حتى...بلا غلب.
الواد من دول بقه شحط كبير كده...ويعني مياكلش معاه جو البسكوت واللبن المجبن ده...تروح الوجبه تتمحور كده حوالين نفسها وتبقه مثلث جبنة كاوشت...وبيضه جواها جنين كتكوت مسلوق...وعلبة مربي جواها نمل ورجول صراصير...وكوزين فينو مبرولين كده وملهومش وش من أفا...ايوه كده هو ده البروتين...تمام.... برده عشان مراحل النمو وكده...العيال بردو في جو مراهقة ولازملهم غذا.....وانا اقول العيال نموها بيقف ليه ...بلا غلب.
كل الي قلته صح مفهوش حاجة وكلنا عرفينه...الي احنا مش عرفينه بقه ولسة جديد...هو ان العيال في الثانوي خلاص بقم رجاله...غجر...وحوش...وشهم بقه ملحوس من شناباتهم الى ذي الجرب دي الي بتطلع في وشوشهم....ومش لاقين حاجة تسد بؤهم...ولا بسكوت ولا لبن ولا غلب نافع معاهم....يبقه يطفحوا ايه دول...ونكفيهم اكل منين...يعني البلد تدين عشان تطفحهم
صراحة القرار الي تم التوصل اليه قرار حكيم... وبيجيب من الاخر
كل عيل هياخد في السنة 12 حباية حديد

ايوه حديد

كل عيل يروح للأستاذ...يمضى جنب اسمه...يمد ايده...الاستاذ يحطلوا شريط البورشام وبرشامتين فرط...ويكتبله الروشته(قصدي يديله الوصفه)....هتاخد يا حبيبي كل اسبوع برشامة وتقضيها بقية الاسبوع جوع....علي لحم بطنك...كله من ده بعد كده...مفيش الا الحديد...خدوا بفلوسكوا كلها حديد...والي هيفتح حنكه هياخد علي دماغة بالحديد...بكره هتبقه صحتكوا حديد...والي يجوع قبل ما يخلص الاسبوع هو حر...احنا سلمناكوا نصيبكوا بتاع السنة من الحديد وانتوا احرار...تاخدوه علي سنة ...اسبوع...يومين...ساعتين...انتوا احرار ...تسيحوه...ترفعوا بيه العمدان....بكره تصدوا ونخلص منكم...ولا تلزقوا في اي مغناطيس ونرتاح بقه....ولا يا عمر...انا عرفك بتلعب حديد....يعني مش ناقص حديد...لو تحب تعمل خير شوف عيل سفيف كده واتبرعله بشوية الحديد بتوعك دول.

يا مرك يا مصر

هتقولولي ايه الى مزعلك اوي كده وحرقكك كده ومخليكي تكلي في نفسك...ايه عوزة شوية حديد؟

هقولكوا ابدا...خالص...ابسلوتلي

انا بس صعبان علي مصر....مصر بتبعزء فلوسها يا رجاله....لازم نحجر عليها بقه...كفاية تبذير ...انتوا عرفين طن الحديد وصل كام....حديد عز وصل 8000 جنية....يعني كان بلاها الحديد وكانوا خدوا برشام جبس احسن ولا ألمونيا...اهو كنا وفرنا قرشين حلوين عشان نديهم هدية لمنتخب نادي قويسنا السبع ولا نادي صفط اللبن لما يجبولنا كاس الامم المهلبية

والي يغيظك يا جدع...انى كل اما اروح في حتة في الشقة الاقي برشامة صفرا وقعة علي جنب

يعني انا بحكيلكم دلوقتي وعلي مد البصر قدامي برشامة صفرا كده وقعة في البلكونة

الواد اخويا ده مش وش نعمة.....ومبذر...هو مش اخويا أه...بس عاوز القتل......اه وربنا.

ياااااااااااااااااااااااااااااااااااااه وحشتينا يا بنت الايه

انا عارفة اني وحشتكم بشدة بشدةوغيابي ده تسبب في كوارث مريعة مريعة
بس هي دي سنة الحياة
ندوز و نعتزل الفن
هذا هو اليوم ال 23 او ال 24 أو ال25 من زواجي....مش فاكرة بالظبط والله
يعني لسة عروسة طالعة من الفرن حالا
انا يمكن مش هقدر اكلم كتير كتير كتير
بس كل اللى اقدر اقوله اني بجد وحشتني مدونتي شوية
ووحشني اني اكتب مغامراتي شوية
خاصة بقه مغامرات الشيخ زايد و الهايبر اللى فيه الحجرين القلم ب 12 جنية و بارطمان اللبان ب 22 جنية و حزمة البقدونس الورور ب جنية و 90 قرش و كوز الفينو ب 4 جنية
ومش هقدر افسر اكتر من كده لاني مش عوزة افتكر
ارجوكم محدش يفكرني بليز
اراكم علي خير
و كل سنة وانتوا طيبين
واول ما اقدر اكتب بقه و احكيلكم هحكي
سبوني دوقت عشان اروح احضر لسبعي الفطار
سلام عليكم
اه نسيت اقول ان كل المدونيني اللى اعرفهم وحشوني جدا جدا
مش عوزة اقول اسماء عشان لو قلت مش هلحف حتى اعمل شانجوشت فول بالصلصة
سلامات

رسالة

امي
انا عارفة انى تقلت عليكي في شكوايا اليومين دول
بس اصلي انا اعمل ايه
ملييش غيرك
اصل انا مخنوقة اوي يا امي
مخنوقة و حسة بوحدة رهيبة
محدش معايا
يمكن يكون حواليا ناس كتير
بس تعبانة اوي
انا هحكيلك و عارفة انك انتي الوحيدة اللى هتسمعيني
مهو محدش غيرك هيستحمل شكوايا
انا بحاول اقرب من الناس عشان يشغلوني عن احساسي بالوحدة
بس اصلي اول ما بدخل البيت بلاقي نفسي بجري علي اودتك
بنسا و ببقه عوزة اندهلك
فكراكي جوة
فبحزن اوي يا امي لما افتكر انك مش هنا
البيت بارد و كئيب اوي يا امي
مفهوش روح خالص
حتي بابا مش قادرة اخد عليه ذيك خالص
انا علي فكرة بتكسف منه اوي
امي
انا امبارح كنت تعبانة و ملقتش حد يسهر جنبي او يفكرني اخد الدوا
افتكرتك لما كانت بتظهر عليا علامات الكحة و انا نايمة وكنتي تقومي من عز نومك عشان تلبسيني تقيل وتحطيلي ورقة جرنال علي صدري و تغليلي ورق الجوافة عشان الكحة متزدش
انا علي فكرة خسيت اوي يا امي وو شي اطفا
اصلي مبقتش اهتم بأكلي خالص
اصلي بكسل اكل و بصراحة مبقاش ليا نفس اكل
ما انا باكل لوحدي
و بابا بردو معذور بيجي متأخر من الشغل
و اخواتي كل واحدة و واحد فيهم مشغولة ببيته وعياله
معلش يا حبيبتي معذورين بردو
مهم بيسألوا عني بالتليفون
متزعليش منهم
طب عارفة
انا امبارح اتخنقت اوي ومكنش حد معايا و مش لاقية حد اشكيله
اصلي بتكسف اشكي لحد لاني عارفة ان الناس بتمل من كتر الشكوى
عارفة بقه عملت ايه
فتحت دولابي وطلعت منه الشنطة اللى شايلة فيها عبايتك السمني و ازازة المسك بتاعتك
كانت اكتر عباية بشوفك لابساها و اخر ازازة مسك لمستها ايدك
فردتها اودامي علي الكرسي يا امي و عطرتها بريحتك واعدت اكلمها
و بكيت معاها كتير يا امي
بكيت كتير اوي
و اخدتها في حضني
او يمكن هي اللى اخدتني في حضنها
مش عرفه
بس ارتحت اوي و هديت كتير

انتي وحشاني اوي
وحشاني يا امي اوي

انا عارفة انك استحالة كنتي تمشي و تسبيني لو الامر بأيدك
بس هو القدر

يا رب متكنش جواباتي بتخليكي تحزني عشاني
انا مقصدش اضايقك
و لا اتحمل شعور انك زعلانة مني
انا يمكن قسيت عليكي كتير قبل كده
وزعلتك كتير
و مكنتش حسة بقيمتك
بس انا ندمانة الان
ندمانة اوي
و لو وصفتلك ندمي عمري ما هقدر اوصلك شعوري
سامحيني يا امي
سامحيني علي كل كلمة اذيتك بيها
و كل قسوة وجهتهالك
و كل نظرة غضب نظرتهالك
وكل كلمة اوف قلتهالك
و كل دمعة نزلت من عينك بسببي
اتمني الزمن يرجع لحظة واحدة اقولك فيها سامحيني و ابوس رجليكي
قيمتك غالية اوي يا امي
غالية اوي
اغلي من حياتي نفسها
انا صابرة يا امي
و اللى مصبرني اني عارفة اني في يوم من الايام هجيلك و افضل معاكي للابد

###########################

اتأثرت اوي من كام يوم لما واحدة زميلتي لسة عرفاها فضفضت معايا في امور مضيقاها ولقيتها بتقولي ان والدتها متوفية
و انها البنت الصغيرة و انها كانت مرتبطة بامها جدا برغم ان البنت دي مكنتش بتعرف تعبر عن حبها لامها ابدا
بتقولي انها الان حسة بوحدة رهيبة و ندم شديد
و بكيت لما لقيتها بتقولي بكل براءة انها لما بتضايق او بتتخنق بتكتب جوابات لأمها و بتحتفظ بالجوابات دي
احساس غريب جدا انها تحس ان مازال السبيل الوحيد للفضفضة انها تحكي مع امها المتوفية في جواب
طبعا ربنا يصبرها
و يصبر جميع من حرم من نعمة الام
انا بسأل نفسي و بسألكم
احنا ليه ممكن نعامل امهاتنا بقسوة و جفاء الا من رحم ربي

ليه عندنا استعدادا نتلون مع كل الناس و نظهر احلي ما عندنا عشان نكسب حب الناس
في حين اننا ممكن نعامل امهاتنا بمنتهي الشدة
ليه بنعامل الغرباء بالحسني و قمة الاخلاق و ممكن نشد المعاملة مع اقرب الاقربين
بغض النظر عن العقوق و جرمه و انه كبيرة من الكبائر بل و من اكبر الكبائر

لا انا عوزة كل شخص يفكر في لحظة هيفارق فيها امه (ربنا يبارك في اعمار امهاتنا و ذوينا علي الطاعة)
بس عوزة كل شخص يشوف شعورة هيكون ايه
يشوف ايه الكلام اللى ممكن يقوله لنفسه ساعتها
و ندمه لكل لحظة قسوة عامل بيها امه
او كل دمعة نزلت من عين امه بسبب عقوقه
بيتهيقلي الشخص العاق او القاسي هيعيش بقية عمره ندمان علي انه كان في ايده كنز غالي و فرط فيه و اهانه و موضعوش موضعه

خلونا نعامل امهاتنا احسن معاملة
امهاتنا مش اقل من اي حد غريب ممكن نتجمل و نتصنع الرقة معاه عشان ننال كلمة رضا او مدح زائف
ربنا يعينا علي بر الوالدين
و يبارك في عمر والدينا علي الطاعة