الثلاثاء، 29 سبتمبر 2009

ردي علي تعليقات اخر بوست و اعتبروها اخر ردود ليا لاني هقفل التعليقات

البوست ده هرد فيه علي بعض التعليقات على البوست السابق

و دي هتكون اخر مرة في مدونتي دي ارد علي اي تعليق و اعقب عليه

و للعلم البوست ده اطول بوست انا نشرته و اطول بوست ممكن تشوفوه

اللى عاوز يقراه يقراه و اللى مش عاوز مفيش اي حرج عليه

التعليق اللى الشخص قاله هيكون باللون البرتقالي و ردي باللون الابيض عادي

******************************

ردي علي تعليق زهور الامل

بس انا واخدة بالي انك متشددة اوي وزيادة عن اللزوم
اولا النقاب فضل مش فرض
الخمار والحجاب الطويل هو اللي فرض على كل بنت

انا لا جبت دلوقتي سيرة ان النقاب فرض (مع انى على قناعة تامة بانه فرض و دي وجهة نظرى اللى ربنا هيحاسبني عليها و كل واحد حر في قناعته...مع التأكيد على عدم انقاصي من اي احد حتى و ان كان انسان عاصي او مذنب).... و لا عيبت في الخمار و لا الحجاب الطويل خالص

كل اللى قلته وركزوا معايا:

"و بعدين جه في بالي صور البنات المنتقبات و البنات الملتزمات"

وانا عارفة انا بكتب ايه بالظبط و هنا اقصد المنتقبات و المختمرات و المتحجبات حجاب شرعي طويل و شملتهم في الملتزمات و انا واثقة اني لو قلت المنتقبات بس الناس هتعترض

كمان في سؤالى عن الحجاب قلت بالنص

"متحجبة حجاب شرعي طويل لا يشف و لا يصف و خالي من الزينة و الالوان المزركشة؟ ولا حجابك اي حاجة في اي حاجة؟" ولا جيبت سيرة نقاب ولا سيرة اي تشدد خالص

انا اعرف بنات منتقبين وبيسرقوا وبيزنوا كمان ومشيين على حل شعرهم

انا مالي بالصنف السىء من المنتقبات دول..... ما اناكمان اعرف بنات متبرجات و لابسين حجاب اي كلام وماشيين علي حل شعرهم ايه النظرية يعني....انا قلت المنتقبات و الملتحيين دول ملايكة ولا حاجة؟ مهم في الاخر بشر و محدش معصوم من الخطأ....ده غير اني مليش هنا دعوة بلي بيستخدموا النقاب او اللحية لغرض دنيوي او لمظهر او حتى لارتكاب جرائم ...ذي الحرامي اللى ممكن يلبس بدلة ظابط و يقتل بيها ولا يسرق بيها يعني.

هو ليه الناس ديما عشان يقنعوا نفسهم بحاجة معينة يروحوا يبصوا على الجانب السىء و يضربوا بيه الامثال...و الله بستعجب....ما في كل طائفة فيه و فيه...منبصش ليه علي المنتقبات الملتزمات و لا الملتحيين اللى بيطلبوا علم و مستنين و ما شاء الله لما الواحد يعاملهم يبقه عاوز يشيلهم فوق راسه و يبوس تراب نعالهم بسبب طيب اخلاقهم....بننظر ديما للنص الفاضي من الكوباية و منبصش للنص المليان ليه؟

(لا حول ولا قوة الا بالله) اهو كلام المسلمين ده علي المنتقبات و الملتحيين و نسبهم كل البلاوي اللى بتحصل ليهم هو اللى يخلي غير المسلمين يعملوا الكلام ده لبانة في بوؤهم و يعدوا يسخروا بيه

عموما بغض النظر عن الجدال حول النقاب لان الكل عارف وجهة نظري ندخل على اللى بعده

هو معنى ان في راجل مش مربي لحيته يعني كدة هو مش متدين ومش عارف ربنا؟

انا بذمتكم قلت كده

انا كل اللى عملته في البوست اني بدعو الرجاله للأستنان في مظهرهم برسول الله صلي الله عليه وسلم

انا قلت بالظبط " مربي لحيتك و مقصر إزارك او بنطلونك ذي ما امرك الرسول صلي الله عليه و سلم ؟ ولا بتتكسف و خايف من نظرة المجتمع ليك؟"

و قلت أنتوا يا رجاله مش بتربوا لحاكم ليه و مش مقصرين الحتة الصغيرة من بنطلونكم ليه مكسوفين و لا ايه
لاخر كلامي في اخر جزء

لكني لا قللت من حد ولا احبطت عمل حد

بنصح نصيحة لله و دعوة لله

و لا اقصد من كلامي غير شحن الهمم.

الدين يسر مش عسر ومش تشدد
مادام اللبس حشم ومفيشلافيه تشبه لا بالرجال ولا بالنساء اعتقد هنكون ناس كويسين

مين قال ان الدين عسر...انا قلت كده؟....انا البوست ده لا اقصد منه سوى شحن الهمم و دعوة الناس و خاصة الرجال للاستنان بسنة الرسول صلي الله عليه وسلم الخاصة بإطلاق اللحية وتقصير الثوب وده عمره ما كان عسر ابدا

بس احنا لسة موصلناش للدرجة الرهيبة في التدين والالتزام بفروض الاسلام علشان نقول لازم الراجل يلتحي والست تتنقب

حضرتك بتتكلمي عن مين بالظبط!!!!!

هو حضرتك متعرفيش حد من الملتزمين اللى علي حق اللى و صلوا للدرجة اللى حضرتك بتتكلمي عليها

لا خالص...حضرتك بس تواجدي في اماكن وجود الملتزمين اللى علي حق مثل دروس العلم و المساجد و معاهد الدعوة و معاهد تحفيظ القرأن و حضرتك تشوفي العباد الربانيين اللى وصلوا لأكثر من الدرجة الرهيبة اللى حضرتك بتقولي عليها....اقاموا ما عليهم من فروض و بيتقربوا لله بالسنن حتى يحبهم الله... بل ومازالوا بيدوروا علي ابواب اخرى للخير عشان يقربوا اكتر لانهم مقتنعين ان الجنة درجات... وانهم عشان يبقوا في جوار الرسول صلي الله عليه و سلم لازم يستنوا بسنته علي اكمل وجه.... ممكن حضرتك بس تكوني اتعاملتي مع صور سيئة اساءت لصور الملتحيين و المنتقبات في مخيلتك.... بس عن تجربة مش كلهم وحشين بل و اغلبهم طائعين ربنا يكرمهم ويجازيهم خير.

المفروض الاول نصلح من انفسنا
نصلي ونصوم ونبعد عن الكذب والنفاق والسرقة واي شيء يغضب ربنا وبعدين نبقى نلتحي وننتقب

طب ما نصلح

مستنين ايه يعني؟

هو كل اللى يتكلم يقولي نستني لما نصلح...طيب و هنصلح امتي؟؟؟ هنعد عمرنا كله مستنين لما نبقه نصلح؟

و بعدين مين قال لحضرتك ان الملتزمين اللى انا بتكلم عليهم واللى لا ينطبق الا عليهم لفظة ملتزمين لم يصلحوا انفسهم و لا بيعملوا الفروض و اكتر كمان...هو ينفع اصلا نطلق على اي حد بيعمل غير كده انه ملتزم!!!

بعدين عن تجربة شخصية "لا يحمي اللب إلا القشرة" مظهر الانسان بيحض صاحبه على الالتزام الحقيقي.... و كما قيل ان الهيبة في اللحية و الكلام ده كلام صحيح لان الأنسان حتى إن كان إيمانه منضجش لسة فمجرد توفير اللحية بيحصل عنده خجل طبيعي و حياء و هو و إن بدا انه حياء صناعي إلا انه مسيرة في يوم يبقه حقيقة

( و إنما العمل بالتعلم و إنما الحلم بالتحلم)

**********************************

هاني زينهم و من يؤيده الرأي

يعنى يا مها لو انا ربيت لحيتى وحلقت شنبى وقصرت بنطلونى ربنا هيحبنى ؟

أه هيحبك

عن أبي هريرة رضي الله عنه ، قال : قال رسول الله صلي الله عليه وسلم : { إن الله تعالى قال : من عادى لي وليّاً فقد آذنته بالحرب ، وما تقرب إليّ عبدي بشيء أحب إليّ مما افترضته عليه ، ولا يزال عبدي يتقرب إليّ بالنوافل حتى أحبه ، فإذا أحببته كنت سمعه الذي يسمع به ، وبصره الذي يبصر فيه ، ويده التي يبطش بها ،
ورجله التي يمشي بها ، ولئن سألني لأعـطينه ، ولئن استعاذني لأعيذنه } . رواه البخاري:6502] .

يعنى لو انا بالبس لبس عادى زى كل الناس لا هو ملفت ولا هو محفلط عادى يعنى وما ربيتش دقنى ومشيت بوشى نضيف ومغسول وحطيت ريحة هيبقى الشيطان ضاحك عليا وهاخش النار ؟ " ان الله جميل يحب الجمال " .

و عشان بس ارد بوضوح هنا فأحب ابين هنا نقطة هامة خاصة بالسنة الفعلية الواردة عن النبي صلي الله عليه وسلم:

1- ما فعله النبي صلي الله عليه وسلم جبلة كالشرب و الاكل (هذا على الإباح)

2- ما فعله النبي صلي الله عليه و سلم و دل الدليل على أختصاصه به فهذا خاص به و لا يشرع الاقتضاء به مثل الزواج بأكثر من اربع أو زواج أمرأة بلا ولي أو مواصلة الصيام.

3- ما فعله النبي صلي الله عليه وسلم بياناً لمجمل: إما أن يفعله بياناً لمجمل واجب فيصبح واجب او بيانا لمجمل مستحب فيصبح مستحب.

4- مما ليس جبلة و لا خاص به و لا بيانا لمجمل فيصبح كالتالي:

أ- ما فعله يرجي التقرب به إلى الله (نتبعه فيه)

ب- ما فعله و لا يرجي به التقرب به (فهو على الاباحة و ليس الندب أو الوجوب كتطويل الشعر للرجال ولبس العمامة)

(المصدر درس للشيخ هشام البيلي)

وهنا بقه ننظر لموضوع تقصير الثياب و إعفاء اللحية ....فهي ورد بيها احاديث صحيحة بصيغة الامر و النهي و لم تنسخ فيجب إتباع الرسول فيها بلا جدال ولا مناقشة ولا تبريرات و لا يمكن ان نقول بانها نسخت وانها لم تصبح مناسبة لعصرنا

فلو العلماء اختلفوا حول موضوع النقاب فمحدش اختلف حول موضوع إعفاء اللحية بسبب الاحاديث الصريحة الواردة فيها...قد يختلفوا حول الأخذ منها و تهذيبها...أو حول إطلاقها دون الأخذ منها

يقول فضيلة الشيخ الشعراوي نقلاً عن كتاب اللحية لماذا إعداد على عبد العال الطهطاوي، مكتبة الصفا، ط1، 2000، ص3- 6:

اللحية فرض و من لم يطلق اللحية عاص: ويقول أن الرسول صلي الله عليه و سلم امرنا بذلك فقال: "قصوا الشارب و أعفوا اللحية" و الذي يزعم خلاف ذلك نقول له أنه ثبت بالسنة وهناك فرق بين ان يكون الشىء ثابت بالسنة و ان يكون الشىء سنة- و سنية الحكم هي المباح و المكروه و المنبوذ و غيرها، و سنة الحكم إن تركته لا تعاقب عليه- إنما سنية الدليل قد يكون فرضاً لان سنية الدليل هي دليل شرعي واجب- فمثلا حكم الصلوات الخمس لم يتعرض لها القران. فالمغرب نصليه ثلاث ركعات بالسنة لانها سنة دليل و هذا ثابت بالسنة: و احكام الصلاة فوض الله الرسول صلي الله عليه وسلم ان يبين للناس احكامها، كذلك ممكن ان تكون السنة إقرارا او قولا او صفة فاللحية سنة دليل ، فالرسول صلي الله عليه وسلم التحى و أمرنا بذلك، وبذلك فهي ليست سنية حكم لا اعاقب على تركها وأثاب على فعلها لا بل تركها معصية! و أقول لبعض الناس الا يتسرعوا و يقولوا أن اللحية ليست فرضاً فيرتكب اثما و لكن فليقل إنها فرض و لا اقدر على إطلاقها فيكون عاصياً بدلا من ان يكون كافرا بالحكم. (انتهي كلام الشيخ الشعراوي)

قال شيخ الاسلام ابن تيمية رحمه الله: يحرم حلق اللحية و قال القرطبي: لا يجوز حلقها و لا نتفها ولا قصها.

ذكر الغزالي في الاحياء ان نتف الفنيكين بدعة وهما جانبا العنفقة، قال: و شهد عند عمر بن عبد العزيز رجل كان ينتف فنيكيه فردشهادته، و رد عمر بن الخطاب رضي الله عنه و ابن ابي ليلى قاضي المدنية شهادة من كان ينتف لحيته.

و حكى ابو محمد بن حزم الاجماع على أن قص الشارب و إعفاء اللحية فرض و استدل بحديث ابن عمر :خالفوا المشركين أحفوا الشوارب و اعفوا اللحى"

قال الشيخ على محفوظ صاحب كتاب الابداع في مضار الابتداع": " وقد اتفقت المذاهب الاربعة على وجوب توفير اللحية و حرمة حلقها"

أحاديث اللحية الصحيحة في البخاري وغيرها كثيرة منها

"أحفوا الشوارب و اعفوا اللحي" و في رواية "انهكوا الشوارب وأعفوا اللحي"

"إن اهل الشرك يعفون شواربهم و يحفون لحاهم فخالفوهم فأعفوا اللحى و احفوا الشوارب"

"من فطرة الاسلام أخذ الشارب و إعفاء اللحى فإن المجوس تعفى شواربها و تحفي لحاها فخالفوهم خذوا شواربكم و أعفوا لحاكم"

كذلك فإن اللحية أمر من الله تعالى. روى ابن جرير عن زيد بن حبيب قصة رسولي كسرى قال: ودخلا على رسول الله صلي الله عليه وسلم و قد حلقا لحاهم و اعفيا شواربهما فكره النظر اليهما و قال : ويلكما من امركما بهذا؟" قالا: أمرنا ربنا يعنيان كسرى، فقال رسول الله صلي الله عليه وسلم " ولكن ربي امرني بإفاء لحيتي و قص شاربي"

و إعفاء الحية غير منسوخ و هو للوجوب و لم يصرفه صارف إلى الندب، و كاذب من يترخص فيها ضعفاً منه او جهلا و يقول: إنها عادة غريبة لا عبادة و هذا كذب على رسول الله.

كذلك جاء في الكتاب ان من نواقض الاسلام كراهة ما جاء عن الله و رسوله صلي الله عليه وسلم و يخشى على حالقها من ذلك.

و فيما يخص تقصير الثوب

فالمراد بالإسبال هو إطالة الثوب إلى ما تحت الكعبين، وهو غير جائز شرعًا على الرجال مطلقًا ويشتدُّ الإثم إذا قصد الخيلاء، فالإسبال يستلزم جرّ الثوب، وجر الثوب يستلزم الخيلاء ولو لم يقصده اللابس

لقوله صلى الله عليه وآله وسلم: "مَا أَسْفَلَ مِنَ الكَعْبَيْنِ مِنَ الإِزَارِ فَفِي النَّارِ"

وعليه فإنَّ ماهو دون نصف الساق فلا حرج على فاعله إلى الكعبين، أمّا دون الكعبين يحرم لما فيه من التوعد بالنار، ويؤيد عدم جواز الإسبال مطلقًا حديث أبي أمامة رضي الله عنه أنّه قال: "بَيْنَمَا نَحْنُ مَعَ رَسُولِ اللهِ صَلَى اللهُ عَلَيْهِ وَآلِهِ وَسَلَّمَ إِذْ لحَِقَنَا عَمْرُو بْنُ زرَارَةَ الأَنْصَارِي فِي حلَة إِزَارٍ وَرِدَاءٍ قَدْ أَسْبَلَ، فَجَعَلَ النَبِي صَلَى اللهُ عَلَيْهِ وَآلِهِ وَسَلَّمَ يَأْخُذُ بِنَاحِيِةِ ثَوْبِهِ وَيَتَوَاضَعُ للهِ وَيَقُولُ: عَبْدُكَ وَابْنُ عَبْدِكَ وَأَمَتِكَ، حَتَى سَمِعَهَا عَمْرُو فَقَالَ: يَارَسُولَ اللهِ إِنِّي حَمْشُ السَّاقَيْنِ، فَقَالَ: يَا عَمْرُو إِنَّ الله قَدْ أَحْسَنَ كُلَّ شَيءٍ خَلَقَهُ إِنَّ اللهَ لاَ يُحِبُّ المُسْبِلَ"

ولا يقال أنه يحمل المطلق على المقيد لأنّه لا يتصور تواردهما في جانب النفي والنهي وإنما شرط حمل المطلق على المقيد دخوله في باب الأوامر والإثبات دون المنافي والمناهي، لأنّه يلزم الإخلال باللفظ المطلق مع تناول النفي والنهي وهو غير سائغ

أما قصة أبي بكر رضي الله عنه في قوله: " إنَّ أحد شقي إزاري يسترخي إلاَّ أن أتعاهد ذلك، فقال النبي صلى الله عليه وآله وسلم: "لَسْتَ مِمَّنْ يَصْنَعُهُ خُيَلاَءَ"

فليس فيه دليل على أنه يطيل ثوبه، بل غاية ما في الأمر أنه كان يسترخي بغير تقصد منه قال ابن حجر: " فكأن شده كان ينحل إذا تحرك بمشي، أو بغيره بغير اختياره، فإذا كان محافظا عليه لا يسترخي، لأنه كلما كان يسترخي شده

فالحاصل أنَّ الثوب الزائد على قدر لابسه ممنوع شرعًا قَصَد به الخيلاء، أو لم يقصد، لأنَّ النهي قد تناوله لفظًا، فضلاً عن أنَّ الزائد من ثوب المسبل مسرف فيه، ومتشبه بالنساء.(منقول)

و لا يصح اننا نقول ان كل عصر وله ظروفه....طالما جاء النص بالنهي او الامر الصريح لا يجوز اننا نترك الامر او النهي ده الا لو تم نسخه و هذا لم يحدث

يعني سنة ذي سنة استخدام السواك مثلا هل يقدر حد ينكرها مع وجود في العصر الحديث الفرشاه و المعجون و كل الحجات دي الا انها بتظل سنة يجب ان نستن بها كما اوصانا رسولنا الكريم.

محدش يلومني لما انصح بترك اللحية و لا بتقصير الثوب و يقولي انتي كده متشددة والدين مش مظاهر

للمرة التانية الكلام فى الدين مش اى حد يتصدى ليه ومش اى اسلوب يتم التناول بيه

انا لا افتي في الدين ولا اكفر احد و لا اقلل من شأن احد انا اقصد النصيحة لوجه الله عشان كده يجوز ليا اني اتكلم في الدين و ادعو الناس بحد علمي و الحمد الله لما الانسان يطلب علم ويتعلم شىء من علوم الدين يجب عليه ان ينصح بها غيره فلقد قال رسول صلي الله عليه وسلم "بلغوا عني و لو ايه"
وانا احافظ علي واجب الدعوة لله

********************************
غير معروف

مش بحب نظرة منتقبة لغيرها مش منتقبة انها مذنبة ومش بترضى ربنا وان ربنا مش بيحبها علشان مش لابسه نقاب

مش بحب ان ملتحي يحكم على غيره بانه مذنب وان ربنا مش راضى عنه علشان مش اطلق لحيته

ربنا يجازيكي خير الاول عن تعليقك يا غير معروفة و قولك بحب المنتقبات و الملتحيين

و انا معاكي في رأيك بانه لا يجوز ابدا ان اي حد ينظر لغيره بانه مذنب

وانا والله لا انتقص من اي حد ابدا و كل صديقاتي المقربات لا هما منتقبات ولا مختمرات حتى ولا حتى لابسين جلباب و لا اي حاجة ... وعمري ما نتقصت منهم ابدا بل ديما معاهم وديما بنصحهم في الله بلين بتعديل حجابهم و تظبيطه و ده حقهم عليا و هما كمان بينصحوني في الله و انا بقبل النصيحة بصدر رحب طالما في الله لانه حقي عليهم

لو انتي فهمتي من كلامي اني بقلل من اي حد بعتذرلك و بقولك لم اقصد

انتى مش بتكتئبى ابدا ولا بتتضايقى ومش بيجى عليكى لحظات بتكونى فى صراع نفسى

اقسملك بالله العلى العظيم و عن صدق ان دي كانت حالتي قبل ارتدائي للنقاب و التزامي... و الله و كل اللى حواليا يشهدوا اني بعيش الان اسعد فترات حياتي وده لاني حسة اني قربت من ربي بس مش بلبسي للنقاب بس ولكن بسبب التزامي بكل ما امرني به الله و نهاني عنه على قدر استطاعتي... و لعل النقاب كان حافز ليا علي الالتزام بجد

دايما عايزة اكون احسن واحسن بس مش بالشكل ده مش انى انعزل عن العالم وانسى ان ليا دور فى الحياة وان من حقى اعمل نهضة لامتى زى اى راجل وانى اثبت نفسى وذاتى وفى نفس الوقت انا محافظة على نفسى ومحترمة كل الحدود والضوابط الشرعية

انتي تقصدي ايه بالشكل ده؟؟؟؟

انا كنت معتقدة ان النقاب هيعوقني عن حياتي النشيطة جدا اللى كنت عيشاها ... لكني اكتشفت عن تجربة ان ولا حاجة اتغيرت...انا ذي ما انا...بشكلي الجديد حسة انى انجح و بنال احترام و هيبة الناس اكتر...بحضر رسالة الماجستير بتاعتي دون اي عوائق و بدخل اماكن اعتقدت اني مش هعرف ادخلها بعد النقاب .... بشارك في كورسات وندوات و مؤتمرات و حجات اكتر من الاول...بحقق نجاح و لو عوزة اشتغل من بكرة هشتغل و الدنيا ايزي....كل اكاذيب الشيطان عليا بان حياتي هتقف بعد النقاب كلها كذبت.

مجداوية

ما أختلف معك فيه هو سؤالك وتأكيدك على المظهر ولم تسألي المسلم والمسلمة هذه الأسئلة (يعني اسئلة خاصة بالاخلاق)

لا انتي مش بتختلفي معايا لاني انا معاكي في الجزء ده بس يا مجداوية انا خصصت البوست ده لغرض معين ولم انفي ابدا ضرورة وجود جوهر

انا يا جماعة مذكرتش اي كلمة تدل ضمنيا او صراحة اني بقول بالمظهر و بس
ما انا ليا بوستات فاتت كتيرة بتكلم فيها عن بعض الاخلاق و اقربهم البوست اللى نشرته قبل رمضان علطول

و اللى سألت فيه كل الاسئلة اللى انتي قلتيها دي

السلوك والتخلق بخلق الاسلام وخلق الرسول صلى الله عليه وسلم أجدها في وقتنا الحالي أهم مليون مرة من زي يرتدى للرياء أو التخفي أو التستر أو غش الناس بمظهر يبعث على الثقة وهو يستخدمه كأداة للنصب والاحتيال

معاكي والله و لكني قصدت هنا اني انصح بردو بالمظهر مفيهاش اي مشكلة و مش معني اني بنصح بالمظهر يبقه بلغي الجوهر و مش معنى اني بنصح بالجوهر اني بنسا المظهر

اصله كله شىء واحد و هو الاسلام

وانا هكون من اول المنددين بالملتحي او المنتقبة اللى اخلاقهم سيئة و مش بقول بكده ابدا

و انا ممكن ابان اني بركز علي المظهر اوي لاني لما دوقت حلاوة المظهر و قدرته علي حماية الانسان وعصمته من كتير من المعاصي و حضه صاحبه علي التقرب لله اكتر فحبيت انصح الناس بحاجة جربتها و دوقت حلوتها.... والله حب في الله

نحن في حاجة إلى العودة إلى أصول ديننا وتطبيق تعاليم الاسلام كما أنزل على رسوله لا كما يروق لنا وقد فعلنا مثل اليهود نؤمن ببعض الكتاب ونكفر ببعض
وأصبح هذا الأمر أيضا حرية شخصية
!!!

الله ينور اهو ده اللى انا عوزة اوصله مينفعش ننقي من الدين الجوهر و ننسا المظهر و لا ناخد من الدين المظهر و ننسا الجوهر.... و ده اللى قصدته بالظبط

الدكتور حازم شومان رجل ذو علم كبير ولكنني لا أستطيع أن أستمع إليه حاولت مرارا أن أستمع إليه في قناة الرحمة ولكن طريقته وصراخه كانا كفيلان أن يجبراني أن أنقل لقناة أخرى ,, فهل هذا عيب في تقييمي له لأني أجدك تحرصين على سماعه ؟ !!!

هقولك حاجة...اكيد انك عارفة ان لولا اختلاف الاذواق لبارت السلع... وكل انسان ليه اسلوب معين يقدر يفهمه و يتقبله.

اهو دكتور حازم شومان هو الداعية الوحيد اللى يقدر يأثر عليا و يلجم شيطاني و يخرصه . لدرجة الان اني لو عوزة اعمل اي حاجة صح و شيطاني عمال يوسوسلي ...بروح اشغل لدكتور حازم درس بيتكلم عن الحاجة دي عشان اسمع كلامه و عزيمته عشان اقوم انفذها فورا

دكتور حازم اتهدا علي يده بشر كتييييييييييير و خاصة شباب

النظرية اني انا اسلوب حازم شومان ده يجيب معايا نتيجة سريعة

و بعتقد ان الشخصيات القوية من الشباب اللى يلين قلوبهم حازم شومان

و في ناس متجيش غير بأسلوب تاني ذي اسلوب الشيخ محمود المصري و هدوءه او ابي اسحاق الحويني و طريقته او الشيخ محمد حسان و طريقته او الشيخ محمد حسين يعقوب و شدته

فعادي انك متنسجميش مع اسلوب د حازم ممكن انتي من الناس اللى بتفضل الاسلوب الهادي و الكلام الهاديء

اما انا فمجيش غير بطريقة د حازم

جزاكي الله خير يا مجداوية

************************************
ممكن

سألتني السؤال ده قبل كده و بتسأله ليا تاني

"يعنى فكره التعدد روحك ونفسك قبلوها ولا لسه فى شؤائب"

قول الملتحي "برضو هتجوز لان دى شرع ربنا والسنه الى بتمنى اصيب منها ما استطيع"

اولا انت ليه بس شايف ان التعدد بيكون علي اطلاقه... وان الملتزمين ماشيين يعددوا علي روحهم و انهم شايفين انها سنة و لازم يعملوها....ده امر مسموح بيه للرجال و ليس فرض عليهم و في هناك بعض الشيوخ لا يأخذ بالتعدد و لا حتى يشجع عليه لعدة اسباب

و بعدين ما انا عيلتي فيها ملتزمين كتيييييييير ولا حد معدد ولا بيفكر... ولما بشوف امامي بعض الملتزمين اللى بيعددوا و هما ظالمين بشوف نقمة غيرهم من الملتزمين عليهم ونقدهم ليهم

و لما بشوف حد من الملتزمين معدد لاسباب شرعية و بشعر ان زوجته راضية بيكبر في عيني لاني شعرت ان لسبب اخذه بهذا الحق اسباب شرعية

انت اخترت اكتر موضوع بيثير احاسيس عند طائفة النساء سواء ملتزمات ولا مش ملتزمات و بتسأله

في الاخر هو شرع ربنا ولا اعتراض عليه سواء رضيت انا او مرضتش... وبعدين انا متحطتش في الموقف ده عشان اشوف نفسي هثبت ولا هسقط في الابتلاء و لا حتى هتصرف اذاي

عموما ادعو الله ان يرزقني بشخص اكفيه ويكفيني ولا يضطر لأن يعدد

************************************************************

هعتبر بقه ان دي اخر مرة ارد فيها علي اي تعليق

سبحانك اللهم و بحمد اشهد ان لا اله الا انت

استغفرك و اتوب اليك

الاثنين، 28 سبتمبر 2009

سر التزامي الرئيس

كان سبب من اسباب التزامي
و سبب من اسباب اني اقرر انى لازم اغير كل حاجة في حياتي
الحديث الصحيح ده
"إن الله قسم بينكم اخلاقكم،كما قسم بينكم ارزاقكم، و إن الله يعطي الدنيا من يحب و من لا يحب، و لا يعطي الدين إلا لمن احب، فمن اعطاه الله الدين فقد احبه....الحديث"
قبل قراري بارتداء النقاب بلحظات كنت اعدة بسمع درس للدكتور حازم شومان
كنت في صراع داخلي اعنف مما اي حد يتصور
بحسب حساب كل حاجة في حياتي هتترتب علي الالتزام
و بعدين جه في بالي صور البنات المنتقبات و البنات الملتزمات و اللى مش فارق معاهم اي حاجة في دنيتهم دي و لا حاجة قادرة تصدهم عن طاعة ربنا و ذي ما يكونوا جبابرة في الطاعة و كأن اللى بيحركهم قوة اكبر من اي حاجة و هي قوة الايمان و حب الله
فتذكرت الحديث ده

فسألت نفسي

انا اذاي راضية على نفسي ان ربنا ميكنش بيحبني

فلقيت ان عشان اخلي ربنا يحبني لازم احبه و اطيعه في كل ما امرني بيه و اتخذت قراري في لحظات بإرتداء النقاب و تغيير كل سلوكياتي و كل حياتي و ابقه حد تاني خالص
للحظة خفت اندم على قراري لقيتني بقول لنفسي محدش بيقرب من ربنا و يندم ابدا

اذاي مستحمل على نفسك احساسك بان ربنا مش بيحبك
اذاي حاسس انك مش محبوب من ربك
ما تقيس حالك على الحديث ده

شايف انك شخص ينفع يتقال عليه ملتزم؟

بتحاول علي اد ما تقدر متعصيش ربنا؟

بتغض بصرك؟ و لا ماشي تبص في كل حتة وناسي ان كل نظرة بتتكتب وتتسجل عليك ؟

بتتجنب الاختلاط؟ بتتجنبي الاختلاط؟ ولا متخذه اخدان و مسمياهم زمايل دراسة ؟

بتصلي و ملتزم بالصلاه في جماعة في المسجد ولا بتصليها في البيت؟ او انتي بتصليها في وقتها في منزلك؟ و لا وقت ما بتفتكري؟

مربي لحيتك و مقصر إزارك او بنطلونك ذي ما امرك الرسول صلي الله عليه و سلم ؟ ولا بتتكسف و خايف من نظرة المجتمع ليك؟

متحجبة حجاب شرعي طويل لا يشف و لا يصف و خالي من الزينة و الالوان المزركشة؟ ولا حجابك اي حاجة في اي حاجة؟

محافظ علي الاذكار و الاداب في كل احوالك ولا مفيش حاجة بتربطك بربنا غير كام ركعة بتركعها؟

مقضيها سماع اغاني و عايشلي دور بيتهوفن ؟ ولا بتعف اذنك من سماعها؟

بتطلب علم او بتطلبي علم شرعي؟ ولا مكتفية بعلم الدنيا ؟

انتوا يا رجاله مش بتربوا لحاكم ليه و مش مقصرين الحتة الصغيرة من بنطلونكم ليه مكسوفين ولا ايه
ده اللحية في وجه الرجل بتبقه رجوله و بتزيده زينة

كل واحد يبص يشوف ربنا بيحبه ولا لا
اصل مش معني ان حياتك ماشية تمام التمام انك كده ربنا بيحبك
ما احنا قلنا بقه الدنيا للكل
و بعدين مهو الكفرة بيتقلبوا في نعيم الدنيا
لانهم محرومين من الدين و من نعيم الاخرة
"كلوا و تمتعوا قليلاً انكم مجرمون"
ربنا يهديني ويهدي جميع المسلمين

الجمعة، 25 سبتمبر 2009

استحلفكم بالله

بالله عليكم
استحلفكم بالله العلي العظيم
تالله عليكم
تسمعوا الدرس ده
متحرموش نفسكم الاجر
لعلكم تستفيدوا منه بذرة تنفعكم
او لعل ربنا يهديكم بيه
غيركم كان الدرس ده سبب في هدايته
بالله عليك ما تقفل الا لما تمسعه الان
حتى لومشغول متنشغلش عنه
الشيطان هيحول بينك و بين سماعه الان بأشد ما يملك من قوة
و متنسوش ان التسويف جندي من جنود ابليس
و أكثر من يقع من فوق الصراط المسوفين
يا عالم يمكن تكون ختمتنا علي سماعة
بستحلفكم بالله ما تحرموا نفسكم الاجر

الثلاثاء، 15 سبتمبر 2009

ليلة القدر


سلام عليكم ورحمة الله وبركاته
هاه حد فيكم لمح ليلة القدر
انا عن نفسي شفت كل علامتها ليلة خمسة و عشرين
فعلا الجو كان حلو جدا ولا بارد ولا حار بجد كان جو رائع و منعش جدا و غريب في حلاوته عن اليوم اللى قبله و اليوم اللى بعده
وكان في سكينة رهيبة و طمانينة في قلب الواحد
ده غير بقه ان السما كانت صافية جدا جدا والنجوم واضحة جدا من الصفاء
كمان اصوات الديوك كانت كثيرة جدا رغم انها مش علامة مؤكدة لليلة القدر
ده غير بقه ان تاني يوم الشمس كانت بيضاء فعلا و شعاعها ابيض (ذي الصورة اللى فوق دي بس للعلم الصورة دي من النت مش انا اللى مصوراها) و عارفين السما بتكون بيضاء ليه كده و ضوءها هادىء
قرأت انها بتكون كده لان الملائكة بتتنزل طبعا ذي ما انتوا عارفين ليلتها و مش بيكون في شبر في الارض الا و فيه ملك من الملائكة....فمع مطلع الفجر الملائكة بتصعد إلى السماء.... ومع كثرة الملائكة وصعودها...ولان الملائكة نور.... فضوئهم بيحجب ضوء الشمس فبيكون لونها كده
سبحان الله
بس بردو الله اعلم
احنا علينا نتلمسها في العشر الاواخر في الليالي الوترية ومنكسلش عن اي ليلة في رمضان لعل ربنا يعتقنا في اي ليلة حتى لو زوجية و ساعتها مش هنحتاج اي حاجة تانية في دنيتنا دي .....ربنا يبلغنا ليلة القدر كلنا
الاهم بقه اني قرأت التعليقات اللى فاتت وجدت بعض التعليقات بتقولي انه يصح اني اعتكف في بيتي وناس كانت يعني مقلقة شوية من الاعتكاف الخاص بالنساء و حجات كده
حبيت بس انقل بعض اراء العلماء لعل اي حد ينتفع بيها أو توضح عنده رؤية معينة
**********************

فده لينك خاص بان جمهور العلماء على قول انه لا يصح اعتكاف المراة في بيتها ولا في مسجد بيتها

وده لينك تاني فيه اقوال لكبار مشايخ العلم حول اعتكاف المراة اصلا في المسجد سواء بوجود محرم او بدون
إلا ان الحل للبنات اللى اسرتهم ممكن تخاف انهم يعتكفوا في المسجد ويباتوا فيه
ممكن يحلوا المشكلة دي بانهم يجلسوا في المسجد من صلاة التراويح لحد جلسة الضحى كل ده في ذكر و صلاة و عبادة و امرنا لله وخلاص
ارجو الإطلاع بقه لتعم الفائدة
وافكركم بان لله عتقاء من النار و ذلك في كل ليلة
متخليش رمضان يمشي الا لما تكون اتعتقت بإذن الله
خليك شحات وطماع و ملح بل وشديد الإلحاح على ربنا انه يعتقك من النار في الكام يوم اللى فاضلين دول
يا عالم تجيلنا الفرصة اللى نلحق بيها الشهر الكريم اللى فيه غلقت ابواب النار وفتحت ابواب الجنة و صفدت الشياطين تاني ولا لا