الأربعاء، 29 يوليو، 2009

سقيا الماء

- انتي يا بنتي انتي....خبي الإزازة مينفعش كده الناس هتشوفها

- ايوة دخليها جوة كده في الشنطة مش ناقصين بقه


- ممكن أشرب بعد أذنك

- كان علي عيني بس أنا اسفة أصلي انا أخاف عليكي والله عندي دور برد فظيع

- أنسة أنسة ممكن مية لو سمحتي

- ايه؟!!!! طب بصي.....من بعيد لو سمحتي عشان بأرف

- لا لا كده مش بعيد...أبعدي البوء شوية

- مش كده يا انسة أشربي من فوق اوي

- يا بنتي بؤك هيلمس

- يعععععععععععععع

- ماما طلعي المية اشرب عشطانة
- اخرصي يا حبيبتي لحد يشوف المية ويقول عاوز اشرب

- استني لحد امتي يا ماما

- لحد ما ننزل يا نصيبة

- اومال احنا جايبين المية ليه يا ماما....مش عشان نشرب؟!!!

- وربنا لا تتقطعي في البيت



- حد معاه مية لو سمحتم؟؟؟؟

- ممكن اشرب يا انسة

- لا لا...دي مش مية...ده سفن أب



اعرف صحاب كتير جددددددددددددددددا

موتهم وسمهم حد يقفشهم بإزازة المية ويطلب منهم انهم يشربوا

ولو حد طلب منهم يشرب يبقه جنا على نفسه

يكسفوا الناس بشدة وعنف عشان هما بيأرفوا


انا مش بلومهم أنهم بيأرفوا أن حد يشرب من بوء الإزازة

لأن أصلاً من السنة تجنب الشرب من فم الإبريق أو السقاء، ولكن يصب منها في كأس ويشرب.

عن أبي هريرة رضي الله عنه : نهى رسول الله أن يشرب من فيّ السقاء أو القربة متفق عليه.

ولا بلومهم لأنهم فعلا ممكن يكونوا عندهم برد ومش عوزين حد يتعدي


لكن انا بلوم الناس دي لأنهم بيملكوا من الجرأة اللى يخليهم يحرجوا غيرهم و هما بيطلبوا من الناس انهم يشربوا من برة ومن فوق

ويعدوا يتابعوا اللى بيشرباو خوفاً من أن شفايفهم تلمس بوء الإزازة

ولو لمسوا البوء

يبقه ينزل علي اللى بيشرب وابل من اللوم والتعبير عن الأرف و الطهقان و الزهق

ويخلوا اللى فكر يطلب يشرب ده يقرر انه يكمل اللى باقي في حياته صوم


حبيت أذكركم و أذكر نفسي بشىء خطير جدا جدا يمكن معظمنا بيسها عنه أو بيجهله

أذكركم بان منع الماء جعل (بضم الجيم) من الكبائر


يعني اللى يمنع ابن السبيل المية الزايدة عن حاجته هيكون جنا على روحه

وربنا هيجازيه جزاء من جنس عمله فهيمنعه فضله في الوقت اللى هيكون فيه أحوج مايكون إلى فضل الله ورحمته.

فمن فضل سقيا الماء.... قال (صلى الله عليه وسلم ): "ليس صدقة أعظم أجرا من ماء.


ومن الأدلة كذلك على فضل سقي الماء ما خرجه البخاري في صحيحه عن أبي هريرة يرفعه إلى الرسول - صلى الله عليه وسلم -: "بينما رجل بطريق فاشتد عليه العطش فنزل بئراً فشرب منها ثم خرج، فإذا *** يأكل الثرى من العطش، فقال: لقد بلغ هذا الكلب مثل الذي بلغ بي؛ فملأ خفه ثم أمسكه بفيه، ثم رقى فسقى الكلب، فشكر الله له فغفر له"، قالوا: يا رسول الله، وإن لنا في البهائم أجراً؟ قال: "في كل ذات كبد رطبة أجر".


أخرج مسلم في صحيحه عن عبد الله بن عمر - رضي الله عنهما - أن رسول الله - صلى الله عليه وسلم - قال: "عذب الله امرأة في هرة سجنتها حتى ماتت، فدخلت فيها النار، لا هي أطعمتها وسقتها إذ هي حبستها، ولا هي تركتها تأكل من خشاش الأرض".


فإذا كانت هذه المرأة أدخلت النار في حبسها لهرة حتى ماتت من العطش و الجوع ، فكيف بمن يحرم أخوانه من الماء و هو يملك أن يسد عطشهم


يعني من الأخر محدش يكسف الناس ويمنع عنهم المية وهو في ايده يسقيهم

الواحد ما بيصدق يعمل خير ياخد عليه ثواب

فمفيش بقه افضل من سقيا الماء خير

ايه رأيكم بقه لو كل واحد فينا كده يشتري إزازة مية ولو حد طلبها نديهاله بوجه بشوش وبنفس راضية

من غير ما يتبع عملته لا بمن ولا اذي ولا ذل

ويسيبهالهم ويمشي


فيها ايه يعني لما كل يوم تشتري إزازة مية بقيمة جنية ونص و تشرب منها وتاخد كفايتك وبعدين تسيبها للناس تشرب منها بقه


وانت ليك الأجر و الثواب العظيم

أيشحال بقه اللى بيحلي بوء الناس في الدنيا ربنا بيزيل مرارة بوءه يوم القيامة


أومال بقه اللى يسد عطش الناس في الدنيا لوجه الله

هيكون جزاءه ايه عند ربنا بقه يوم العطش الأعظم

والناس تخلي بالها من أحاسيس الناس شوية

في ناس والله نفسهم بتصعب عليهم اوي

وممكن حركة أو كسفة رخمة أنت تفتكرها هينة تكون كفيلة بتدمير نفسية أي حد طول اليوم

الأربعاء، 22 يوليو، 2009

الاسعافات الأولية للميت

سلام عليكم ورحمة الله وبركاته


بس الاول بذكركم وبذكر نفسي بأن يوم الجمعة الجاي هيكون اول يوم في شهر شعبان اللى بتترفع فيه اعمال السنة كلها إلى الله وتعرض علي القهار

فإما تكتب من الأشقياء و إما تكتب من السعداء

فبادر بتوبه نصوحة واقلع عن اي ذنب او معصية قبل ان تصعد صحيفتك مسودة إلى بارئك وأكثر من الاستغفار و الصيام كما كان يفعل النبي الكريم صلي الله عليه وسلم

عن عائشة رضي الله عنها قالت: " كان رسول الله يصوم حتى نقول لايفطر ويفطر حتى نقول لايصوم وما رأيت رسول الله استكمل صيام شهر إلا رمضان وما رأيته أكثر صياما منه في شعبان " رواه البخاري

عن أسامة بن زيد رضي الله عنهما قال: قلت يارسول الله لم أرك تصوم من شهر من الشهور ماتصوم من شعبان، فقال:" ذاك شهر تغفل الناس فيه عنه ، بين رجب ورمضان، وهو شهر ترفع فيه الأعمال إلى رب العالمين وأحب أن يرفع عملي وأنا صائم" رواه النسائي


الكام يوم اللى فاتوا اثر فيا موضوع مهم جدا

اتعملت كيفية تغسيل وتكفين الميت نظري

و لأني اصلا بترعب جدا

فأنا لحد الان متعلمة نظري لكن عملي اشك!!!!!!!!!!!!!!!

مسألة التغسيل و التكفين دي عظة عظيمة وكفيلة بإنها تصحي القلوب الميتة

بس الجزء اللى حبيت افيد بيه الناس ذي ما استفدت هو موضوع مهم جدا بيكون قبل التغسيل و التكفين وهو الأسعافات الاولية للمتوفي واللى لازم كل شخص يكون عارفها لأن محدش يعرف الظروف ممكن تضعه في اي موقف

فجمدوا قلبكم واتشجعوا واعرفوا ايه اللى بيتعمل للميت اول ما يتوفي وقبل غسله....لأن الميت بعد خروج روحه أمانة ولازم نعرف اذاي ممكن نوصل الأمانة دي لبارئها في اكمل وجه

و الأشياء اللى هقولها دي هي فرض كفاية يعني لو قام بيها حد مع الميت سقط الإثم عن الجميع ....ولو محدش قام بالاعمال دي مع الميت يأثم الجميع.

البوست هيكون طويل بس المعلومات اللى فيه هامة جدا


1- أولاً لو لحقنا الميت قبل خروج روحه أو في أخر ساعاته المفروض اننا نذكر المحتضر بأفضل أعماله يعني نعد نقوله ده انت كنت بتصلي وتصوم وكنت تحب الكبير و الصغير وكده....عشان الميت يتذكر اعماله الصالحة فيحسن الظن بالله ويموت وهو محسن الظن بالله فيدخل الجنة كما بالحديث...وخاصة و إن الشيطان بيكون بيتلاعب بيه وبيحاول يفتنه ويشككه في رحمة الله .

2- عند إحتضار الميت المفروض اننا نلقنه الشهادة بأننا نقولها معاه ونيسر قولها ليه...ونفضل نلقنها ليه وكانه طفل صغير بنعلمه النطق دون ضيق عليه ولا ضجر...وده لأن الميت بيكون في ألم شديد وسكرات شديدة ...عشان كده لو المحتضر قال الشهادة مرة واحدة مش بنكررها عليه تاني وبنتركه ومش بنضغط عليه تاني في قولها رحمة ورأفة بيه...لكن لو الميت تحدث بعدها بأي كلام تاني بنلقنها ليه تاني عشان تكون الشهادة أخر كلامه فيدخل الجنة بإذن الله.


3- لما تخرج روح الميت إلى بارئها بنغمض للميت عينيه....وده لأن الميت بيشق عليه أنه يرى روحه تفارقه و تودعه بعد طول عشرة... وبنلاقي بعض الناس تقول ده الميت الفلاني اعد يبص علي اهله كلهم واحد واحد أو يقولوا ده فضل يبص في اركان الحجرة بتاعته والنظرية ان الميت مش بيبص لا لأركان الحجرة ولا بيبص لحد من الواقفين...الميت خلاص انقطع عن دنيته ومبقاش شايف حد من البشر...لكن الميت بيكون بيبص علي روحه وهي تخرج منه وكما قال نبينا صلي الله عليه وسلم" إذا حضرتم موتاكم فأغمضوا البصر فإن البصر يتبع الروح، وقولوا خيراً، فإنه يؤمن على ما قال أهل الميت".... و إغلاق العين بيكون إنك تطبق الجفن الأسفل على الأعلى و العكس بالسبابة و الوسطى... ومن السنة ان تدعو قائلاً "بسم الله وعلى ملة رسول الله. اللهم يسر عليه أمره وسهل عليه ما بعده، واسعده بلقائك و أجعل ما خرج إليه خيراً مما خرج منه"


4- تشد عصابة أو منديل أو قماشة من أسفل ذقنه إلى اعلي رأسه وده لكي نغلق فم الميت ولا يبقي مفتوح فيقبح منظره ويدخل فيه ماء الغسل او تدخل فيه اي حشرة او هامة.

5- تليين المفاصل للميت وتحريك أطرافه وأصابعه برفق ولين لأننا لو تركنا الميت دون تليين سنجده قد تيبست مفاصله بعد ساعة او ساعتين وتخشب وتجمد وبالتالي هنجد صعوبة في تغسيله شديدة.

6- تمديد جسم الميت ونربط قدميه أحدهما في الأخرى، والربط بيكون عن طريق ربط الصباع الكبير في القدم اليمني بالصباع الكبير في القدم اليسري برباط لا يؤذي الميت ولا يؤلمه... وذلك حتي تضم فخذية فلا يخرج منه مخرجه شىء حتي لا تتغير الرائحة حوله إلى ساعة غسله.

7- نراعي ان الميت يكون علي سرير او لوح و ليس علي الارض حتي لا يتغير جسمه من نداوة الارض... و ان يكون متوجهاً للقبلة قدر المستطاع.

8- نضع على بطن الميت ثقلاً يعادل 2 كيلو جرام تقريباً حتي لا ينتفخ بطنه قبل تغسيله بشرط الا يكون هذا الثقل كتاب ديني او مصحف

9- نغطي الميت بثوب يستر جميع بدنه ولا يظهر منه شىء وهي سنة عن النبي صلي الله عليه سلم إلا لمن مات في الحج.

10 اهم نقطة وهي انك تخرج من عند الميت 4 أصناف من الناس دون ان تجامل احداً في دين الله وشرعه:

أ- غير المسلمين الذين لا يدينون باللإسلام وذلك بهدوء ورفق حتي لا نحرج احد

ب- تارك الصلاة لانه أوشك ان يخرج من الإسلام

ج- من كان بينه وبين الميت عداوة او بغضاء أو عدم راحة لأن هذه الاوقات اوقات شماتة يحدث فيها ما لا يعمله الا الله فلا تؤذ ميتك بمن كان يكرهه.

د- جميع النساء لعل على إحداهن شيئاً من الاعذار الشرعية كذلك لأنهن لا يتماسكن ولا يتمالكن انفسهن

11- ان تنظف المكان حول الميت قدر الاستطاعة وليتك تعطره أو تبخره ليلق المكان بإستقبال ملائكة الرحمن.

12- لا تترك الميت بمفرده حتي يحين موعد غسله بل يبقى واحد من الصالحين أو جماعة يجلسون عند ه يدعون ويستغفرون ويقرؤن سورة يس ويجوز ان تبقي عنده المذياع عليه القرأن لتظل ملائكة الرحمة حول ميتك و قد روى ان رسول الله صلي الله عليه وسلم قال " لا يترك الميت بمفرده فإن الشيطان يتلاعب به". و قد روى الغمام و أحمد و ابن ماجة و أبو داوود و غيرهم أن رسول الله صلي الله عليه و سلم قال "يس قلب القرأن لا يقرؤها رجل يريد الله و الدار الأخرة إلا غفر الله له، أقرؤها علي موتاكم"

13- التعجيل بالتغسيل و الكفن و الصلاة علي الميت لأن كرامة الميت تعجيل دفنه.

14- اخيراً من أهم ما نقوم به هو تذكير اهله بالصبر و الاسترجاع و ان تذكرهم بان الصبر عند الصدمة الاولى و في الساعة الاولى. فلا يكون الصبر صبراً إلا وقت نزول البلاء....{وبشر الصابرين . الذين إذا أصابتهم مصيبة قالوا إنا لله وإنا إليه راجعون . أولئك عليهم صلوات من ربهم ورحمة وأولئك هم المهتدون} [البقرة: 155-157

وتذكرهم بعدم النياحة علي الميت لان الميت يعذب بنياحة اهله عليه


وفي النهاية احب اختم بحديث قدسي رهيب وبجد اقروه براحة كده هتترجوا من جوة

قال رسول الله صلى الله عليه وسلم فيما بلغ عن رب العزة سبحانه وتعالى((عبدى اذكرك وتنسانى واسترك ولا تخشانى لو أمرت الارض لأبتلعتك في بطنها او البحار لأغرقتك في معينها ولكن أوأخرك لأجل أجلته وإلا وقت أقته ولابد لك ولكل نفس من المرور على والوقوف بين يدى أعد عليك أعمالك وأذكرك أفعالك حتى إذا أيقنت بالبوار وأدركت أنك من أهل النار أوليتك غفرانى ومنحتك رضوانى وقلت لك لا تحزن عبدى فقد غفرت لك الذنوب والاوزار ومن أجلك سميت نفسى العزيز الغفار))

صدق الرسول الكريم فيما بلغ عن رب العزة سبحانه وتعالى

برجاء النشر...ولا تنسوا بان الدال علي الخير كفاعله

ولا تنسونا من صالح دعائكم