الجمعة، 27 مارس، 2009

الاسلام هو الحل


شفتوا اللى حصل
بابا الفاتيكان أوصي الغرب بإعتماد النظام المصرفي أو النظام الاقتصادي الأسلامي كنظام مصرفي من أجل حل الازمة المالية

أنتوا عارفين ده معناه ايه
معناه انهم بيقولوا احنا كنا غلط وانتوا اللى صح
معناه إن لما يجي أهم علماء الأقتصاد من اول كينز لحد فريدمان وغيرهم وغيرهم ويقولوا أن السبب في تقلبات النظم الاقتصادية سواء في امريكا او في اي دولة في العالم هو تقلبات أسعار الفائدة و ان افضل وضع هو في حالة أن اسعار الفايدة تكون صفر
يعني يقصدوا من وجهة النظر الاسلامية أن الربا يكون صفر

الاسلام بينظر للقروض مش علي انه نظرة استثمارية و كده ذي ما الغرب بينظر ليها
لا
الاسلام بينظر ليها علي انها نوع من انواع التكافل و التكاتف الاجتماعي
يعني القرض بيجي في باب الصدقات....طيب اذاي
النظام الغربي بيتعامل كالاتي:
واحد دماغة حلوة ويقدر يدير مشاريع و استثمارات بس معهوش سيولة.....وواحد تاني معاه فلوس بس مبيعرفش يعمل اي مشروع ومش عارف يفتح لنفسه باب رزق

يروح الراجل المستثمر يروح للراجل اللى معاه فلوس يقولوا اديني فلوسك استثمرها ليك في مشروع وليك عليا اديك كل شهر 2% فايدة يعني مثلا اديك كل شهر الف جنية
يتم المراد والراجل يعمل المشروع والمشروع يكسب في الشهر عشر الاف جنية مثلا و يروح المستثمر مدي صاحب الفلوس الألف بتاعته وخلاص علي كده
المستثمر يزداد غنا ويبقه مليونير...والراجل صاحب الفلوس كل اللى هو بياخده الف جنية كل شهر مع ان اصل المال بتاعه اصلا بس هو ده الاتفاق
وبالتالى المجتمع بيتشرخ نصين....نص يغتني ونص يفتقر وتزداد الاحقاد بين الناس
ونفس الوضع في حاله أن المشروع خسر وبقه دخل المشروع في الشهر 500 جنية مثلا ويبقه المستثمر ملزوم بأنه يدفع الألف جنية لصاحب الفلوس وصاحب الفلوس ملوش دعوة لان ده الاتفاق...فبالتالى المستثمر بيفتقر و بيبيع هدومه عشان يسدد الفايدة اللى عليه وبيتملي غل وحقد وكراهية
النظام الاسلامي بقه بيعمل ايه؟
نفس المستثمر ونفس صاحب الفلوس
بس المستثمر بيتفق مع الراجل صاحب الفلوس انهم علي المكسب و الخسارة...يعني يقسموا بالنص...يقسموا بالتلات ارباع ...يقسموا بأى شكل...اي تقسيمة هما عوزينها...بس النظرية انه يبقه تبع المكسب و الخسارة
فلو المشروع خسر أو كسب يبقه بيتقسم عليهم....فالمجتمع يفضل متماسك وبلا شروخ
أهو اللى حصل بقه للنظام العالمي هو ان اسعار الفائدة قضت عليه وكانت تقبلاتها سبب في تقلبات النظام الاقتصادي
قريت أن في مئات البنوك في الولايات المتحدة افلست وده بسبب ان مشاريعها كانت فعلا بتخسر وكانت بتضطر تدفع فوائد للمقرضين
النظرية بقه اننا لو خدنا بالنا هنلاقي ان الغرب كان في فترة من الفترات عنده قناعة ان النظام الاشتراكي و أن تحكم الحكومة و الدولة بشكل ما في الاقتصاد هيكون هو الحل
لكن اللى حصل فعلي أن النظام ده فشل وحدثت فترة الكساد العظيم في عشرينات القرن الماضي

وبعد كده اعتقدوا أن النظام الرأسمالي و حرية الاسواق و ان العرض و الطلب هو وحده المسير لامور الاقتصاد إلا انهم جابوا داغ الاقتصاد واصبحنا في ازمة اقتصادية طاحنة ومدمرة

كل المعاملات الربوية فشلت وباءت بالفشل

النظام بقه اللى العالم مجربوش هو النظام الاسلامي...واللى هما بقه بيدعوا ليه دلوقت وبيقولوا ان الحل الوحيد هيكون فيه
و ده اللى بيثبت إن الأسلام دنيا ودين وانه فيه كل الحلول في اي زمان ومكان


وقال تعالى ( يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِنْ كُنْتُمْ مُؤْمِنِينَ() فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ ۖ وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ ) سورة البقرة الأيتان 278-279

يعني ربنا بيقول في لهجة شديدة جدا للناس اللى بتتعامل في الربا بأى شكل....انهم يتوبوا ويتركوا هذه الكبيرة...وإن لم يفعلوا فكأنهم يقولوا لله " تعالى يا رب حاربنا أنت ورسولك"
بيتهيقلي يعني ان اقل حرب ممكن ربنا يشنها علي المتعاملين بالربا وعلي المصارف الربوية بأنه يخسف بأقتصادهم الأرض وده اللى ديما بيحصل للأنظمة الربوية

دمار وأزمات اقتصادية مستعصية


الأربعاء، 25 مارس، 2009

ده ممكن يحصل؟!!!!!انا في صدمة


بجد انا مصدومة صدمة مؤلمة
النهاردة الامن المركزي كان عند بيت تيتا جنبنا بشوية
الامن المركزي ده جه تحسبا لحدوث اي حاجة
تحسبا لاي مصايب ممكن تحصل بعد ما اهل العيال يعرفوا اللى حصل لعيالهم
ايوة
طفلتين صغيرين بتاع تمن تسع سنين
صحيوا الصبح ولبسوا لبس مدرستهم....خدوا مصروفهم و سندوتشاتهم في كيس وازاة المية في كيس تاني وباسوا امهاتهم وحضنوهم ونزلوا لمدرستهم
قبل ما يدخلوا المدرسة
ناس ميعرفوش ربنا ولا ينفع يبقوا بشر
كانوا مستنين جنب المدرسة
ولان المدرسة في حتة ساكتة ومفيهاش بيوت كتير قدروا يخطفوا البنيتن بطريقة ما
وفى لحظات كانوا قاموا بجريمتهم البشعة اللى ميصدقهاش عقل انسان
فتحوا بطونهم وخدوا احشائهم
خدوا اعضائهم
سابوهم في الشارع ورا المدرسة وهما ميتين ومتاخد اعضائهم البريئة الصغيرة
انا بجد في صدمة
كل ما اتخيل رعب البنتين وهما بيتخطفوا
كل ما اتخيل الطريقة اللى قدر بيها الحيوانات دول يعملوا عملتهم دون اي مشاعر
كل ما اتخيل شعور اهالى البنات وهما بيتخيلو بناتهم وهما خايفين... وهما بيتألموا....وهما
بيستغيثوا

كل اللى فضلهم طفلتين مقتولين بلبس مدرستهم وبشنطة لسة جواها سندوتشاتهم وازازة ميتهم و جنية في جيبهم بقه لونه احمر بلون دمهم ملحقوش يتهنوا بيه ولا يشتروا بيه حاجة

كنت ممكن اتخيل أن واحد معندوش لا دين ولا ضمير ولا ادمية يستخدم طبيب ملوش راخر لا دين ولا قلب ولا ضمير في انه يعمل عملية لطفل وياخد كليته مثلا او اي عضو من اعضاؤه
وبنفس اللاضمير واللادمية بردو يعمله عملية تانية ينقذه فيها من الموت ويقفله جرحه
ويرميه لاي حد يلاقيه يوديه مستشفي.
او ان اي حد معدوم الانسانية يدي اي طفل من اطفال الشوارع كام الف جنية وياخد من عضو من اعضاؤه
ده كان اخر تخيلاتي للبشاعة
لكن ان حد يخطف طفل وبدون رحمه ياخد احشاؤه كلها من غير لا بنج ولا اي حاجة
هما بيخنقوهم مثلا؟.....ولا بيقتلوهم الاول!!!!!!!!...ولا بيعملوا عملتهم والاطفال عايشين؟!!!!!!!!!!!!!!!!!!!!!!!!!!!!!!!!!!
انا مش قادرة افهم
ايه ممكن يوصل الانسان انه يبقه حيوان
لا يمكن كمان اكتر من الحيوان...بيتهيقلي مفيش حتي حيوان فطرته تخليه ممكن يعمل حاجة كده

دي بشاعة
بالله عليكم...لو حد عنده اطفال بلاش يخليهم يخرجوا لوحدهم او يروحوا المدرسة لوحدهم حتي لو كانت قريبة
بجد...انا كل ما اتخيل شعور الام والاب....بجد زمانهم بيندموا مية مرة انهم سابوا عيالهم يروحوا المدرسة لوحدهم حتي لو كانت جنب البيت
بجد مبقاش في امان في الدنيا
واعرف حكاية كذا طفلة كمان تم اغتصابها بردو جنب مدرستها او حتي جوة مدرستها من الفراشين والعمال اللى في المردسة
بالله عليكم تحذروا اولادكم وخاصة البنات وتفهمومهم انهم ميمشوش في مكان فاضي... ميمشوش ورا المدرسة....ميدخلوش الحمامات بتاعت المدرسة لوحدهم ابدا حتي لو
هيموتوا....ميأمنوش لحد
بجد من خاف سلم
انا سمعت ان موضوع سرقة الاعضاء ده بيحصل في كل مكان
سمعت ان اطفال لقوهم مرمين عند مدينة السلام و متاخد اعضاؤهم وهما اساسا من مدينة نصر
وعرفت كمان ان في ست كانت بتقيس في بروفا في محل متاخد من شقة وهي بتقيس اتاخدت في الشقة دي واتسرقت اعضاءها وماتت
قصص كتير بتبين ان اي حد معرض لده
يا ريت ناخد بالنا
وربنا يصبر اهالى الاطفال دول
ويمثل باللى عمل العملة دي
بيتهيقلي اي حد بيعمل كده يبقه جزاته انه يققف في ميدان عام و يتقطع من لحمة حتت صغيرة ويشوف العذاب بعينه في الدنيا لحد ما يقابل وجه كريم ويشوف ابشع عذاب في الاخرة
انا سمعت ان في قانون بيتناقش جديد الايام دي عن نقل الاعضاء
بيتهيقلي ان نقل الاعضاء ده بيكون في حالات معينة فقط
لكن ان حد سليم ومعافي يبيع اي عضو من اعضاءه عشان الفلوس...بيتهيقلي حرام...حرام انه يبيع حاجة مش بتاعته...لاننا في النهاية بتوع ربنا اجسامنا مش ملكنا...دي امانة ولازم ترد
ما بالكم بقه بلى بيتخطف وتتاخد اعضاءه عنوة...ويا اما يموت يا اما يعيش مدمر ويظل في المستشفيات الى ان يتوفاه الله بعد معاناه ومرض

بجد حسبي الله ونعم الوكيل


الاثنين، 9 مارس، 2009

لاي حد ظلمني او غلط في حقي



احتمال يكون في ناس كتيييييييييييييييييير ظلمتني بعلمي او من غير علمي والله اعلم

واحتمال يكون ناس بردو اتكلموا عليا بعملي او من غير علمي والله اعلم

واحتمال يكون في ناس متمنوش ليا الخير في لحظة سواء بعلمي او من غير علمي والله اعلم

و احتمال ناس تكون خدعتني او كدبت عليا بعلمي او من غير علمي وبردو الله اعلم


من عادتي اني كنت بنسي المواقف السيئة بسرعة جدا وبصفا بسرعة...لكن مبنساش الظلم او الكدب او السوء...وفي لحظات معينة كنت بدعي ربنا ينتقم من اي حد ظلمني

و كنت بشوف ان مسامحتي للناس اللى ظلمتني او اساءت ليا يعتبر منحة هما ميستحقوهاش وتنازل عن حقي

برغم اني بنسي فعلا الاساءة وبتعامل عادي جدا وكتير جدا بظل اساعد الناس اللى اساءت ليا وده حاجة فطرية عنديه



أما النهاردة بقه.....و بمناسبة اليوم العظيم ده

يوم المولد النبوي الشريف

فأنا قررت اعفو عن كل الناس اللى غلطوا في حقي بأى شكل من الأشكال

قررت اسامحهم بلا تراجع


قررت اسامحهم بعد ما عرفت ان في شخص الرسول صلي الله عليه وسلم بشر بدخوله الجنة برغم انه مكنش بيقوم سوي بالفروض اللى عليه فقط من صلاه وصيام

لكن اللى دخله الجنة و خلا الرسول صلي الله عليه وسلم يبشر بدخوله الجنة انه لما كان بيجي ينام كان بيعفو عن كل الناس....بيعفو عن اي حد ظلمه او اساء في حقه....كان بيعفو عنهم عشان ربنا يعفو عنه


عفوت عن الجميع واتمني الكل يسامحني

اتمني اي حد غلطت في حقه يعفو عني


الميل ده جالى وحبيت انكم تستفيدوا منه

قال رسول الله صلى الله عليه وسلم : لما عُرج بي مررت بقومٍ لهم أظفار من نحاس يخمشون وجوهم وصدورهم.
فقلت: من هؤلاء ياجبريل ؟
فقال:
هؤلاء الذين يأكلون لحوم الناس ويقعون في اعراضهم


والحل هنا بيكون كفارة الغيبة
و هي ان تعتذر للشخص وتطلب منه مسامحتك , وتندم على اللي عملته
بس صعبة شوية يعني بتخجل
طيب
عندي الحل
الحل إننا كلنا نسامح بعضنا
على كل غيبة أو خطأ صار بيننا سواء عرفنا
أو ما عرفناه
و بتستفيد ايه ؟؟
صدقة تؤجر عليها , وسبب لمغفرة ذنوبك
قال تعالى : ( وسارعوا إلى مغفرة من ربكم وجنة عرضها السموات والأرض أُعدت للمتقين , الذين ينفقون في السراء والضراء والكاظمين الغيظ والعافين عن الناس
والله يحب المحسنين

طيب ازاي ؟؟ قول معايا

اللهم إني تصدقت بعِرضي على الناس وعفوت عمن ظلمني
فمن شتمني أو ظلمني فهو في حِل
اللهم إني سامحت كل من أغتابني أو ذكرني بسوء في غيبتي
وأسألك في ذلك الأجر والمغفرة وبلوغ مراتب المحسنين


يا ريت كلنا نسامح بعض

وكل سنة وانتوا طيبين بمناسبة اليوم المبارك ده

ويا ريت نحيي ذكرى مولد الحبيب المصطفى سيد الخلق بالاكثار من الصلاة والسلام عليه اللهم صلى وسلم وبارك على سيدنا محمد وعلى اله وصحبه اجمعين ربما تكون سبب فى شفاعة الحبيب لنا يوم القيامة