السبت، 20 ديسمبر، 2008

كله إلا التنتوفة

طبعا كلنا اليومين اللى فاتوا كان مقطوع عننا النت
ولاسباب غير معروفة
واللى يقولك دي سفينة كحتت في القاع فراحت قطعت السلك واللى يقولك ده معرفش عطل فني و اللى يقولك ده الكبل باش واتفرول واللى يقولك ده الموساد الاسرائيلي ولا المافيا ولا حتي احمد السقا في فيلم حرب اطاليا هما السبب ...المهم انها حجات غريبة كده ومايعة مقدرتش تقنعني
انا بقه قدرت اوصل للحقيقة وبكل هدوء
ومش هقدر اسكت اكتر من كده
ومحدش يسألنى عرفت منين
الحقيقة يا اخواني هي ان الفاعل هو ابو الشميطة
ايون
ابو الشميطة
ديك النهار كان النت موجود عادي...والحياه ماشية في سلام والدنيا شغاله وحبايبي المدونين مش مبطلين زيارة لمدونتي والمدونة بقت هتطق من الزوار
قوم ايه
السبب اللى اتوصلتله كان مقنع جدا
في جدع مش عرفة اسمه ايه
بس هو اسكندراني يعني من الاخر
وقف عند اللسان كده وكان معاه صنارة طويلة وبتلب
عارفين انتوا الصنارات اللى بتلب دي...اهيا دي
قوم الجدع بعزم ما فيه راح رامي الصنارة عشان يشمط سمكة لمحها جوة شوية
هوبة اللوئة
قوم وسعت منه العملية اوى
لدرجة انه بدل ما يشمط السمكة راح شامط كابل النت اللى ماشي تحت المية علي ايدك اليمين كده
يعني من الاخر اصلا الوصلة دي اولها متركب عندنا وبتدخل بقه علي بقية المحيط كده وانت مغوط
الجدع بقه مش يسيب
ولا يرخي الحبل
ولا يرمي الصنارة ويقول عوضي علي الله في الصنارة اللى بتلب
لا ده فضل يشمط يشمط بكل غل بعد ما ادرك انه شبك في سلك النت...لان الجدع ده كان مخنوق وزمئان من وصلة النت التقيلة امو 30 جنية اللى الجدع جارهم موصلهاله ومن جو النت عموما وده اللى اثبتته التحقيقات بعد كده
وفضل الجدع يشمط يشمط لحد ما سمع حاجة راحت عاملة تك...خشت...لوء
وهنا عرف ان السلك اتقطع بقه
راح لامم حاجته وخد صنارته اللبابة وطلع علي شقته يتحنجل وهو مبسوط اوي انه خربها علي نفسه وعلي الكل
العجيب بقه انه لما شغل النت لقا ان المواقع المصرية لسة شغاله عادي وبكل سفاقة
فحس ان فعلا في تباتة وغلاسة في الموضوع...اشمعنه يعني...لا بجد...يعني بعد كل الشمط اللى شمطه ونحرة قلبه يقضي علي كل المواقع الا المواقع المصرية
الراجل راح مبرء كده وقال اكيد المواقع المصرية كانت ملحومة كويس ...عليا وعلي اعدائي والغازية لازم تنزل...ولا لاستغلال النفوذ والحجات دي وراح واخد صنارته وطالع بيها علي نفس المكان عشان يكمل علي التنتوفة اللى لسة متقطعتش
لانه ادرك ان التنتوفة دي هي تنتوفة المواقع المصرية
يعني قطع كل المواقع اللى في العالم ما عدا التنتوفة المصرية
ولسة بيرمي الصنارة عشان يخلص علي التنتوفة
كانت الحكومة بقه شمت خبر منين منعرفش ووصل الى مكان الحادث فيلق من المتخصصين بقيادة امين الشرطة م.ع (هو وصاني مقولش اسمه عشان من تواضع لله رفعه وكده)
جروا الواد علي قسم اللبان او قسم الخليفة المأمون مش عارفة
بس اللى عرفاه كويس
أن الواد اتشمط وانه مرمي هناك دلوقت و طالع تييييييييييييييييييييت ؟؟؟؟؟
ويا ولود يا ولود يا ولود
ويا ابن ويا ابن ويا ابن
وكده
وراح واحد من المتخصصين لاحم الكابل بحتتين ازير وشريط لحام وخلاص يعني لموا العملية قوام قوام من قبل ما اي حد ياخد خبر وكده...ولو حصل ولسة النت تقيل فده عشان لسة اللحام منشفش لسة
خلاص...اديكوا عرفتوا...محدش بقه يعد يقول كيكي وميكي وهو مش عارف في ايه
كفاية بقه اوشاعات ونعد نتكلم في اعراض الناس اللى ملهاش ذنب
و و لا احمد السقا ولا اسامه انور عكاشة ليهم اي ذنب فى الموضوع ده علي فكرة
هو الواد ابن اللذينا الشماط ده
إلهي ما يكسب ولا يربح
ادوله خلوه يحرم يجي تاني جنب التنتوفة الجبان
كله إلا التنتوفة يا كلب