الجمعة، 2 يناير، 2009

يا ريت كلنا نتجمع ونعمل حاجة

ولأنى نفسي مسدودة اوي اوي
وحسة اني مليش حتي حق اضحك او افرح لاي شىء
ولاني كل ما اشوف النشرة واشوف صورة او لقطة لطفل مصاب او مقتول بعيط و بشعر بالاكتئاب وفقدان الأمل
ولاني شفت لقطة مازالت مأثرة فيا وهي لقطة لطفلة سنانها بتخبط في بعض بطريقة هستيرية من الرعب والفزع ...ولما شفتها وحسيت بعجزي مكنش في ايدي شىء غير اني اعيط بحرقة وبصوت مكتوم
بدور علي حاجة ممكن اعملها مش عارفة
عموما في دعوة للتجمع لزيارة المصابين الفلسطينين اعلنت عنها قوس قزح وانا هنقل البوست بتاعها هنا
خليكوا معاه
ويا ريت بجد نقدر نعمل حاجة عشانهم
*********************************************
السلام عليكم

ده أول بوست فى السنة الجديدة عن ميعاد لتجمع خيرى

والدعوة موجهة من إيناس صاحبة مدونة أوتار واللى بتمضى بإسم نهر الحب

الدعوة لزيارة الجرحى الفلسطينين بمستشفى الهلال الأحمرالمصري اللى في رمسيس

وعنوانها بالظبط كدة 34 شارع رمسيس بجوار جريدة الجمهورية

رقم تليفون المستشفى25750160

التجمع هيكون يوم الاربعاء الموافق 7 يناير الساعة 11 صباحا

هنتجمع قدام المستشفى وده رقم تليفون هيكون مع إيناس يوميها0188047779

يوم الأربعاء ده اجازة رسمى

التبرعات اللى محتاجينها

فلوس

ملايات سرير

لعب اطفال

ملابس وغيارات

عصاير

المستشفى مش محتاجة قطن او شاش أو الحاجات دى


و فى كمان دعوة من دعاء صديقة و جارة خيخة و اى كلام
لمشاركتها فى جمع تبرعات عينية لتوصيلها لأهل غزة

وده عن طريق لجنة الاغاثة اللى تبع نقابة الأطباء

و خيخة بالنيابة عنهاهتروح هى وإيناس يوصلوا التبرعات للنقابة

لجنة الإغاثة بتاعة نقابة الأطباء محتاجة كل ماتتخيلوه

بطاطين

قطن

ميكركروم

أطعمة معلبة

عصائر

شاش

مطهرات جروح

مضادات حيوية لإلتئام الجروح

يعنى أى حاجة هتنفع

فلو تحبوا تشاركونا بالتبرعات يبقى كتر خيركم ممكن جدا اللى هيجى المستشفى ومش هيقدر يروح بعد كدة نقابة الاطباء وعايز يبعت تبرع يبقى يديه لخيخة وايناس الحاجات وهم هوصلوها بالنيابة عنه

أخر حاجة اللى يحب يبعت تبرع لأهل غزة عن طريق الهلال الاحمرلازم يكون عامل كارنيه عضوية فى الهلال الاحمر وده بيتطلب خمسة جنيه و صورة للرقم القومى وش وظهر وعدد اتنين صورة شخصية وش وظهر

و بالكارنيه ده تقدروا تبعتوا تبرعات لأهل غزة مباشرة


ملحوظة : البوست ده منقول عن مدونة بنت خيخة واى كلام

و هو دعوة للمشاركة بايجابية فى مساعدة غزة

اتمنى مشاركاتكم حتى لو بالمجهود