معجزة إلهية بالصور... بجد وهمية

السلام عليكم ورحمة الله وبركاته
كنت ديما أسمع عن ان مراحل خلق الانسان ذكرت في القرأن
لكن فعلا متخيلتش المراحل دي بتكون اذاي ولا بيحصل فيها ايه غير لما فعلا قرأت عن مراحل خلق الانسان و شفت الصور العظيمة دي في ميل جالي
حبيت اشارككم الإستفادة
ولا تنسونا من صالح دعاؤكم

بوست مهم فيه رد علي بعض التعليقات الى فاتت

سلام عليكم ورحمة الله وبركاته

البوست ده كنت هكتبه بعد يوم من نشر البوست التاني لكن للأسف جهازي باظ تماماً

وصممت اني اتصرف واشوفلي اي مكان اكتب منه البوست وده لأن كان جالي في التعليقات تعليق من أخ فاضل و سابلي لينكات لفتاوي عن موضوع التلاتة جنية بتوع فودافون ده وقالي اقري الفتاوي دي واتأكدي عشان ميبقاش في تضليل في الفتوى

و انا لما نشرت الميل اللى جالي كان كل همي ان الفائدة تعم

وخاصة لأني كنت شايفة ان معني ان الشركة بتاعت فودافون لما في العادي تكون بتديك 3 جنية رصيد طالما انت معاك فلوس وشحنت بفلوس
لكن وقت ما تيجي تقولها سلفيني لانك مزنوق فتروح تقولك هسلفك 2 ونص بس لما تردهم تردهم 3 جنية ومش فاهمة ايه الخدمة اللى قيمتها نص جنية

اسمها ايه يعني؟ خدمة استغلال للمزنوق ولا ثمن التسليف ولا ايه بالظبط
فانا وجدت ان ده ربا بين وواضح مع العلم اني لم ارتقي لأكون مصدر تصديق علي فتوى من عدمه ورأى غير ملزم غير لنفسي فقط

و كنت قرأت في باب البيوع من بعض كتب الفقه وموجدتش حاجة تماثل أو شبيهة بنظرية بيع المنفعة ده
وانا لما قرأت الفتاوي ملقتش فيهم غير فتوي واحدة هي اللى تخص خدمة سلفني 3 جنية
والفتوي كانت كالتالي
السؤال: أسأل بخصوص خدمة تقدمها أحد شبكات الجوال في مصر تسمى خدمة "سلفني .. شكرا" حيث يمكن للمستخدم اقتراض مبلغ ثلاث جنيهات إذا نفذ رصيده ويسددها بعد الشحن، ولكن القيمة الفعلية التي يتم اقتراضها هي 2.5 جنيها لأن ثمن الخدمة نصف جنيه . فهل هذا يعتبر ربا؟
الجواب :
الحمد لله
لا بأس بالاشتراك في هذه الخدمة ؛ لأن هذا بيع منفعة وليس بيع مالِ بمال ، كما أنه ليس قرضا ، فالشركة توفر خدمة الاتصال مع الدفع المؤجل بسعر أعلى من الدفع نقداً ؛ فمنفعة الاتصال التي قيمتها نقداً جنيهان ونصف الجنيه تباع بثلاثة جنيهات مؤجلة تستوفيها الشركة من العميل عند قيامه بشحن جواله ، وهذا البيع جائز .

والشركة لا تقرضك في الحقيقة مالا ، ثم تأخذه بعد ذلك بزيادة ، حتى يقال : إنه ربا ، وإنما تبيعك الخدمة بثمن أعلى ، والزيادة في الثمن مقابل التأجيل في الدفع لا حرج فيه .
وقد جاء في قرارات "مجمع الفقه الإسلامي" ، قرار رقم 51 (2/6) :
"تجوز الزيادة في الثمن المؤجل عن الثمن الحالّ [يعني : النقدي]" انتهى .
نقلا عن كتاب "قرارات وتوصيات مجمع الفقه الإسلامي" (ص 109).
وانظر جواب السؤال رقم (117808) .
والذي أوقع الإشكال في المسألة تسمية هذه المعاملة "سلف" أو "قرض" ، وهي تسمية غير صحيحة ، وإنما هي بيع منفعة [الاتصال الهاتفي] بثمن مؤجل أكثر من الثمن النقدي .
فأنا عشان فعلا اترك للناس الفتوتين ومبقاش بحجر علي الاراء

وعشان اتبرأ من اي خطأ

وخاصة اني فعلا مكنتش اعرف شىء عن بيع المنفعة وما زلت مش عارفة صراحة

فقررت اسيبلكم الفتوي وانتوا تشوفوا اللى قلبكم يستقر ليها

وانا بردو مازلت بقول اني مش مرتاحة عموما لأى من الفتوتين وحصل عندي نوع من الشك والريبة

عشان كده انا بنصح نصيحة تانية لله ودي انا واثقة من صحتها بشدة

ويا ريت نمشي بيها كلنا في حياتنا عشان قلبنا يكون مرتاح و نرتاح في حياتنا

عن أبي عبدالله النعمان بن بشير رضي الله تعالى عنهما قال سمعت رسول الله صلى الله عليه وسلم يقول إن الحلال بين وإن الحرام بين وبينهما أمور مشتبهات لا يعلمهن كثير من الناس فمن اتقى الشبهات فقد استبرأ لدينه وعرضه ومن وقع في الشبهات وقع في الحرام كالراعي يرعى حول الحمى يوشك أن يرتع فيه ألا وإن لكل ملك حمي ألا وإن حمى الله محارمه ألا وإن في الجسد مضغة إذا صلحت صلح الجسد كله وإذا فسدت فسد الجسد كله ألا وهي القلب رواه البخاري ومسلم هذا الحديث صحيح متفق على صحته

فأنا بعمل بنصيحة رسولي الكريم صلي الله عليه وسلم
بان اي حاجة هيحصل اختلاف عليها انا هتجنبها وخلاص

لأن كل امر هنلاقي الناس اختلفوا حوله هنلاقي ان كل مجموعة منهم متمسكة برأيها وليهم أدلتهم القوية ليهم والضعيفة لغيرهم و العكس

فأنا ايه يضمني إن كان ده الصح و لا الغلط

ورسولي صلي الله عليه وسلم كان عارف ان هيحصل كده بعد موته

فنصحنا بنصيحة تانية مطلقة وغير مقيدة بموضوع معين ولا زمن معين

فأنا استبرأ لديني وأخاف من قصور في الفتوى عند كلا الطرفين

واحترم نفسي وابعد عن الشك عشان مقعش في الحرام وأجي يوم القيامة الاقي نفسي اصلا حياتي كلها معاصي والاقي نفسي أجتمع فيا ذلات العلماء

و اصلا اساساً يوم القيامة مش مجال مراهنات ويا أطلع تمام يا مطلعش

لما الحاجة تكون هايفة وتافهة وملهاش لزمة في حياتنا اصلا ونقدر نعيش من غيرها بلاش نتمسك بيها ونكثر التساؤلات عنها ونعد نعاند في نفسنا

وخاصة لما تكون الشبهه في كون الخدمة دي ربا ولا لا

وهنا لو طلعت ربا مثلا يبقه انا وقعت في كبيرة من الكبائر

واللى بتفوق في جرمها أكبر الكبائر وهو زنا المحارم
و كما قال سيدي وسيدكم محمد رسول الله صلي الله عليه وسلم
عن الحسن بن علي بن أبي طالب سبط رسول الله ، وريحانته رضي الله عنه قال : " حفظت من رسول الله صلى الله عليه وسلم : ( دع ما يريبك ، إلى ما لا يريبك ) رواه الترمذي وقال : حديث حسن صحيح .

يعني سيب اي حاجة شاكك فيها ومش عارفلها والناس اختلفوا حولها للشىء اللى مفهوش شك

فمن الأخر كده انا شمة ريحة شك او ريحة ربا في موضوع التلاتة جنية دول يبقه اترك الخدمة دي وبلاش استخدمها إلا في الضرورة لو خلاص الدنيا بتتهد من حولي

وإلحاقاً بالموضوع ده

كان جالي تعليق تاني بردو

وكان بيقول في تعليقه رأيه الخاص بيه

لكن ختم رأيه بقوله

"اه نسيت اقول الأخ اللى بيسأل الشيخ ده شخص تافه لأنه مشاكلنا كمسلمين اكبر من كدة و الله عيب على الشيخ و عيب على السائل كمان"

أولاً: مينفعش ابداً ابدأ اننا نغلط في اي شخص سواء بقه غلط مغلطش

ثانياً: الشخص السائل مغلطش ابدا بل بالعكس ربنا يكرمه...والشخص اللي أفتي ربنا يبارك فيه ويعزه.

ثالثاً: مفيش حاجة في دينا أسمها مشاكل كبيرة وصغيرة الحاجة الصغيرة اللى يتضح انها حرام تبقه حرام وكبيرة...والحاجة الكبيرة الحرام بردو كبيرة

الشاهد من كلامي وبإختصار

أن في ناس مبتعملش كبائر الحمد الله لكن في نفس ذات الوقت يهمهم جدا ميقعوش في اي صغائر بردو

و لأن الاصل في البني ادم لانه لا يقع في صغائر ولا كبائر اصلا

و الواجب علينا و اللى ربنا خلقنا عشانه اننا نعبده

و إن كنا بنقع في اي معصية فده لاننا مش معصومين ولاننا بشر وربنا رحيم غفور

ولأن الاصل بردو في اي حد يشك في حرمانية شىء أنه المفروض يسأل اهل العلم...و أهل العلم الواجب عليهم انهم يفتوا مهما كانت الفتوى بسيطة وحاجة بديهية جدا...لأن اللى سأله مسألوش إلا عشان هو مش عارف

فلو حصل مثلا وجه شخص سأل الشيخ وقاله أفتيلي يا شيخ هل ينفع اشرب وانا واقف؟

يروح واحد يسمعه ويقوله يا هايف انت سيبت الدنيا والبلاوي ورايح تسأل الشيخ أشرب وانا واقف ولا لا...ده انت هايف"

يروح الشيخ يرد عليه ويقوله

"الشرب واقفاً مكروه.....لأن الرسول صلي الله عليه وسلم كره الشرب واقفاً و إنما أوصانا بالشرب جالسين...لكن في نفس الوقت الرسول صلي الله عليه وسلم شرب واقفاً من ماء زمزم لما كان في الحج وده لأن كان في ضرورة لأن الزحام منع الرسول صلي الله عليه وسلم انه يشرب جالساً...وبكده يبقه الشرب واقفاً مكروه لكن في نفس الوقت لو في ضرورة ينفع أننا نشرب واقفين...و ده كله من أداب الشراب وطبعاً السنة عن رسولنا إتباع الشرب جالساً"

الشخص اللى سأل الشيخ ده مش هايف....الشخص عاوز يستن بالرسول...والحجات الكبيرة هو مراعيها ومش مقصر...وحتي لو مقصر فعلي الاقل هو عارف انه مقصر و بيستغفر...لكن هو مش عارف حكم الشرب واقفاً....هل لما يسأل يبقه هايف؟...شخص ومش عاوز يعمل اي هفوة حرام..يبقه هايف.

لكن واحد خطر في باله و شك في التلاتة جنية بتوع فودافون يكونوا حرام...هل المفروض انه يتجاهل شكه ؟...ولا يروح يسأل اهل العلم؟؟؟

وخاصة ان الحاجة اللى احنا شايفنها هايفة لو طلعت فعلا ربا فهي هنا مبقتش هايفة

دي بقت أكبر كبيرة من الكبائر

أكبر من كبيرة زنا المحارم

و الربا هي الكبيرة الوحيدة اللى ربنا قال فيها في القرأن بلهجة شديدة جدا...مذكرتش في القرأن غير مرة واحدة باللهجة الشديدة دي

يا أيها الذين امنوا اتقوا الله وذروا ما بقي من الربا إن كنتم مؤمنين فَإِنْ لَمْ تَفْعَلُوا فَأْذَنُوا بِحَرْبٍ مِنَ اللَّهِ وَرَسُولِهِ وَإِنْ تُبْتُمْ فَلَكُمْ رُءُوسُ أَمْوَالِكُمْ لَا تَظْلِمُونَ وَلَا تُظْلَمُونَ (البقرة 278-279)

يعني هي اللهجة الوحيدة اللى ربنا قال فيها للى بيرتبي أنك كده بتقول تعالى يا رب حاربني انت و الرسول

وهي لهجة اشد من اللهجة اللى قيل فيها عن بني أسرائيل في القرأن أنهم قالوا لسيدنا موسي

اذهــب أنــت وربــك فـقـاتـلا إنــا هـاهـنـــا قــاعـــــدون

لانهم بيقولوا لموسي روح انت وربنا حاربوا أعدائنا

مش بيقولوا تعالا يا رب انت و رسولك وحاربنا!!!!
ربنا يهديني ويهدي جميع المسلمين

اوعه تكون بتستلف 3 جنية من فودافون

الميل ده جالي ( ربنا يكرم كاتبه ويجازيه خير ) ووجدت انه مهم اوى لاي شخص بيخاف يقع في الشك وبيحاول يجتنب اي شبهه
الميل مهم وممكن كلنا نكون بنقع في حاجة حرام واحنا مش واخدين بالنا
وخاصة لكل الناس اللى بيستلفوا ال 3جنية من الشركة لما رصيدهم بيخلص
ومحدش يجي يقولي انتوا هتيجوا في الهايفة وتتصدروا طب انا مكنتش اعرف وبعدين دي حاجة صغيرة وثانوية
هقولك اللى فات مش مشكلة لكن طالما عرفت يبقه هتتحاسب من ساعة ما عرفت
والحرام مفهوش لا حاجة صغيرة ولا كبيرة كله حرام
ان عظيم النار من مستصغر الشرر واياكم ومحقرات الذنوب فهي تجتمع علي صاحبها حتي تهلك

***************************

مين فينا بئه لما بيخلص رصيده بيقرر إنه يستلف 3 جنيه من الشركه
أكيد كتير مننا
طيب عارفين الشركه بتدينا كام ؟؟
بتدينا 2 جنيه ونص
وبندفعها 3 جنيه
طيب ياجماعه دلوقتي الحكايه دي تعتبر داخله في الربا ولا لأ ؟؟
طيب دلوقتي احنا ندخل تحت طائله المتعاملون بالربا
قال رسول الله صلى الله عليه وسلم ( لعن الله آكل الربا وموكله وشاهديه وكاتبه)
رواه أحمد وأبو داود والترمذي والنسائي وابن ماجة

•••••••••••••• :: Ƹ̵̡Ӝ̵̨̄Ʒ :: •••••••••••••

بسم الله الرحمن الرحيم
اللهم صل وسلم وبارك علي سيدنا محمد وآله وسلم
ده إن شاء الله الرد النهائي لهذا الموضوع نفعنا الله بما نقول وبما نقرأ وبما نسمع
قبل اي حاجه ياجماعه أحب أوجه ليكو إن هذه فتوي من كذا عالم وشيخ من علمائنا
وشيوخنا الكرام حفظهم الله تعالي
لما سألنا العلماء .... في حكم اني استلف 2جنيه ونص من فودافون
وأدفعها 3 جنيه ايه حكمها قالو بالإجماع ان لها حكمان

اول حكم : وهي شبهه ربا

ثاني حكم : انها ربا محض اي ربا حقيقي واقع ياجماعه

وهانشرح ده كله إن شاء الله تعالي
لكن قبل كل ده عاوزك تعرف انت وهي انها مستوحاه من فكره القرض
ولماذا حرم الشرع القرض .. لأنه يعطي مهله يستغل فيها حاجه الناس
بمعني اني هاسلفك حاجه ولما يبئه معاك فلوس هاخد مثلا الحاجه اللي اديتهالك
زائد ايه ؟؟ زائد حساب الوقت ده يعني ازود عليك فلوس
•••••••••••••• :: Ƹ̵̡Ӝ̵̨̄Ʒ :: •••••••••••••
اولا : لما سميت شبهه في ربا ؟؟

لأن بعض العلماء يقولون انها من ربا والبعض يقولون لا تعتبر ربا

فهنا تولد شبهه مابين القولين

ورسول الله صلي الله عليه وسلم قال في حديثه الصحيح

دع مايريبك الي مالايريبك

يعني ايه ...؟ يعني ابعد عن اي حاجه فيها شبهه

إمتي تكون هي شبهه في الوقوع في الربا ؟؟

لما تكون في حالة الضروره يعني ايه ضروره ...؟

يعني لو انا مااتصلتش في الوقت ده هايحصل ليا حاجه في النفس او المال

او او او يعني دلوقتي في حالة الضروره القصوي يبئه لو استلفت هاتكون شبهه في ربا
•••••••••••••• :: Ƹ̵̡Ӝ̵̨̄Ʒ :: •••••••••••••

اما الحكم التاني : وهي أن تكون ربا محض اي ربا حقيقي ياجماعه
لو كان إني استلفت في حالة عدم الضروره
يبئه انا دلوقتي وقعت في الربا الفاحش والعياذ بالله
فهنا ياجماعه الشركه بتتعامل بالقرض المحرم شرعا
وماتقيسش ده علي مصاريف الشحن علي الكارت
اي محل بيبيع الكارت مثلا ب10 ونص بدلا من 10

دي اسمها تجاره .. لكن الشركه هي اساسا يعني بتديك ال3 جنيه هي 3 جنيه دقايق لو موش هاتستلف ,, نيجي لما نستلف تزود ليه نص جنيه

دي زي مثال مثلا واحد صاحبك فاتح مكتب اتصالات انت رايح تشتري منه كارت ب10 جنيه وهو بيبيعه ب10 ونص بس انت موش معاك فلوس هو قال لك انا هاديك دلوقتي الكارت ولما يبئه معاك فلوس حاخد منك 11 جنيه
يبئه ده اسمه ربا ياجماعه .. والشركه دلوقتي بتتعامل بالحكايه دي
•••••••••••••• :: Ƹ̵̡Ӝ̵̨̄Ʒ :: •••••••••••••
فيه فرق بين البيع ,,,, وبين الربا
قال الله تعالي
وأحل الله البيع وحرم الربا
صدق الله العظيم
•••••••••••••• :: Ƹ̵̡Ӝ̵̨̄Ʒ :: •••••••••••••

ياجماعه علشان خاطري ,, انا عارف إن كلنا كنا بنستخدم الخدمه دي
لكن بجد بلاش نقع تحت مسمي المتعاملين في الربا
ونكون ملعونين عند الله

رعب حقيقي والله

سلام عليكم ورحمة الله وبركاته
الاول كانت اختي تيجي ترد علي التليفون تقول السلام عليكم ورحمة الله وبركاته
كنت اقولها يا بنتي انجزي انتي هتقولي خطبة خلصتيلي الرصيد
لكني قريب اوي عرفت ان فضل قول السلام كامل او رده كاملا بيخلي الانسان ياخد 30 حسنة
اما لو قلنا سلام عليكم هناخد 10 حسنات بس
ولو قلنا سلام عليكم ورحمة الله ناخد 20
عشان كده خلونا نهتم اوي برد السلام كاملا وخلونا بردو نلقي السلام كاملا سواء في مدونة او تليفون او اي مكان
ده احنا في عرض حسنة....يمكن منحسش بقيمتها الان لكن هنحس بقيمتها واحنا مدفونين بين التراب في يوم مظلم وبارد واهالينا ماشيين وسايبنا
البوست ده مفهوش تعليقات وقصير جدا
*********************************
كتير اوي اسمع ايات عن النار
ووصف لجهنم
وان نار الدنيا دي ما هي الا ذرة من سبعين ذرة من دخان نار جهنم وكده
لكني بردو مازلت مش متخيلاها
كان جالي ايميل خوفت منه اوي لما شفت منظر النار اللى فيه برغم انها مازالت نار الدنيا
ووالله النار اللى فيه كفيلة بانها تخليني معصيش ربنا ابدا

بكلمات بسيطة اوي لو قلناها بعد كل صلاه هتيجي النار يوم القيامة تقول
(اللهم انه كان يستجيرك مني بعد كل صلاة اني لا اريده)


الدعاء هو ان تقول (اللهم اجرني من النار)
3 مرات بعد كل صلاة
اللهم اجرني من النار
اللهم اجرني من النار
اللهم اجرني من النار




تخيل نفسك ماشي بس علي الارض دي
والله ما تيجي ذرة في نار جهنم







مش محتاجة طبعا اذكركم بأيات وصف جهنم ولا عذاب العصاه فيها
كلنا عارفين
خلونا نتعود نقولها
يمكن منحسش بقيمتها دلوقتي لكن هنحس بقيمتها يوم تشخص الأبصار
اللهم اجرنا من النار وجميع المسلمين والمسلمات الاحياء منهم والاموات
اللهم حرم لحمي وجلدي وعظمي وشعري من نار جهنم انا وجميع والمسلمين
امين امين امين

مشربتش من نيلها

البوست ده منقول

ممشربتش من نيلها؟؟
طب جربت تغنيلها؟؟
ها؟





حاول تعيش اللحظة
حاول
حاول
بقولك
حاول
انت مبتحولش لية؟؟





يلة عييييييييش




بلدنا آمانة فى إيدينا




نعليها مادام عايشين



نعيش فيها سنين و سنين




و إحنا مطمين


ما شربتش من نيلها؟



طب جربت تغنيلها؟؟


جربت فى عز ما تحزن تمشى فى شوارعها و تشكيلها



ما مشيتش فى ضواحيها؟



طيب ما كبرتش فيها؟؟


ولا ليك صورة ع الرمله كانت ع الشط



بموانيها؟؟



دور جواك تلقاها هى الصحبة و هى الأهل



عشرة بلدى بتبقى نسيانها ع البال مش سهل



يمكن ناسى لإنك فيها



مش واحشاك و لا غيبت عليها



بس اللى مجرب و فارقها قال فى الدنيا ما فيش بعديها



إن غبت بحنلها و أنسى الدنيا و أجيلها


و إن جيت أنسى تفكرنا بمليون ذكرى القلب شايلها








غالية بلدنا علينا... و ها تفضل فى عنينا


**** و مدام بنحب بلدنا... تبقى ها تتغير بإيدنا ****


إحنا اللى نعليها... بإيدينا نخليها



أجمل لينا و لولادنا مهما العمر يعدى عليها

البوست ده هيخيلك تعيط

ديما احنا البشر أكتر حاجة تشدنا هو اننا نسمع قصة واحد مات

ونحب اوي نسمع اخر كلام نطق بيه قبل موته

واحداث الوفاه

و العلامات اللى ظهرت عليه

معرفش ليه بنحب نعرف الحجات دي...هل لأننا عارفين اننا هنكون في نفس الموقف ده في اي لحظة...وعوزين نعرف هنحس بأيه

هل لان كلام في المواضيع دي بيكون مشوق

هل لان اخر كلام لواحد توفي بيكون كلام مؤثر اوي

الله اعلم

البوست ده جالي في ميل وانا نقلته ليكم لانه بجد قصة موت شخص مينفعش كلنا منبقاش عارفينها وحافظينها عن ظهر قلب

دي قصة موت نبينا سيدي وسيدكم محمد صلي الله عليه وسلم

واخر كلمات قالها قبل موته...واخر وصية وصا بيها المسلمين قبل موته بساعات

وأحداث طلوع الروح و سكرات الموت

وسلامه لينا احنا بالعنية

لان الرسول صلي الله عليه وسلم ذكرنا احنا بالذات في اخر كلمة ليه لعامة الناس

اتمني ان القصة دي متقفش عندنا ونبعتها في ميلات او ننشرها في مدوناتنا لعلها تكون شفيعا لنا يوم القيامة وتكون حسنة جارية علي ارواحنا

********************************

قبل وفاة الرسول صلى الله عليه وآله وسلم
كانت حجة الوداع، وبعدها نزل قول الله عز وجل
( اليوم أكملت لكم دينكم وأتممت عليكم نعمتي ورضيت لكم الاسلام دينا ( فبكي أبو بكر الصديق عند سماعه هذه الآيه.. فقالوا له ما يبكيك يا أبو بكر أنها آية مثل كل آيه نزلت علي الرسول .. فقال : هذا نعي رسول الله ...وعاد الرسول صلى الله عليه وسلم .. وقبل الوفاه بـ 9 أيام نزلت آخر ايه من القرآن
( واتقوا يوما ترجعون فيه الي الله ثم توفي كل نفس ما كسبت وهم لا يظلمون( ...وبدأ الوجع يظهر علي الرسول صلى الله عليه وسلم فقال : ) أريد أن أزور شهداء أحد ) فذهب الي شهداء أحد ووقف علي قبور الشهداء وقال :
( السلام عليكم يا شهداء أحد، أنتم السابقون وإنا إنشاء الله بكم لاحقون، وإني إنشاء الله بكم لاحق
(. وأثناء رجوعه من الزياره بكي رسول الله صلى الله عليه و سلم قالوا ما يبكيك يا رسول الله ؟ قال
:( اشتقت إلي إخواني ) ، قالوا : أولسنا إخوانك يا رسول الله ؟ قال :
( لا أنتم أصحابي، أما إخواني فقوم يأتون من بعدي يؤمنون بي ولم يروني ( .اللهم أنا نسالك أن نكون منهم وعاد الرسول صلى الله عليه وسلم ، وقبل الوفاه بـ 3 أيام بدأ الوجع يشتد عليه وكان في بيت ميمونه، فقال: ( اجمعوا زوجاتي ) ، فجمعت الزوجات ، فقال النبي: ( أتأذنون لي أن أمرض في بيت عائشه ؟ ) فقلن: أذن لك يا رسول الله فأراد أن يقوم فما استطاع فجاء علي بن أبي طالب والفضل بن العباس فحملا النبي وخرجوا به من حجرة ميمونه الي حجرة عائشة فرآه الصحابة علي هذا الحال لأول مره .. فيبدأ الصحابه في السؤال بهلع:ماذا أحل برسول الله.. ماذا أحل برسول الله. فتجمع الناس في المسجد وامتلأ وتزاحم الناس عليه.فبدأ العرق يتصبب من النبي صلى الله عليه وسلم بغزاره، فقالت عائشة : لم أر في حياتي أحد يتصبب عرقا بهذا الشكل . فتقول: كنت آخذ بيد النبي وأمسح بها وجهه، لأن يد النبي أكرم وأطيب من يدي. وتقول : فأسمعه يقول :( لا اله إلا الله ، إن للموت لسكرات ). فتقول عائشه : فكثر اللغط ( أي الحديث ) في المسجد اشفاقا علي الرسول صلى الله عليه وسلم فقال النبي :( ماهذا ؟ ) . فقالوا : يارسول الله ، يخافون عليك فقال : ( احملوني إليهم ) . فأراد أن يقوم فما استطاع ،فصبوا عليه 7 قرب من الماء حتي يفيق . فحمل النبي وصعد إلي المنبر.. آخر خطبه لرسول الله و آخر كلمات له فقال النبي صلى الله عليه وسلم : ( أيها الناس، كأنكم تخافون علي )
فقالوا : نعم يارسول الله . فقال :
( أيها الناس، موعدكم معي ليس الدنيا، موعدكم معي عند الحوض..والله لكأني أنظر اليه من مقامي هذا. أيها الناس، والله ما الفقر أخشى عليكم، ولكني أخشى عليكم الدنيا أن تنافسوها كما تنافسها الذين من قبلكم، فتهلككم كما أهلكتهم ) ...ثم قال :( أيها الناس ، الله الله في الصلاه ، الله الله في الصلاه ) بمعني أستحلفكم بالله العظيم أن تحافظوا علي الصلاه ، وظل يرددها ، ثم قال :
( أيها الناس، اتقوا الله في النساء، اتقوا الله في النساء، اوصيكم بالنساء خيرا ) ثم قال :( أيها الناس إن عبدا خيره الله بين الدنيا وبين ما عند الله ، فاختار ما عند الله )
فلم يفهم أحد قصده من هذه الجمله ، وكان يقصد نفسه ، سيدنا أبوبكر هوالوحيد الذي فهم هذه الجمله ، فانفجر بالبكاء وعلا نحيبه ، ووقف وقاطع النبي صلى الله عليه وسلم وقال : فديناك بآبائنا ، فديناك بأمهاتنا ، فديناء بأولادنا ، فديناك بأزواجنا ،فديناك بأموالنا ، وظل يرددها ....فنظر الناس إلي أبو بكر ، كيف يقاطع النبي صلى الله عليه وسلم .. فأخذ النبي صلى الله عليه وسلم يدافع عن أبو بكر قائلا :( أيها الناس ، دعوا أبوبكر ، فما منكم من أحد كان له عندنا منفضل إلا كافأناه به ، إلا أبوبكر لم أستطع مكافأته ، فتركت مكافأته إلي الله عز وجل ، كل الأبواب إلى المسجد تسد إلا باب أبوبكر لا يسد أبدا ) وأخيرا قبل نزوله من المنبر .. بدأ الرسول بالدعاء للمسلمين قبل الوفاه كآخر دعوات لهم ، فقال :( آواكم الله ، حفظكم الله ، نصركم الله ، ثبتكم الله ، أيدكم الله ) .. وآخر كلمه قالها ، آخر كلمه موجهه للأمه من علي منبره قبل نزوله ، قال :( أيها الناس ، أقرأوا مني السلام كل من تبعني من أمتي إلي يوم القيامه ) . وحمل مرة أخرى إلى بيته. وهو هناك دخل عليه عبد الرحمن بن أبي بكر وفي يده سواك، فظل النبي ينظر الي السواك ولكنه لم يستطيع ان يطلبه من شدة مرضه. ففهمت عائشه من نظرة النبي، فأخذت السواك من عبد الرحمن ووضعته في فم النبي، فلم يستطع أن يستاك به، فأخذته من النبي وجعلت تلينه بفمها وردته للنبي صلى الله عليه وسلم مره أخرى حتى يكون طريا عليه فقالت : كان آخر شئ دخل جوف النبي صلى الله عليه وسلم هو ريقي ، فكان من فضل الله علي أن جمع بين ريقي وريق النبي قبل أن يموت ...تقول عائشه : ثم دخلت فاطمة بنت النبي صلى الله عليه وسلم ، فلما دخلت بكت ، لأن النبي صلى الله عليه وسلم لم يستطع القيام ، لأنه كان يقبلها بين عينيها كلما جاءت إليه .. فقال النبي صلى الله عليه وسلم :
( ادنو مني يا فاطمه ) فحدثها النبي صلى الله عليه وسلم في أذنها ، فبكت أكثر . فلما بكت قال لها النبي صلى الله عليه وسلم:( أدنو مني يا فاطمه ) فحدثها مره أخري فياذنها ، فضحكت ..... ( بعد وفاته سئلت ماذا قال لك النبي صلى الله عليه وسلم ، فقالت : قال لي في المرة الأولى :( يا فاطمه ، إني ميت الليلة ) فبكيت ، فلما وجدني أبكيقال :( يا فاطمه ، أنت أول أهلي لحاقا بي ) فضحكت . تقول عائشه : ثم قال النبي :( أخرجوا من عندي في البيت ) وقال :
( ادنو مني يا عائشه ) فنام النبي صلى الله عليه وسلم علي صدر زوجته ، ويرفع يده للسماء ويقول :
( بل الرفيق الأعلى، بل الرفيق الأعلي ) .. تقول عائشه: فعرفت أنه يخير.
دخل سيدنا جبريل على النبي صلى الله عليه وسلم وقال : يارسول الله ، ملك الموت بالباب ، يستأذن أن يدخل عليك ، وما استأذن علي أحد من قبلك فقال النبي :( ائذن له يا جبريل )فدخل ملك الموت على النبي صلى الله عليه وسلم وقال : السلام عليك يا رسول الله ، أرسلني الله أخيرك ، بين البقاء في الدنيا وبين أن تلحق بالله فقال النبي :
( بل الرفيق الأعلى ، بل الرفيق الأعلى ) ووقف ملك الموت عند رأس النبي وقال : أيتها الروح الطيبه ، روح محمد بن عبد الله ، أخرجي إلي رضا من الله و رضوان ورب راض غير غضبان .....تقول عائشة: فسقطت يد النبي صلى الله عليه وسلم وثقل رأسه في صدري ، فعرفت أنه قد مات ... فلم أدري ما أفعل ، فما كان مني غير أن خرجت من حجرتي وفتحت بابي الذي يطل على الرجال في المسجد وأقول مات رسول الله ، مات رسول الله .
تقول: فانفجر المسجد بالبكاء. فهذا علي بن أبي طالب أقعد، وهذا عثمان بن عفان كالصبي يأخذ بيده يمنى ويسرى وهذا عمر بن الخطاب يرفع سيفه ويقول من قال أنه قد مات قطعت رأسه، إنه ذهب للقاء ربه كما ذهب موسي للقاء ربه وسيعود ويقتل من قال أنه قد مات. أما أثبت الناس فكان أبا بكر الصديق رضي الله عنه دخل على النبي واحتضنه وقال :
وااا خليلاه ، واااصفياه ، وااا حبيباه ، وااا نبياه . وقبل النبي وقال: طبت حيا وطبت ميتا يا رسول الله.ثم خرج يقول : من كان يعبد محمد فإن محمدا قد مات ، ومن كان يعبد الله فإن الله حي لا يموت ... ويسقط السيف من يد عمر بن الخطاب، يقول: فعرفت أنه قد مات... ويقول: فخرجت أجري أبحث عن مكان أجلس فيه وحدي لأبكي وحدي....ودفن النبي صلى الله عليه وسلم و فاطمه تقول : أطابت أنفسكم أن تحثوا التراب على وجه النبي ... ووقفت تنعي النبي وتقول:
يا أبتاه ، أجاب ربا دعاه ، يا أبتاه ، جنة الفردوس مأواه ، يا أبتاه ، الى جبريل ننعاه .ترى، هل ستترك حياتك كما هي بعد وصايا رسول الله صلى الله عليه وسلم لك في آخر كلمات له ؟؟

إليك الاختيار

ده بجد ده ولا كدة وكدة!!!

السلام عليكم و رحمة الله وبركاته

النهاردة ركبت المترو وكان المترو زحمة جدا

شدني منظر مميز جدا

اتنين واقفين جنب بعض راحت واحدة منهم حطت الأيشارب بتاعها علي مناخيرها...راحت التانية مطلعة منديل معطر وراحت مسحة بيه وشها وفردت المنديل في ايدها وحطته علي المسورة الحديد اللى جنب الكنبة اللى في المترو ومسكت بيها الحديدة وراحت مغطية مناخيرها بردو بالايشارب

رحت انا علطول بصيت لايدي لقيتني لابسة جوانتي وبصيت لوشي لقيتني لابسة النقاب

رحت لقيت نفسي مش مضطرة لا اطلع منديل معطر امسك بيه الحديدة ولا مضطرة اسد مناخيري بالطرحة
راح جه في بالي علطول مشهد الشخص وزير الصحة اللى بيهدد ويتوعد فيه للممرضات اللى لابسين النقاب بان اللى عوزة تلبس النقاب تعد في بيتها وتسيب شغلانتها واللى هتشتغل تقلع النقاب وانهم هيصدروا قانون بكده

و كأن الشخص ده ساب كل حاجة في مشاكل الطب والمستشفيات وكل الهم اللى الغلابة المصريين بيعانوه بسبب مستشفياتنا العدمانة الصدمانة و قرر انه يجند نفسه ويجند ماله وما يملك ليحارب النقاب

وقال حجته هو والناس العجيبة اللى بيخصصوا مدوناتهم مخصوص لسب النقاب و الملتحيين

أن النقاب بينقل جراثيم وبيأذي المرضي وبيعزل الممرضة عن المريض

علي اساس ان اللى بتلبس النقاب دي المفروض انها خلاص بتبقه حامل خطير للجراثيم

يا ناس اتقوا الله ...انتوا مش لاقيين حاجة تتحججوا بيها في حربكم على النقاب

وهنا احب اوضح شىء مهم جدا الناس فهمينه غلط جدا عن المنتقبات و الملتحيين

مش معني اني لبست نقاب او شخص التحي اني خلاص كده خدت الحصانة ومحدش يستجرا ينتقدني...وانى استحاله اغلط والمفروض اني مبقتش ذي الناس العاديين

المنتقبة ذيها ذي اي شخص عادي ونقابها ده ما هو الا علاقة بينها وبين ربها

بس بردو الناس بقه متسبش الدنيا كلها وتسيب كل البلاوي وتيجي متمسكش غير في المنتقبات و الملتحيين ويعدوا يشتموا ويلعنوا و كأن كل البلاوي مبتجيش غير من الناس دي

خلينا منصفين شوية ونراعي ربنا في كلامنا

وعوزين ننتقد يبقه ننتقد سلوك معين اكيد بيقوم بيه المنتقبات و المتبرجات والناس اللى من غير هدوم كمان...فننقتد الكل ومنقسمش المجتمع بأيدنا نصين وكأن المنتقبات بقوا من مجتمع تاني غير مجتمعكم

و اللى عاوز ينتقد سلوك ينتقده براحته بس بأدب ويراعي مشاعر غيره

ده حتى من اداب النقد ان النقد يكون بناء بصيغة نصيحة عشان الشخص الغلطان ياخد بنصيحتك ويسمعلك ويشكرك كمان

وكمان مينفعش عشان وجدت سلوك سىء ظهر من واحدة منتقبة او واحد ملتحي اني اعمم حكمي علي جميع المنتقبات و الملتحيين

ما أنا ممكن اسمع ان دكتور قتل مريض بسبب الاهمال او اشتغل في سرقة الاعضاء ونقلها

هل معني كده اني اشتم في كل الدكاترة واسب و العن فيهم واقاطعهم واعلن الحرب عليهم

ده يبقه حرام والله

واللى يغيظ ويوضح تفاهة فكرهم وتناقده وجدالهم وخلاص

أن وزير الصحة نفسه يجي تاني يوم في برنامج معرفش البيت بيتك ولا 90 دقيقة ولا ايه ويقولك في محاولة منه انه يهدي الناس ويطمنهم من انتقال عدوا انفلونزا الخنازير ويقول بوضوح

"ان كمامة توضع علي الفم والانف كل يوم وتغسل في اخر اليوم كفيلة بحماية الشخص من الأنفلونزا"

يعني يا راجل يا طيب...ايش فرق النقاب عن الكمامة بتاعتك دي

يعني هو النقاب عشان حاجة تخص العبادات و بنلبسه بمزاجنا عشان ربنا يبقه بينقل الامراض ...أما لو هو حاجة بتحمينا من الجراثيم ولابسينها غصب عننا يبقه حلال ومطلوب

ده غير بردو الدكاترة لما بيجوا يدخلوا حجرة العمليات عشان يعملوا عملية لحد

كل اللي في الحجرة بيلبس كمامة علي وجهة عشان مفيش جراثيم تنتقل للمريض ولا جراثيم تنتقل من المريض للطبيب او الممرض

يعني معني كده ان الكمامة دي اصلا بتكون وظيفتها انها تحمي الاتنين من انتقال الامراض و الجراثيم

اومال ليه بقه بيرجعوا يقولوا ان نقاب الممرضات بينقل جراثيم للعيانين...واذاي اصلا هينقل الجراثيم دي وهي كاتمة نفسها ببيشة عن المريض

ارحمنا يا الله

وقال ايه يجيلك عم زقزوق المزقزق

ويطلعلك كتابه "النقاب عادة وليس عبادة"

ده اصلا اساساً جموع العلماء أختلفوا في النقاب حول انه سنة او فرض او فضيلة

يجي بقه عم زقزوق دونا عن كل الناس دي يطلع هو بالفتوى الجديدة ويقولك ان النقاب اصلا عادة ومش عبادة

و يقولك كده بالنص الصريح في كتابه

ان المتبرجة دي احسن من المنتقبة...لان المتبرجة دي علي معصية وعارفة وبتقر انها علي معصية...اما المنتقبة دي فهي علي معصية ولكنها تعتقد انها علي فضيلة

ويقولك ان المتبرجة محتاجة مننا انها ندعيلها مرة واحدة ان ربنا يهديها

اما المنتقبة المفروض اننا ندعيلها مرتين

مرة لانها سنت سنة سيئة في الاسلام وربنا هيحاسبها عليها

ومرة لانها مبتدعة يعني بتعمل بدع وبلاوي و محدثات

يعني صحابة الرسول...وكبار العلماء و المفسرين و المشايخ

طلعوا مش عارفين حاجة

وسيادتك المهدي المنتظر اللى كنا مستنينه يجي في اخر الزمان عشان يبين لينا حقيقة النقاب ويقول خلافا عن الجميع انه حرام!!!

ومن مكاني هذا احب اقولك يا زقزوق انت وكل اللى معاك و كل اللى مسخرين مدوناتهم لسب الملتزمين

النكتة ديييييي جديدة

روح يا شيخ

ربنا يهديك

أخويا جاله انفلونزا الطيور

ديك النهار (مهي انفلونزا طيور و ديوك بقه) يعني من بتاع اربع ايام....اخويا أحمد لقا بومة في الشقة اللى فوق واقفة ومش بتطير
المهم راح ماسكها و حطها في قفص كبير بتاع العصافير
و البومة ترقع بالصوت وتدعي علي احمد وعلي اليوم اللى قفشها فيه...مفيش
وصراحة البومة كان شكلها مرعب جدا وشكلها بومة نادرة لان لونها ابيض منقط ووشها غريب ذي الانسان وكبيرة اوي وقوية وخاصة ان احمد عمل سيرش علي النت عنها وجاب ارارها واسم ست ابوها كمان
قوم ايه...اعدنا نقول لاحمد طيرها يا ابني يسترك ربنا مش ناقصين غم وهم و اشكال تسد النفس
رفض وصمم انه يربيها ذي العصافير
وراح حاطط ليها لحمة نية لانها من الجوارح اصلا
وهي ترفص وترزع نفوخها في القفص

جاي جاي ويك ويك...مفيش
اخر ما زهقت بقت توطي راسها وتهزها كده و كأنها متأثرة...بس قلب اخويا محنش بردو وقال انه عاوز يتبناها لانها أثرت في مشاعريره وشك انها يتيمة ومقطوعة من سجرة
البومة فضلت علي هذا الحال لا راضية تاكل ولا تشرب وعورت نفسها من القفص و من ترزيع دماغها لحد تاني يوم
اخر ما تعبنا اعدنا نخوف احمد ونقوله ان في ست دخلت النار في قطة وحرام عليك...لحد ما قلبه حن و قرر يطيرها لانه فكر كويس ولقا انه مش هيقدر علي اكلها وشربها وعلاجها وخاصة انه علي وش دواز وبيدهز حاله وبيدور علي بنت الحلال ومش ناقص دعوة من البومة تجيبه الارض و بالفعل طيروا البومة بسلام...وتوتة توتة خلصت الحدوتة
يوميها بقه احمد اخويا داخ و بقه يعطس
واحمد اخويا ده اكبر وسوسواس في الدنيا...يعني ممكن يجيله البلهارسيا وهو بيعوم في البانيو لمجرد انه يوهم نفسه بأنه جاله بلهارسيا
احمد اخويا دخل علينا ووشه مخطوف وقالنا باستسلام "انا جالي انفلونزا الطيور"

ايه يا ابني ده ده انت قديم اوي....بقه كل الناس نسيت انفلونزا الطيور خلاص وشغالين في انفلونزا الخنازير وانت جاي تقولي طيور وبتاع يا شيخ بلا بتاع بقه

لكن بيني وبينكم كلنا في سر بالنا بنقول

"يا خراشتي لا يكون جاله صح انفلونزا من البومة..حاكم البومة كانت بتضرب بالروسية اه وعفية ماشي بس يمكن دي حلاوة الروح بس"
وفضلنا نقنع فيه ونديله امل في الحياة وهو راسه و الف سيف انه خلاص بيقضيله اخر يومين

وعمل سيرش عن الاعراض...و سأل ناس... وعمل اتصالاته وهو كله قناعة بانه خلاص بيودع
المهم ان احمد في عز ده كله متعتقش من تريقتنا كلنا
وبقه التعامل مع الاشكال المتفيرسة دي من منطلق التعامل مع الجدع صاحب قهوة السعادة اللى كان بيقول لسوبر هنيدي

"ايوة يا سوبر هنيدي...عاوز ابيض و مش قادر"

"هاه يا احمد نحطلك شوية درة عويجة تنقرفيهم كده وانت اعد؟"

استني يا احمد متنمش علي السرير هقوم احضرلك تقفيصة صغيرة تنام فيها

هاه يا ابني انت ريشك بينبت ولا ايه
تاني يوم الصبح لقيت احد اخويا قايم من النوم ذيه ذي الناس العادية

وقام بعزم ما فيه مدينا حتة

"كوكوكوكوكو"
نصيحة مني دوقت عشان اخويا اللى هبلنا كلنا ده

لو اي بومة حد جه يمسكها عشان يربيها اياها تهاجم ولا ترفص...لا...الحل الوحيد...انها تقف وتعمله ذي الديك اللى فوق ده وتقوله اياك تقرب مني لحسن انا عندي انفلونزا الطيور وهبهدلك

و لو اي واحد لقا بومة في الشقة اللى فوق اوعاه يقرب منها ولا يفكر يربيها في قفص العصافير ولا يفكر يتبناها ابدا

مش ناقصين امراض احنا

وفيما يخص العنوان عشان ميبقاش كدبة لان الرسول صلي الله عليه وسلم قال" خيركم من ترك الكذب ولو كان مازحا" فأحب انوه انى وانا بكتب العنوان كان في نيتي ان اخويا جاله انفلونزا الطيور في الوهم يعني كلمة الوهم في بالي بس مكتبتهاش لزوم الساسبنس

و علي فكرة الصور بتاعت البومة دي ندي اختي اللى لقطتها وأحنا بنعذب البومة

سبوني بقه دلوقت

هام جدا للكل

الاخ محمد فارس صاحب مدونة الحياة أمل توفاه الله

أسأل الله أن يغفر له وأن يتجاوز عن سيئاته ويدخله فسيح جناته

انا لسة حالا كنت بكتب البوست ده وبعد ما كتبته وجيت في الاخر عوزة أستشهد ببعض اسماء المدونين اللى توفوا فوجئت بأن محمد توفاه الله

فحبيت ابدأ بيه التدوينه

سبحان الله كنت معلقة عنده في اخر تدوينه ليه وهو كان رادد عليا عنده و معلق عندي قريب

واشهد الله ان مدونته بما تحمل من كلمات فهي بإذن الله في ميزان حسناته

*******************

البوست الاساسي و يا ريت نتعظ بقه

يا جماعة إن الموت ياتى بغتة

قصة كنت سمعتها و أثرت فيا بشدة وقلت لنفسي اذاي الشخص ده عمل كده

ولما فكرت مع نفسي شوية لقيت اننا معظمنا ممكن يكون وقع في نفس المشكلة وهو مش حاسس انه بيودي نفسه في دهية كبيرة

القصة اللى سمعتها من أحد كبار الدعاه

واللى ممكن يكون معظمنا سمعها بس مفكرش في تشابه قصته مع الشخص ده وان النتيجة واحدة

القصة هي وبإختصار ان كان في واحد مسلم

جاله في مرة علي ايميله صور خليعة

راح دخل علي الموقع اللى بعتله الصور وعمل اشتراك فيه

الاشتراك كان ب500 درهم او ريال مش فاكرة انهي عملة بالظبط

المهم ان الاشتراك ده بيتيح له ان كل اسبوع هتجيله صور من الصور الخليعة دي في ميل

الشاب ده بقه كل ما تجيله صور ينقي اكتر الصور خلاعة وينزلها علي الموبايل ويفرج اصحابه عليها ويفتخر بالصور امامهم

راح اصحابه التعبانين اتجننوا بالصور و سألوه اذاي ممكن يعملوا اشتراك هما كمان راح قالهم

"بلاش تكلفوا نفسكم ...ادوني ايميلاتكم وليكم عليا اي ايميل هيجيلي هعمله فوروارد ليكم"

وبالفعل بقه كل ايميل يجي للشاب ده يروح متحول اوتوماتيك فوروارد لاصدقاءه

مرت شهور والشاب ده عمل حادثة ومات

وبعد ما صلوا عليه ودفنوه

فالراجل صحبه اللى بيحكي للشيخ عن الحكاية بيقوله انه بعد ما دفنوه وروح بيفتح الميل بيبص لقا ايميل جايله من الشاب اللى مات

استغرب اوي وراح فاتح الميل لقا صور خليعة...راح مستغفر ربنا وقال لنفسه اكيد ده ايميل متأخر وانا فتحته متأخر ده الراجل مات وادفن خلاص

تاني اسبوع حصل نفس الموقف

راح الراجل ده ادرك علطول ان الميل متظبط انه يبعت الصور اوتوماتيك

راح اتصل بإدارة الموقع وطلب منهم انهم يلغوا حساب الشخص ده وبلغهم بانه توفي وطلب منهم يرحموه بقه من اللى بيحصل

راحت إدارة الموقع طلبت منه الباسورد

فالراجل قالهم انه ميعرفش الباسورد

راحت الادارة ردت عليه الرد الاتي

"مينفعش نلغي الحساب من غير الباسورد...و الشخص صاحب الحساب لسة فاضل علي اشتراكة 4 سنين وخمس شهور لان اشتراكه كان لمدة خمس سنين"

يعني اربع سنين وخمس شهور هتكون في سيئة جارية علي روحه

كل ما يخلص من عذاب تتبعت الصور لاصدقاءه فيبدأ عذاب جديد

صحيفته تتقفل عن كل اعماله الا عن سيئة جارية بتتجدد كل اسبوع لمدة اربع سنين ونص

طبعا حد هيسألنى دلوقت ويقولي

"ليه بتشبهينا بيه وبتقولي معظمنا بيعمل كده."

فهرد و أقول....ايوة في ناس كتير مننا معرضة للموقف ده و هي مش واخدة بالها و أنا اولهم

طبعا كلنا سمعنا عن مدونين كتير اتوفوا

ذي الفارس الملثم

وبهلولة

و محمد فارس

وناس كتير سمعت عنهم وشافت مدوناتهم

واول ما سمعنا عن موتهم دخلنا جري نشوف مدوناتهم ونشوف كلامهم وندور علي حاجة كتبوها قبل موتهم ونشوف كتبوا ايه ومش بعيد نقرا المدونة كلها في اعدة...ونكتشف ان الناس دي كانت اخر حاجة كتباها في مدونتها حجات طبيعية جدا

منهم اللى كتب بوست بيقولنا فيه معلش يا جماعة اعذروني لاني مش بزروكم بس انا تعبان شوية وعندي برد منيمنى ادعولي بالشفاء وازوركم في القريب العاجل

ومنهم اللى كانت بتقول ادعولي بالشفاء لاني هعمل عملية ولو ربنا نجاني منها هرجع احكيلكم علي اللى حصل

ومنهم اللى كانت مش متوقعة خالص وبتقول انها مسافرة لاهلها مثلا وهترجع تحكي المغامرات بتاعت السفرية

و للأسف محدش منهم رجع

محدش لحق يرجع يحكيلنا عن اي حاجة

محدش منهم لحق يكتب الباسورد بتاعته في خانة الباسورد عشان يلحق يمسح حاجة حرام كان عملها في مدونته

الحمد الله و الشكر لله كل المدونات اللى اصحابها توفوا محدش فيهم مدونته ان شاء الله هيكون فيها سيئة جارية

يا جماعة

في مدونات كتير حاطين اغاني و موسيقي علي مدوناتهم

اي شخص بيدخل مدوناتهم بيسمع تلقائي الاغنية

بالله عليكم...سيبك من انك طول ما انت عايش ومدونتك مفتوحة فأنت بتتحمل ذنب كل شخص بيدخل ويسمع الاغنية من مدونتك

سيبك من انك اصلا بتاخد ذنب انك بتسمع الاغاني

لا...انت كمان كنت سبب في ان غيرك يسمعها

يعني لو ربنا كان هيتجاوز عن سيئتك في سماعك للاغاني مش هيتجاوز عن سيئاتك لانك كنت سبب في سماع غيرك للاغاني

يكفي اننا نشيل ذنوبنا احنا بس

لكن اننا نشيل ذنوب غيرنا وذنوب مئات من الناس بيدخلوا عندنا يقروللنا...الامر صعب...صعب اوي

اتخيل معايا انك كنت حد من المدونين اللى توفوا

واللى اهاليهم مبيقدروش يدخلوا مدوناتهم اصلا ولا يعدلوا شىء ولا حتي يبلغونا بخبر موتهم الا من خلال التعليقات ذيهم ذي الغرب وده لانهم مش معاهم الباسوورد

تخيل انك توفيت فجأة وده لان فعلا الموت ياتى بغتة

تخيل ان الناس عرفت انك توفيت وجريوا بسرعة علي مدونتك يقرولك ويترحموا عليك

تخيل لما كمية الناس دي كلها تدخل عشان تدعيلك وتقرالك كلامك اللى المفروض انه حسنة جارية صحيفتك مش هتتقفل عنها وطول ما حد يقراها تاخد انت الثواب فوري وانت في قبرك

تخيل لما كل الناس دي تسمع الاغنية اللى انت حاططها

وتفضل مدونتك موجودة في بلوجر الى أن يشاء الله وتفضل الاغنية شغاله وتفضل الزيارات مستمرة حتي وانت ميت ومتعفن

بالله عليك هتقولربنا ايه ساعتها

يا جماعة

بالله عليكم....تالله عليكم

بلاش نشيل ذنب حد...خلونا ننال رحمة ربنا...خلونا نخاف من ربنا ومن المعصية...عوزين قلوبنا تلين شوية

{ مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ }

يا جماعة والله هنسأل علي الهمسة اللى بنهمسها

خلونا نراعي ربنا في كلامنا وانا اولكم

ونفس الموضوع ينطبق علي الشخص اللى حاطط اغاني علي موبايله وكل ما الموبايل يرن يكون هو سبب في سماع غيره للاغاني و الموسيقي ويشيل الذنب

ولا ومش بيكتفي بكده...ده بيروح يبعت الاغاني و النغمات دي بلوتوث لاصحابه

وتفضل الاغنية تتنقل من شخص للتاني لحد ما تنتشر...ويموت الشخص و الاغنية او الفيلم او النغمة عماله تنتشر وتزيد وهو اصلا كان الاساس في انتشارها

ويفضل طول ما هو في قبره بيعذب بهذه السيئات الجارية و قد تمتلىء صحيفته بسيئات جارية حتي قيام الساعة

بالله عليكم فكروا في كلامي واعقلوه

لو حد مش مقتنع اصلا بحرمانية الغناء وشايف ان الموسيقي حلال (و ده طبعا كلام مغلوط لان في أدلة صحيحة من القرأن و السنة بتحرم الغناء ان شاء الله هبقه انشرها في بوست)

اللى هيقول علي الاغاني انها حلال هسأله سؤال احد

"هل انت واثق مية مية في المية ان سماع الاغاني و الموسيقي حلال؟"

"هل انت شايف ان اختلاف العلماء حول الغناء مبيولدش عندك و لو شك واحد في المية في حرمانيتها؟"

"لو انت شاكك واحد في المية...هل عندك الجراة انك تعمل شىء صدقني مش هتندم عليه دلوقت لكن هتندم أشد الندم عليه وانت ملفوف بكفنك في قبرك المظلم يوم يتركك الجميع ويرحلون؟!!!!"

خلونا نتعظ من مدونات المدونين اللى توفوا

خلونا نزور مدوناتهم و كأننا بنزور قبورهم

خلونا نقرأ كلامهم و كأننا نقرأ أعمالهم في الدنيا ونشوف نفسنا هنقول يا بختهم بكلامهم ولا يا حسرتاه عليهم

خلونا نفكر في اي عمل هنقوم بيه...يا تري حلال ولا حرام...يا تري هيكون صدقة جارية أم سيئة جارية...يا تري هنقدر نتحمل ذنب اي حد غير انفسنا؟ّّّ!!!!

أسأل الله ان نكون من الذين يسمعون القول فيتبعون أحسنه

اللهم ما بلغت اللهم ما فأشهد

لا تنسوا أن الدال علي الخير كفاعله

حجات منقياها عالفرازة

انا مش هتكلم في البوست ده كتير

بس هسيبكم تتفرجوا علي شوية فيديوهات بجد روووووووووووعة...ومؤثرة...وعجيبة....وكلها أيات...وكلها حكم و مواعظ

بتقولنا بجد ان الله حق واننا لازم بقه نفكر شوية ونخاف شوية ونسأل نفسنا أحنا مقصرين في ايه

بس مش عارفة بقه هل الناس اللى معندهاش اكاونت في الفيس بوك ينفع يشوفوها ولا لا

الله اعلم.

ده فيديو يخلي الواحد يقشعر بجد.... هو فيديو للحرم ساعة الاذان...بصوا للأنوار في الحرم لما يجي المؤذن يقول محمد رسول الله

مشهد أكثر من رائع ... وبجد معجزة.

http://www.facebook.com/home.php?#/video/video.php?v=1126628885579&ref=nf

ده بقه مقطع فيديو لواحد بعد ما مات اللى حصل للايميل بتاعه...قصة مؤثرة جدا وصغيرة اوي مش هتاخد وقت

http://www.facebook.com/home.php?#/video/video.php?v=1114719341129

ده بقه مقطع فيديو حلو اوي بيوضح اذاي ممكن ان النهر او مجري مائي بسيط يصبح جند من جنود الله ويقدر يخسف بطريق اسفلت بكل سهولة...مشهد رائع ونادر جدا

http://www.facebook.com/video/video.php?v=1085423768758&ref=nf

ده بقه فيديدو مؤثرررررررررررررر بشدة

معبر جدا ويخوف ومش عارفة اوصفه من كتر جماله...بجد فنان اللى اخرجه

اتمني تكملوه للاخر و تتخيلوا كل اللى فيه

http://www.facebook.com/video/video.php?v=1109404488261

ده بقه فيديو بيضحك وعسل اوي لنونة امورة خالص

http://www.facebook.com/video/video.php?v=1123691012134&ref=nf

لا تنسونا من صالح دعاؤكم